Yacedkel 23 - NABUWWA KEE MALIKWA

DAMBILEELAH YAN MAQANXIIXI

¹ YALLIH qangara yol obteeh; yok iyyeemih:

² «Bani-adantow, dumah yan saaku inki ina le namma maqanxá sugte.

³ Too namma maqanxá qunxuk ten saaku Masril sugeeniih; too Masriy elle sugeenihiyyal, angu keenik soocaarak, bikiri qunxih keenik kalla heenih, sarrak xiiqareh xiina yekkeenih sugen.

⁴ Keenik barah naba maqanxá migaaqah Ohola deqsitak ten. Ohola, Samaariya deqsitta magaala kinni. Qunxa maqanxá Oholiba deqsitak teneeh, is kaadu Yarusalaam magaala kinni. Anu ken nammayal rihimeeh, xaylo yoh xalen.

^5-6 Ohola yi nikaacat anih, dalwa abak sugteeh; Assuuriyah marih kacani kaxxam tet yibbixe. Too maray is kacanuh akah rabak tenehiyya, sartanah qaskar saray qasdiiminit yeneeniih, baaxoh abbobti kee qaskar abbootan luk yenen. Too mari furrayniino kee qax-maqaane luk yeneeniih, faaris amok qeebi abta labhak yenen.

⁷ Ohola Assuuriyah marak inkih mareytá tekkeeh; tet dalwa, Assuuriyah mari xeet kee cooxuk bicissa hee duyyey yaqbudeenihiyya ken lih taqbudeemit, tet asisse. Toh kaadu, isi nabsi nadaasa abaanamih gadda tet abte.

⁸ Baxuwwah ten saaku labha angu teetik xagam-xagak xiiqareh xiinah tet dalwisak yenen. Masriy bikiri teetik elle kaleenihiyyal abak sugga 'te dalwa cabtu cinteeh, beyak raqte.

⁹ Tonna-leemiik, anu is kicinuk ten Assuuriyah marih gabal tet hee.

¹⁰ Too mari xagarak saro teetik kalla heenih qasunuk tet caben. Say-xaylo kee lab-xaylo teetik seewah been. Tet seefit qiden. Agbi elle aninnaan ikkel, tet camit gace.

¹¹ «Tet maqanxá Oholiba kaadu ah tuble'mmay, dalwa kee uma-taamah isi maqanxak lafittam bahte.

¹² Is kaadu, Assuuriyah maray baaxoh abbobti kee qaskarat yeneeh kaxxam ifu le qaskar sarat yenehiyyah kacani tet yibbixe. Too qaskar kaadu qax-maqaane luk teneeh; qeebi faras amok abta labhak yenen.

¹³ Oholiba adabik tu luk manannaay; isi maqanxak kaxxih, dalwa kee nadaasat baatem teetik uble.

^14-15 «Dalwat bisoh gexak gexxe. Baabelon qaskar abbobtih ceeloy gidaar bagul taswiirih yanihiyya tuble waqdi, kacni tet yibbixe. Too mari kaxxa qisi le sara kee booruy axcal isinnik malmaaleenihiyya kee qax-meqe qumaamat amot luk yenen.

¹⁶ Ken taswiiriy gidaar bagul yanihiyya tuble waqdi, kacni tet yibbixeeh; sarrak mareytá keenih takke'gidih, oson dabaaqah elle yanin Baabelon-baaxo farmo keenih rubte.

¹⁷ Baabelon mari dina tet lih aba'gidih, tet farmol yemeeten. Kaxxam tet haysiteeniih, sarrak nadaasa tet abeenik lakal, is keenik cayteh ken tinqibeh.

¹⁸ Qasunuk gubbil is hayteeh, xiiqareh xiina kinnim kulli mara isik tuybulle waqdi, tet maqanxak akah sakkite'nnah, anu teetik kaadu sakkiteh.

¹⁹ Duma baxuwwah ten saaku Masril abak sugga 'te dalwa kassitak, dinah abtot bisoh gexxe.

²⁰ Tokkel yan maray labna danan labnah gid akak takkeeh, sahwatak faras sahwatih gide akak tawqehiyyah kacani tet yibbixe.

²¹ ‹Oholibay, Masri rasul baxuwwah sugte saaku, labha angu kok xaganxagak bikiri kok kaleenik sarra abak sugte dalwa uxih abtam faxxa.›

YALLI QUNXA MAQANXAL TATRUSE COKMI

²² «Away Oholibay, yoo YALLAY Mulki lehiyya kok axceemih, atu woo koo kicinuk yen marih kacanuk cayteh tani'mmay, anu ku naqboytit ken abeyyooh; marot koo heelon.

²³ Baabeloonuh yooboke mara kee Kaldayah yooboke maraay, Fakod kee Sowaq kee Kowaq yooboke mara kee Assuuriyah mara baaheyyo. Oson inkih, qax-maqaane le furraynay farasak qeebi abtahiyya. Baaxoh abbobti kee qaskar abbobtiiy, kaxxa-kaxxa abbootan le mara kee agiirah tan qaskar kinnon.

²⁴ Too mari mango silac kee faras-gaariiraay, awurut beyan gaariira kee mango qaskarak foocat gacca 'yeenih, kilbat le kabuk amaatelon. Gob kee amot haan birta luk marot koo heelon. Anu kaadu ken gabal koo heeyyo. Too waqdi too mari, ken madqa elle inta'nnal, kol ackumelon.

