Yacedkel 21 - NABUWWA KEE MALIKWA

YALLIH DIGAALA

¹ YALLIH qangara yol obteeh; yok iyyeemih:

² «Bani-adantow, Yarusalaam ummat qibaada elle abta aroocat takku waytaamat yab. Yoo YALLAY Mulki lehiyya axcem keenih waris; Israayil rasuh garci kal.

³ Intaamah: YALLI, ‹Anu naqboytah kok aniih, seef sibak siibeh kol aniih; gitat yan mara kee umeynit tittak baxse'kal filla keenik kaleyyo.

⁴ Seef sibak eyyeqqa heeh, gabbi-qaxak xabba heeh kilbat le kabuh amma 'yaanam fan, uma num kee meqe num tittak meexe'kal bayseyyo.

⁵ Yoo YALLI siibeh an seef ahaysa sibah gacse waam, kulli num yok aaxigele› iyya.

⁶ «Tonna'mmay, Bani-adantow, sinam koo elle table'kkel, xiiroonuk rade numih innah gac. Kaxxam tu edde toome numih innah gac.

⁷ ‹Macaay akah gomomtaah tu edde toome num akah celtam?› kok iyyan waqdi, keenik intaamah, ‹Tu edde toome num akah ceelam, sarra yamaatu waa uma xaagih sabbata› keenik inxic. Woo xaagi yamaatu waa saaku, afqado keenik cunxoh dub axcele. Gaba keenik axaxitele. Niyâ xiglo ken abbixeleeh, gulub keenik kadiidimitele. Wakti xayyooweh yaniih xayuk akkele. Tahat yabtam yoo YALLAY Mulki lehiyya» iyye.

⁸ YALLIH qangara yol obteeh; yok iyyeemih:

⁹ «Bani-adantow, takku waytaamat yab. Yoo YALLAY Mulki lehiyya kok axceemit yab. Af leh yan siibot yan seefi arbaqeeniih samliseenih.

¹⁰ Kaa abak yenen arbaqiyyat sinam qidimih bical yan. Kaat abeenih yanin duugoh cankaxi innah liliq iyya. Yi marak maabina 'yeeniih digaalooli keenit tekkeeh; tohuh akah maaduurinnon. Ruffu 'yaanam gaba kalteh.

¹¹ Seef qidimih duugol yaniih, arbaqiyyak gaba kale. Kay duugok gaba kaleenih; ummat edde qida'gidih, qida numih gabal heelon.

¹² Bani-adantow, weeqaay, boogis. A seef bical akah yanim, yi mara kee ken abbobti sela'gidiiy qida'gidi. Yi mara kee ken abbobtih qaagitaanam maraaqinnak, boogew inxic; woyyow inxic.

¹³ Yi ummat agirribuk anyo. Uma gita cabe weenik tamah keenil baahu waah an. Tahat yabtam YALLAY Mulki lehiyya.

¹⁴ «Bani-adantow, gaba uguraay takku waytaamat yab. Seef sahdat fiiruk geerah radele. A seef, sahda qidu waa seefiy mango kabuk keenit amaatuk ken yarciidu waahiyya.

¹⁵ Yi ummatat cunxo qidu waa seefi. Cankaxi innah bixiq iyya seefiy sahdah qidimih bical yanihiyyah gabat, a magaalat qawwalayla ruubam faxa.

¹⁶ Af le seefik anu axceemih, ‹Af le seefow, migdak gural ufkunay irgiggiq. Elle afkuninnaan kabul irgiq.›

¹⁷ Anu kaadu gaba aagureyyooh, naqabuk xamacca axceyyo. Tahat yabtam yoo YALLA» iyye.

BAABELON MALIKIH SEEFI

¹⁸ YALLIH qangara yol obteeh; yok iyyeemih:

^19-20 «Bani-adantow, Baabelon malik seef gabat luk edde gexu duuda namma gita fiiris. Woo namma giti akak ugtam, inki baaxo. Too namma giti elle yangale ikkel, astah coox soolis. Malik yamaatu waa waqdi akah yaaxige innah, too cooxuk caxxak teeni Rabba deqsitta magaalay Qammon deqsita mari addal akak yanihiyya fanah esces. Aki caxxa kaadu Yuudâ-rasul tan Yarusalaam magaalay kaxxa gidaara lehiyya fan esces.

²¹ Baabelon malik giti elle yangale ikkel, astah soolisen cooxih xaqul sollu axcele. Elle gexa kabu yaaxige'gidih, saami-caxxah gaysê-baxa qideleeh; Yallih aftok yaqbude duyyek, maca abam tayse axcuk, fayu essereleh, sadgatah qiden lactih tiro wagtele.

²² Migdi gabat Yarusalaam 'yaanamih asta elle tan gaysê-baxa heele. Too waqdi, ‹Tet gidaarwa edde taggalu wayta gutqeyna bicisaay, qeebil tirtirisu waa mara bical hayisa. Culmeyna edde taggalu wayta gutqeyna xayyoosa. Ballaaqe tittak bagul hayisak eded bicisa. Megdebih edde gacan boodo bicisa› 'yaanam axcele.

²³ Israayil mari, tah nummah net takku waytaama, 'yaanam maxaccinnon. Toh akah kinnim, duma aben bical amo muquk yeneenimih sabbata. Takkay immay ah keenih akah warsam, aben dambi kassitaana'gidiiy antixibbixe loonum naharal elle yeexegeenih sugaana'gidi.

²⁴ Hay, taway yoo YALLAY Mulki lehiyya siinik axceemih, ‹Abba hayten dambi siinik qaddooweh. Umeynit kinnitoonum sinam inkih siinik teexege. Abba haytan abtol dambileela kinnitoonum tamixxigeh. Tohuk gexxaamah cokmih xayyoowetton. Naqboytit gabal sin heeyyo.›

²⁵ «Uma-taama kee nadaasat baye Israayil abbaw, ellecabol digaala kot edde takku wayta wakti xayyooweh.

²⁶ YALLAY Mulki lehiyya iyyaamah, ‹Qumaamat kal. Dardaarinni kalabta kal. Ahaysa dumih inni gaba kaleh; masaakiina abbootan geeleeh; abbobtih suge mari gaca mara akkelon.

²⁷ Baati temeeteh! Finqi yemeeteh! Ahaysa akah tani'nna bayseyyo. Takkay immay too baati, dardaarinnah doore num yamaatem fanah sugele. Usuk yamaatu waa saaku, too dardaarinna kay gabal heeyyo› 'yaanam iyya.

QAMMON RASU KEE SEEFI

²⁸ «Bani-adantow, takku waytaamat yab. Ama Israayil mara xaafa Qammon marak, yoo YALLAY Mulki lehiyya axcem, keenih waris. ‹Baysa seef bical yan! Qiduuy cankaxi innah bixiq iyyuh, kaa duugeenih yanin.

²⁹ Tableenim deedala wacyi. Akkele intaanam diraaba ikkal takkem hinna. Umeynit kinniton; uma taama sinimi. Ellecabo digaala siinit takkuh, kabba 'teh tan. Filla siinik edde yargiqoonu waan seef yan.

³⁰ Seef le sibah gacisa. Elle tooboken baaxol siinil ackumeyyo.

³¹ Yi naqabu siinil oobisu waa waqdi, kaak yawqe girah huuri le inna abletton. Racmattak tifa sinniih, umaane abaanamak meysite sinni marih gabal sin heeyyo.

³² Girat sin bayselon. Qabal siinik sin baaxoh addal caxitele. Wadiriik sin kassita mari maraaqa. Tahat yabtam yoo YALLA› » iyye.