Yacedkel 2 - NABUWWA KEE MALIKWA

YACEDKEL NABI YAKKE'GIDIH YALLI SEECO KAAH ABE

¹ Tohuk lakal, «Kee bani-adantow, ugutay sool. Koh warsam faxam liyok» iyya anay oobbe.

² Tonna luk Yallih *Roocaaniyya xagarat yok culteeh, edde soola qande yot hayte. Sarrak kaadu usuk yo'lih yaabah oobbe.

³ «Bani-adantow, Israayil mari yab yok cineeh; naqboytit yok yekkeenih yanin. Oson akak raden ken kaxxa abbobtik kaxxih, yi yab moggolaanaay; away ken fanah koo ruubah an.

⁴ Deedalak sah yi yab mayaabbaanaay yoo yaynabeenim cabeenih. Tonna'mmay yoo YALLAY Mulki lehiyya iyyem keenih warissa'gidih, away ken fan koo ruubah an.

⁵ Yi yab cinee kee oggole yakkeeni'mmay, nabi addal keenik yanim aaxigeloonuk, anu inxicca axcem keenih waris.

⁶ «Atu keenik mameysitinaay oson iyyaanamak mameysitin. Waaqex-keenan kol akke loonuuh; igixwak fanat yan num koo abeloonu'mmay, ken yab kee fooca koh ribaanamah keenik mameysitin.

⁷ Yab yaabbe mara hinnoonu'mmay, kok cinee kee oggole yakkoonay inxicaay, anu waris axcem keenih waris.

⁸ «Anu kok axcem oobbey. Ken innah yabti-cina le num makkin. Away af fakaay; anu koh aceem unxuq» yok iyye.

⁹ Too waqdi yoo fanah fakimit tan gaba ruubah ubleeh; too gabah addat kutbe elle tan arabay xambabbaqut yani uble.

¹⁰ Woo gabaa, kutbe elle tan arabay xambabbaqut yanihiyya foocal yok fakka hayte. Too arabak namma bagul inkih takku wayta xarraqa kee rooka kee booge elle tunkuttubeh ten.