²⁵ Anu koo inqibeemih sabbatah, oson koo yinqibeenih faxem kok abitoonay axceyyo. San kee aytiita kok argiqelon. Seefit koo qidelon. Say-xaylo kee lab-xaylo kok seewah beeloonuuh, kok raqtem girat carriselon.

²⁶ Xagaral lito sara kok kalelon. Xagarat bilqah haysitte bila kok kalelon.

²⁷ Tonnal Masril baritte dalwa kee uma taama, anu koo cabsiiseyyo. Tohuk wadir xeet kee cooxuk bicsen duyyeh qibaadak raaqetto. Masrik niya kaletto» iyye.

²⁸ YALLAY Mulki lehiyya iyyeemih, «Atu niqibtooh, faxe wayta marih gabal koo heeyyo.

²⁹ Too mari koo niqbaamih sabbatah, atu edde taamitta 'teemiy isi cawalal geytehiyya kok beeloonuuh, foyyal koo cabelon. Xiiqareh xiinah innah, qasunuk koo cabelon.

³⁰ Dalwa fayxi kee abteh tan xiiqareh xinto, amahah koo tecee. Kulli baaxoh mari tu edde faxa kacba tekkeeh; xeet kee cooxuk bicsen duyyeh qibaadat nadaasa is abte.

³¹ Isi maqanxah raat katatteeh; tonna-leemiik too teetih ecee digaalah-kobbayyay is akak tooqobek koo afqeyyo» iyye.

³² YALLAY Mulki lehiyya iyyeemih, «Ku maqanxa akak tooqobe kobbaayak aaqubetto. Too kobbaaya, nabna kee adda le kobbaayay kibuk tanih tani; tonna-leemiik ummat kaxxa anqas kee digirih koo haysitele.

³³ Too kobbaayay ku maqanxa Samaariya akak tooqobe, umaane kee cunxo addat le. Koo askiriseleeh koo biyaakele.

³⁴ Fuqqa heettooh tu akak macabta. A kobbaaya butukka hayteh, tiddigille exxaaxit akak isi angu argiqetto. Tahat yabtam YALLAY Mulki lehiyya» iyye.

³⁵ Yoo YALLAY Mulki lehiyya kaadu axceemih, «Yoo hawwenteeh darre yot cabteemih sabbatah, ama litoh tan sammô-xagit kee abtah tan dalwak gexxaamah, biyak kol oobele» iyye.

NAMMA MAQANXAL YAKKU WAA COKMI

³⁶ YALLIH qangara yol obteeh; yok iyyeemih, «Bani-adantow, Ohola kee Oholibal cokmi ab. Cokmih tuk teena keenik inxic. Abeenih yanin uma taamah ken istikiy.

³⁷ Ama namma kacbat biili yan. Dalwa lih abeenim, xeet kee cooxuk bicsen duyyeey; qiddeenim, yoh xalen xaylo. Yoh xalen lab-xaylo xeet kee cooxuk bicsen duyyeh bagul sadgatah qiden.

³⁸ Oson aben dambi amahat taadeem hinna. Too saaku yi qariy yoo elle yaqbudeenihiyya nadaasa aben. Anu yoo edde uqbuda exce Sabti ayro xagure waanam baahen.

³⁹ Xeet kee cooxuk bicsen duyyeh sadgatah yi xaylo qidda heenik sarra, yi qariy yoo elle yaqbudeenihiyya yemeeteeniih, nadaasa aben. Yi qaril toh aben.

⁴⁰ «Allî-baaxok labha keenih baahaana'gidih, farmoh sinam ruuben. Woo maray farmo akah ruubeenihiyya keenih yemeeteh; too waqdi taaxige namma maqanxá kaqallaay intil kucul hayyaay qax-meqe bilat gacca 'te.

⁴¹ Sarrak qax-meqe kaqaadiidik amol, keenik foocal daffa iyyen. Anu keenih ecee qaydarus kee *daytuun zeytih agantah, meqeemik tu macabinnoonuy inkih foocal keenik heen.

⁴² Bacarih tan baaxok temeete labha gaabowwa 'teeh, waxxaq axcuk yeneeniih; taaxige barra kee maqanxah carayat bila heeniih, amot qax-meqe kalabta heen.

⁴³ Toh uble waqdi, ta mari madabaanaak dalwat xagar akak yembexe barra lih xiinaanah, 'yaanam inni niyal hee.

⁴⁴ Taaxige bacarih tan baaxok yemeete mari dalwa aba'gidih, Ohola kee Oholibah buxa gexen; a namma kacbah buxa fiiruk geerah gexen.

⁴⁵ Cakki gital yan mari a namma barra abta dalwa kee qidiyyah keenik malkitelon. Macaay inteenik, dalwa kulli way abaanaah; sahda qabalat gaba keenik tutlukeh tan» iyye.

⁴⁶ YALLAY Mulki lehiyya iyyeemih, «Cunxo keenit qiddu waytaah, ken buubtu wayta butta uguugusay keenit ruuba.

⁴⁷ Too mari xeetit ken rekkaaqiyaama. Seefit ken mudoonay; xaylo keenik qidoonay; buxaaxi keenik carrisoonay.

⁴⁸ A namma maqanxak, ‹Isin abten dalwah agbi sin gabbaaqah abaamak, ahaysa dalwa kee dina baaxok akah baata innah abeyyo.

⁴⁹ Sin nammayat uble adbi-sinna kee xeet kee cooxuk bicsen duyyeh abak sugten qibaadah sin digaaleyyo. YALLAY Mulki lehiyya kinniyom too saaku yok aaxigetton› » iyye.