Yacedkel 18 - NABUWWA KEE MALIKWA

SAHDAYTI AKAH DIGGALSIMAM USUK ISIH ABE DAMBI

¹ YALLIH qangara yol obteeh; yok iyyeemih:

² «A Israayil rasul kulli way edde yaabaanaah missilah haysiteenih yaniinim maca maxcooy? ‹Qeero le qinabih xaylo tokmem xaleena'mmay; qeero akak tammossem xaylo› iyyaanak, tah macaay akah iyyaanam?

³ «Waara YALLAY Mulki lehiyya kinniyooh; inni migaaqal xiibita'mmay, tahaysa ta maxcot qagitah ken matablan.

⁴ Kulli numih rooci edde yanim yi gaba. Xaleena kee xaylo rooci edde yanim, yi gabah adda. Dambit ase num isih raba» iyye.

⁵ Yalli kaadu qagseh iyyeemih, «Maqaane le numuy amaanat leeh gitah tanim abahiyya yen kaa tekkek,

⁶ Israayil mari yaqbude xeet kee cooxuk bicsen duyye mayaqbuda. Woo duyye elle yaqbudeeni'gidih heen aroocal, sadgatah yusguuden saqih cado mayakma. Marin agabut fido mafaxa; wasaktut tan barrat fido mafaxa.

⁷ Sahda maduquurusa. Marin cakki mabeya. Lakqo abuuduh sinaamah yecee waqdi damaanatah luk raaqa duyye, abuuduh been duyye kaah gacsan waqdi, beeh suge duyye gacsa. Satqita mara yaskameeh, qarrade mara sarsah.

⁸ Abuuduh kaak been lakqo kaah gacsan waqdi ossotina edde mafaxa. Baatilit maasa. Yoome mara qadaalatal mekla.

⁹ Yi amri duudusaah, yi xintol tanim aba. Cakki bagul tanim tannah yan numuuy; waarele. Tahat yabtam yoo YALLAY Mulki lehiyya» iyye.

¹⁰ «Takkay immay ta num qamallih yan baxa yelleeh, too baxi sinam buubeeh, sinam qideeh,

¹¹ isi abba abe weem abeeh, xeet kee coox elle yaqbuden aracal sadgatah qidan duyyeh cado yokmeeh, marin agabut fido faxeeh,

¹² masaakiina yudlumeeh, sahda buubeeh, abuuduh tu kaak bee num damaanatah kaal cabem gacse weeh, gabat bicsen duyyey Yalla 'yeenih yaqbudeenihiyyah qibaadah heen arooca gexeeh, duyye yuqbudeeh,

¹³ abuuduh yecee lakqo gacsan waqdi ossotina edde faxek, ta num maay waarelee? Mawaara. Ta axxul le uma taamat aseemih sabbatah rabele. Too rabi usuk isih isil baahe raba deqsita.

¹⁴ «A num kaadu isi uddurul lab-baxa xale kaa tekkeeh, kay abba abah yan uma-taama abalih kay abto kataate weeh,

¹⁵ Israayil mari yaqbude duyyey gabat bicseenihiyya aqbude weeh, woo duyyeh qibaadah heen aroocal yasguuden saqih cado akme weeh, marin agabut fido faxe weeh,

¹⁶ faxe num adlume weeh, faxe numih duyye buube weeh, abuuduh tu kaak le mari damaanatah kaal cabe duyye woo abuuduh been duyye kaah gacsan waqdi gacseeh, satqita mara yoskomeeh, qarrada mara sarseeh,

¹⁷ baatilit ase weeh, abuuduh kaak been lakqo gacsan way ossotina elle faxe weeh, yi xintol tanim abeeh, yi amri duudusek, kay abba abe dambih usuk marabaay waarele.

¹⁸ Kay abbah tu gactek, sahda duquurusakaay sahda buubak suge. Baatil abak sugeeh, tonna-leemiik isih baahe dambih isih rabele.

¹⁹ «Hay, baxi abba baahe umaaneh akah diggalsime waam macaay intan siini? Kay baxi gitah tanim abakaay, anu ‹Ab› kaak excem abak, yi xintol tanim duudusak suge. Tonna leemiik usuk waarele ikkal, abba baahe dambih maraba.

²⁰ Rabi akah yaguudem, dambit asa mara. Abba baxi baaheemih madiggalsimaay, baxi abba baaheemih madiggalsima. Meqem abite num meqem geyaah, umam abe numuh umam sugta.

²¹ «Uma num dambi abitto cabba heeh, anu aba axcem abeeh, yi xinto inxicca 'tam kataatak, amaanat leeh gitah tanim abek, tonnal marabaay waarele.

²² Dumah abeh suge dambi kaah cabeyyo. Gitak tanim abeemih sabbatah waarele.

²³ Uma num rabaamah, anu maa rufto geyam siinit celta? Yoo ruffu haytam, dambik toobitaah waara num ableemi. Tah intam yoo YALLAY Mulki lehiyya» iyye.

²⁴ «Meqe num abak suge maqaane cabbaay, uma mari abak suge umaane kee taamat cule kaa tekkek, tonnal waaru waam maay takkalen? Waar hinna'mmay, woo duma abe maqaane kaak baata. Luk suge imaan cabak, yok yexxeereeh dambit aseemih sabbatah, rabele.

²⁵ «Wonnal, ‹Yalli qadaalat leh mayan› intan. Israayil maraw, ankacca yoo haay, anu abam gitah ane waytam takkaleenih immay, gitak ane sinnim sin taama.

²⁶ Meqe num abak suge maqaane cabba heeh uma taamat gaca saaku rabe kaa tekkek, akah rabem isih abe uma taamak tan teeti.

²⁷ Uma num edde suge umaane cabba heeh, amaanat leeh gitah tanim abak, meqe taama fan yuduure kaa tekkek, isi rooci catah.

²⁸ Abak sugem umaamaay dambi kinnim yismiteh, edde suge uma taamat raaqe kaa tekkek, marabay waarele.

²⁹ Hay Israayil ummatey, isin, ‹Yalli qadaalat leh mayan› intan. Israayil maraw, ankacca yoo haay, anu abam gitah ane waytam takkaleenih immay, gitak ane sinnim sin taama.

³⁰ «Away yoo YALLAY Mulki lehiyya siinik axceemih: kulli numuluuy abba hee umaanek abba heeh gidel kaal ackumeyyo. Tonna'mmay edde tanin dambik uduura. Abtan dambit isinni mabaysina.

³¹ Edde tanin uma taamak uduuraay qusba niya kee afqado haysita. Maabinay yi gabat isinni maqidina.

³² Anu nummaak siinik axceeh, anu sahdâ raba kicna Dagelta hinniyo. Toobitaay dambik endebba» iyye.