Yacedkel 20 - NABUWWA KEE MALIKWA

SAHDAYTI YABTI CINA

¹ Seewah nee edde been malcinhaytô sanatak konoyhaytoh alsak tabanhaytoh ayrot, Israayil-idoola Yallih fayxi yoo esseraana'gidih, amma 'yeenih foocal yok daffeen.

² Too waqdi YALLIH qangara yol obteeh; yok iyyeemih:

³ «Bani-adantow, yoo YALLAY Mulki lehiyya axcem keenih waris» yok iyye. Keenik intaamah, «Isin akah temeeteenim, yi fayxi essertaana'gidi inna? Anu waara Dagelta kinniyooh, fayu yok essertaanam siinik mafaxa. Tah intam yoo YALLAY Mulki lehiyya» iyye.

⁴ Yalli yok iyyeemih, «Bani-adantow, a maral cokmi ab. Cokmih tuk teena keenik inxic. Ken kaxxa abbobti abak sugte uma taama ken kassis.

⁵ Keenik intaamah: YALLAY Mulki lehiyya siinik iyyaamah, Anu Israayil mara doore saaku, qahdi keenih cule. Masri rasul inni ken uybulle. Keenik exceemih: ‹Yaqkuubuk rade maraw, anu YALLAY sin Dagelta kinniyo› keenik exce.

⁶ Tohuk lakal, ‹Masrik eyyeqqa sin heeh, woo elle sugten baaxok tayse baaxoy niqmatak tanihiyyay ikoytah siinih acayu waahiyya fan sin beeyyo'mmay,

⁷ ama xeet kee cooxuk bicsen duyyey taqbudeenihiyya wonnah baaxot qida› keenik exceeh; ‹Sin Dagelta yook, Masri mari yalla axcuk yaqbude duyye maqbudinaay nadaasa isinni maabina› keenik exce.

⁸ Takkay immay yi yaabat carra mahannoonuuy; anu excem mankacisinnon. Qiday caba keenik exce gabat bicsen duyyey yaqbudeenihiyya macabinnon. Woo Masri marak kaxxih gabat bicsen duyye aqbuduk raaqeeniih, caba keenik exceemih macabinnon. Tonna-leemiik Masri elle yanin saakuuk yi naqbi le'nna ken aybulleem faxxa hee.

⁹ Takkay immay addal akak sugen marih foocal, ‹Masrik amaanah sin ayyaaqeyyo› 'yaanamal xagana keenih culeh suge. Tonna-leemiik, inni migaaqih taagah inni naqabu keenil oobisaamak wadir eedeh.

¹⁰ «Masrik ken eyyeeqeeh, bacarih tan baaxo fan ken baahe.

¹¹ Duuduse num waar akak geya'gidih, amri keenil oobiseeh, xintoh haysitoonu waan madqa keenih ruube.

¹² Ken dambik taahir abtam yoo ken Dagelta kinnim yaaxigeeni'gidiiy, tohih asta keenih takke'gidih, ‹Sabti ayro mataamitina› keenik exce.

¹³ Keenih tu gactek, bacarih tan baaxol sugen saaku kinni-way, anu aba keenik axcem cinak sugen. Yi amri kee yi xintoy duuduse marah waar teceehiyya cinak sugen. Sabti ayro xaguraanam inkinnah cineenih sugen. Tonna-leemiik too saaku yi naqbi le'nna ken aybulleem faxxa heeh, too bacarih tan baaxol elle ken baysam faxeh suge.

¹⁴ Takkay immay woo ken beyah yoo yuble marih foocal, Yalli ken bayseh 'yaanam innit cabam mafaxinniyo. Tonna-leemiik, inni migaaqih taagah inni naqabu keenil oobisaamak wadir eedeh.

¹⁵ Tohu immay too bacarih tan baaxol sugen saaku, can kee malab darah elle gexa baaxoy taysehiyyay ikoytah keenih eceeh sugehiyya keenil kalitaamal xiibite.

¹⁶ Toh akah abem, xeet kee cooxuk bicsen duyye aqbuduk, anu keenil oobise amri cineeniih, keenih oobise xinto kataatoonu cineeniih, sabti ayroh massakaxxa cineenimih keenik abe.

