Yacedkel 19 - NABUWWA KEE MALIKWA

NADAAMAH YAN WEEQA

¹ Yalli, Israayilik namma malikih nadaamah yan weeqa yok ‹Aba› iyye.

² Ku ina gibdi moltak tene. Isi baxa elle qarissem, qeebi le lubookah adda.

³ Baxak teenay qarissehii admoh elle gexu waa'nna isi gabal kaa barisse. Too lubak sahda qidak yen.

⁴ Sahda kaak too xaagu toobbeeh xagen boodot kaa yibbixen. Sanat birta kaak hayya heen; Masri fan kaa hirriigisen.

⁵ Kay ina kay qambaaliyyak niya kalla haytam fanah mango uddur raksitak sugte. Qunxa xaylok aki baxa bahha hayteeh kaa qarisse. Kaxxa lubak kaa abteh ten.

⁶ Yembeeh kaxxa lubak yekke. Lubooka lih gexam baahe; sahda qideh yakmem baahe.

⁷ Megdebwa inkih yiggiggile; magaalooli abur abeh yen. Kaak gardo yaabbeh yen mari elle yani'kkel cunxite.

⁸ Ummatta kay admoh gexxuh yakkeenimik titta geyte. Kulli kabuk gaabooweenih, kaa edde yabbixeeni'gidih, kaxxa sabak kaah qiden. Dagen boodot kaa yibbixen.

⁹ Sanat birta kaak hayya heen; birti qarit kaa hayya heen; Baabelon malik fan kaa been. Israayil fan 'kah gexe waah, kay gardo antaabbe wayta'gid, casbik addat kaa yoxeenih.

¹⁰ Buyyik xaqul tan qinabay xaylo xaltah bis luk tenem, ku inak teneh, teetik tene. Mango lee geyteemih taagah, ayyuufak mangom luk teneeh xaylok kaadu mangom xalte.

¹¹ Ludwa akak kaxxam digga le; malik caxxa akak yirgiqen. A caxa kaxxam tenbeh ten, qamburre fan guftam faxxe. Mango luud kee xexxar teetik kulli numih inti tuble.

¹² Yallak naqabuk gexxaamah, bagcarritak suge mari buxuxuk sibba tet heeniih; wonnah baaxot tet qideeni. Bacarih yan rasih kabuk amaatuk sugeh yan caacay xaylo teetik kafissa hee. Tet ludway maqar luk tene bututtukku teetik inte; kafteeh girâ-boco tekke.

¹³ Away kaadu Yallih gabak bacarih tan baaxoh addal, lee sinnih yan bakarroytal tet daabiseeniih toobokeh.

¹⁴ Caxak ludwak tewqe gira xaylo teetik selli hayte. Malik caxxa akak aben luud away mayan; maraaqinnon; 'yaanam axcuk yen. Nabi Yacedkel tama weeqay nadaamah yanihiyya yuktubeeh; kay mari mango waqdi abak yenen.