Yacedkel 22 - NABUWWA KEE MALIKWA

YARUSALAAM MARI ABEEMI

¹ YALLIH qangara yol obteeh; yok iyyeemih:

² «Bani-adantow, a sahda qida mari kibuk elle yan Yarusalaam magaalal cokmi ab. Cokmih tuk teena teetik inxic. Is abba hayte umam-yabuli teetih waris.

³ Teetik intaamah: YALLAY Mulki lehiyya kok iyyaamah, ‹Isi marak mangom qiddeeh; xeet kee cooxuk bicsen duyyeh qibaadat isi nabsi nadaasa abteemih sabbatah, edde baatu wayta wakti xayyooweh.

⁴ Sahdat abte qidimik gexxaamah, umeena tekke. Xeet kee cooxuk bicisse duyyey taqbudehiyyah sabbatah, nadaasa is abte. Tonna-leemiik edde baatu wayta wakti xayih. Inkinnah kaxxam xayi. Tohih sabbatah baadal tan ummatta kee doolat elle anqassa sahdayto koo abeyyo.

⁵ Gitak tewqeemih sabbatah, xer ikke kee xayi ikkel enna 'ya mari inkih, qunxa intit koo ableleeh; kol asuulelon.

⁶ Israayil abbobtiy ku addal tanihiyya, abbootan loonum isinnik abaluk, ummat qidan.

⁷ Yarusalaamey, isi xaleena yassakaxxe num ku addal mayana. Marin baaxoh maray addal kok yani duquurussa. Gubun kee qayxiixa tadlume.

⁸ Taahirik tan qibaadah caagid elle aban arooca maxagurta. Sabti ayro maxagurta.

⁹ Yarusalaamey, ku addal yan marak garab, sahda qidsiisa'gidih diraabat yaaba. Marak garab kaadu xeet kee cooxuk bicsen duyyeh sadgatah qiden saqih cado yakmen. Marak garab dalwah abtot agxita.

¹⁰ Marak garab abbah agabu lih xiina. Marak garab kaadu wasaktut yan agabut fido faxa.

¹¹ Marak garab cuggaaneh keenik yan marih agabu lih xiina. Marab garab isi xayloh agabut fido faxa. Garab kaadu abba ken lih le maqanxiixit fido faxa.

¹² Ku addal yan marak garab, lakqo akah ucuyya haan waqdi, qida iyyen mara qida. Marak garab abuuduh yeceeh yan lakqot gacsal ossotina faxa. Isinni cuggaaneh lakqo dulmih beyan. Ku mari yoo hawweeneh yan. Tahat yabtam, yoo YALLAY Mulki lehiyya› teetik inxic.

¹³ «Yarusalaamey, sahdat abta bukko kee qidiyyah abeh an naqabuk gexxaamah, gaba kol heeyyo.

¹⁴ Anu koo digaalu waa saaku gaba yot maay gacsetto? Tahat yabtam yoo YALLAY Mulki lehiyya; excem duudusa Dagelta kinniyo.

¹⁵ Ku mara fixixih marin baaxo kee aaxige waan marih addat baxciseyyo. Uma-taama koo cabsiiseyyo.

¹⁶ Marin mari qawratak koo qidele. Atu too waqdi YALLA kinniyom yok aaxigetto» iyye.

TASIFFIYE YALLIH GIRA

¹⁷ YALLIH qangara yol obteeh; yok iyyeemih:

¹⁸ «Bani-adantow, Israayil mari yot haam mali. Ta mari, lakqo girat yasiffiyen waqdi, nacaas kee dingo kee birtay baaxot qidaanahiyyah gide yol yanin.

¹⁹ Tonna-leemiik keenik intaamah: YALLAY Mulki lehiyya siinik iyyaamah, ‹Tu xiqe sinni duyyeh gideh yol taniinik, takkeenimik sittat Yarusalaam fan sin baaheyyo.

²⁰ Lakqooy nacaas kee birta yasiffiyeeni'gidih girat akah diyaayisan innah, yi bagcarra tonnal sin diyaayisele.

²¹ Gaabossa sin heeh inni naqabu siinil oobiseyyooh, magaalah addal elle sin carriseyyo.

²² Lakqo girat akah diyayta'nnah, Yarusalaam addal diyaayettoonuuh; too saaku yi naqbi le'nna abletton› keenik inxic» iyye.

YUUDÂ-BAAXOL TEKKE UMAANE

²³ YALLIH qangara kaadu yol obteeh; yok iyyeemih:

²⁴ «Bani-adantow, Yuudâ-baaxok intaamah: ‹Yi naqabih sabbatah, atu taahirik ane wayta baaxoy rob elle rade waahiyya tekke› inxic.

²⁵ Too baaxol tan abbobti, qiden saqih amol garadda lubookah bis lon. Ummatta uma qidimih qiden. Lakqo yellekiiy duyye yellek, keenit macabaanay keenik beyaanah. Oson sahdat aban qidimih, mango agbi gubuunuh raaqe.

²⁶ Seeka yi xinto intam mabtaay, taahirik tan qibaadah caagid elle aban arooca maxaguran. Caraamak tanim kee calaalak tanim ummatah mawarsan. Sabti ayro maxaguran. Tonna leemik Israayil mari yoo mayassakaxxan.

²⁷ Israayil abbobti, barugi amol tongoorowe suulay mariiy kabuk akak yakmeh innah abitan. Gita maleh gaddalitaanamih fayxih sahda qidan.

²⁸ Nabuwwa qari irok noorat yaskute marih innah, ta umaaney takkehiyya yastureenih; able ween wacyi nubleh iyyaanaah, akke waytu waytam akkele iyyan. Toh Yallak geyne xaagu iyyan. Yoh tu gactek, anu tu keenik maxacciyo.

²⁹ Baaxol yan mari kaadu, sahda duquurusakaay duyye keenik buuba. Masaakiina kee tu maleelat xukkutaanah. Allî-baaxoh maray addal keenik yanihiyyah cakki mayaaxigan.

³⁰ Abeh an bagcarrah baaxo baysaamak dumal, magaala edde cata'gidih maroh sugte gaso xisaah woo gasoy tiddigillehiyyah garil soola num gorrise'mmay weeh.

³¹ Tonna-leemiik, abeh an bagcarra keenil oobiseyyo. Abba heen umaanek gexxaamah, inni balat ken bayseyyo. Tahat yabtem yoo YALLAY Mulki lehiyya» iyye.