¹⁷ Inkitanuuk ken baysam duudak ene'mmay, bacarih tan baaxol ken baysam mafaxinniyo. Keenih xuwaaweh.

¹⁸ «Ken xayloy bacaril tenek exceemih, ‹Ama sin abbobti kataatak sugte gabak bicsen ceelo makataatina; ken xinto kaadu makataatina. Xeet kee cooxuk bicsen duyyeh ceelot, isinni nadaasa maabina.

¹⁹ Anu YALLAY sin Dagelta kinniyooh; yi amri duudusaay, yi xintol tanim aba.

²⁰ Anu YALLAY sin Dagelta kinni taaxigeeni'gidiiy tohih asta siinih takke'gidih, sabti ayro taamitaanamak xaggursuma. Too ayro yi qibaadak kalihim maabina› exce.

²¹ «Takkay immay ken xaylo kaadu yi yab cinaanam bahte. Yi amri kee yi xintoy duuduse numuh waar teceehiyya cineenih. Sabti ayro nadaasa aben. Too saaku kaadu woo bacarih tan baaxol inni naqabu keenil oobiseh ken baysam faxe.

²² Takkay immay, Israayil mara Masrik ayyaaqih yoo yuble mango baaxoh marih garil, inni migaq darraqoysam mafaxiyyooy; tohih sabbatah, ken baysaamak raaqeh.

²³ Tohuk kalah bacaril elle anih, ummat addat fixixih ken ruubaamal, aaxige waan marih fanat ken fixixisaamal xiibiteh suge.

²⁴ Toh akah abem, yi madqa cinak sugeeniih, yi amri maaqilak sugen. Sabti ayroy mataamitina keenik exce, taamitak sugen. Ken abbobti aqbuduk sugte xeet kee cooxuk bicsen duyyeh qibaadat gacen.

²⁵ Too waqdi waar akak gee waan amri kee xintoh xiina mara ken abe.

²⁶ Isinni xaylok naharsi-xaylo, umâ-yabulih xeet kee cooxuk bicsen duyyeh qibaadah arac sadgatah baahah ken abalih, yanoonay ken axcuk suge. Toh keenik akah abak sugem, abeenimik xagar keenik wacarriya'gidiiy ken Dagelta dibuk yoo kinnim yaaxigeeni'gidi.

²⁷ «Hay, bani-adantow, yoo YALLAY Mulki lehiyya kok axcem keenih waris. Ken kaxxa abbobti tohuk kalah imaan sinnat yoo elle xaafen tiya tan.

²⁸ Duma ken abbobtih cule xagana duudusa'gidih, woo ikoytah keenih aceeyyo exce baaxo fan ken bee. Takkay immay too baaxol qale able kee ayyuufa le caxa yablen waqdi, tokkel sadgat abaanam baahen. Qaydarus qeeriseeniih, qinabak bicsen kamri kaadu woo aroocal sadgatah baahen. Tonnah abak bagcarra yot culsen.

²⁹ Anu too waqdi, ‹A fayya le aroocay gexxaanahiyya macah gexxan arooca?› keenik exce. Too arooca tohuk wadir fayya le arooca deqsitak raqte» iyye.

³⁰ Tonna leemiik Israayil marak intaamah: «YALLAY Mulki lehiyya siinik iyyaamah, ‹Isin kaadu sin abbobti abak sugte uma-taama macah abtaanaah; isinni nabsi nadaasat macah culsaanah? Oson aqbuduk sugen xeet kee cooxuk bicsen duyyeh lakat macah tarden?

³¹ A saaku kinni way too duma sin abbobti akah abak sugga 'te innah, too bis le sadgat abtaanaah, keenik kaxxih isinni xaylo sadgatah girat carrissan. Tonnal isinni nabsi nadaasa abtan. Tannah tanim abba hayteenik sarra, wadir yi fayuh esseroh yol tamaaten. Waara YALLAY Mulki lehiyya kinniyooh inni migaaqal xiibita'mmay, tahak wadir tu yoo esseri sin maha.

DIGAALA KEE RACMATTA

³² « ‹Isin aki rasih maray xeet kee coox yaqbudehiyyah innah gactaanam faxxan. Toh inkinnah matakka.

³³ Waara YALLAY Mulki lehiyya kinniyooh inni migaaqal xiibita'mmay, abeh an bagcarrah gaba digga siinil heeyyom sin aysixxige. Yi milkih gacetton.

³⁴ Ama fixixih elle tanin baaxok sin bahha heeh inki aracah sin gacisu waa saaku, yi gabay qande le kee, abeh an bagcarra sin aybulleeyyo.

³⁵ Gersi ummatta aalle wayta bacari fan sin baahu waa saaku, namma inti siinik abalih siinil ackumeyyo.

³⁶ Masrik xaqul yan Siinah bacaril sin kaxxa abbobtil akah uckume innah, siinil ackumeyyo› 'yaanam iyye YALLAY Mulki lehiyya.

³⁷ ‹Gaba nagay digga siinil heeyyooh; yo'lih hayten bica akah duudussan innah siinik abeyyo.

³⁸ Yi yab cinaah anu axcem abe waa mara sin fanak ayyaaqeyyo. Away elle yanin baaxok ken ayyaaqeyyo'mmay, ahaysa Israayil rasu aduuri ken maha. Too saaku YALLA kinniyom yok aaxigetton› 'yaanam iyye.»

³⁹ YALLAY Mulki lehiyya kaadu iyyeemih, «Taway Israayil maraw, xeet kee cooxuk bicsen duyye taqbudeenim ableh ani'mmay, tamahat geytaanam ablettoonuk abbaasita. Tamahah, gexak teneeniik, yi amri duudusettoonuuh, xeet kee cooxuk bicsen duyyeh abtan sadgootak aadetton. Yi migaaqay taahirik yanihiyya nadaasa mabtan.

⁴⁰ Yi qaley taahirik tanih amol, Israayil maraw, yoo aqbudetton. Fayya le Israayil qaleh amol, Israayil mari inkih yoo aqbudelon. Too saaku sin assakooteyyooh, sadgat kee muxxo le mattaco kee taahirik tan acway gabat bahtoonu waytaanahiyya siinik oggoleyyo.

⁴¹ Isin fixixih elle sugten baaxok sin eyyeqqaay titta fanah sin gacissa heek sarra, isin teceen sadgatay yoo ruffa heehiyya akah oggole'nnah, sin oggoleyyo. Sin addal abu waamat, gersi baaxol yan mari taahirik anim yok aaxigele.

⁴² Israayil rasuy sin kaxxa abbobtih eceeyyo exceh sugehiyya fanah sin gacisu waa saaku, YALLA kinniyom yok aaxigetton.

⁴³ Abba hayten umâ-yabuli, too saaku siinih ambulleele. Isinni nadaasa elle abten inni, too saaku siinih ambulleele. Abba hayten uma taama kassittoonu waytan waqdi, isinni nabsi inqibba heetton.

⁴⁴ Inni migaaqih dacayrih abah an abtol, YALLA kinniyom yok aaxigetton. Macaay inteenik, sin uma taama kee abto elle tani'nnal sin digaale weem, yok too saaku aaxigetton. Tahat yabtam yoo YALLAY Mulki lehiyya» iyye.

GABBI-QAXAK UGUTTA GIRA

⁴⁵ YALLIH qangara yol obteeh; yok iyyeemih:

⁴⁶ «Bani-adantow, gabbi-qaxa wagga heey; gabbi-qaxat takku waytaamat yab. Gabbi-qaxat raqta garbot takku waytam waris.

⁴⁷ Gabbi-qaxat raqta garbok, yoo YALLAY Mulki lehiyya inxicca axcem waris. Intaamah, ‹Gira ruubam faxa. Too gira ku addal enna 'ya coox, kafin coox yakkuu, uyni coox yakku, carrisele'mmay, num tet mabargusa. Gabbi-qaxaak xabba haanam baaxo carrisak kilbat le kabu fan amaatele. Too girah huuri num macaba.

⁴⁸ A gira akah baruge waytam, yooy YALLAH yani ruube gira kinnim, sinam inkih aaxigele› inxic» yok iyye.

⁴⁹ Takkay immay, anu too waqdi, «YALLAW, Mulki le Dageltaw, a mari, ‹Sugay, a num kulli way addah af le yaabat ne'lih akah yaabam macaay?› yok iyyaanak, ta farmo bey yok maxcin» kaak exce.