Yacedkel 17 - NABUWWA KEE MALIKWA

QAWI KEE QINAB CAXAH CEELALLO

¹ YALLIH qangara yol obteeh; yok iyyeemih,

² «Bani-adantow, Israayil marah anu taway kok axcem ceelallol keenih waris.

^3-4 Keenik intaamah, ‹YALLAY Mulki lehiyya siinik iyyaamah: Dumah yan saaku kaxxa qawiy nabam qaxa-meqe xagor leeh kaxxa galwa lehiyya tene, iyyen. Ayrok teena too qawi Lubnaan fanah haaddeeh; tokkel *sarid-caxah amol nookteeh sariidik ludda tiggile, iyyen. Sarrak woo qawi woo caxah ludda bahha hayteeh mango badaaqat elle aban baaxo fanah beyteeh; tellemmo aba mari mangom elle yan magaalal hayte.

⁵ Sarrak Israayil baaxok dariyyu beyya hayteeh; mango lee elle taniih caxa nagay elle taabuke aracal daabisse.

⁶ Taaxige dariyyi qinab caxa yekkeeh; kaxxam fayya maxcinnay, elle yani'kkel baxacah gexeeh, ambuk maacise. Ludwa akak, gubaak taaxige qawi elle tani'kke fan fayya 'te; ramiida akak baaxot addah gexxe. Mango ludwa kee ayyuufa bahte.

⁷ « ‹Tohuk kalah kaadu, kaxxa galwa kee mango xagor le qawiy masu nabahiyya temeete. Taaxige qinab caxay toobokehiyyah ramiida qusbih yemeete qawi fanah rubte. Ayyuufa kaadu woo qawi fan rubte. Toh akah abtem, a qawiy temeetehiyya mango leey duma elle tooboke aracal deedaltahiyya isih aceelem tekkele.

⁸ Takkay immay dumaak elle toobokem, lee le aracay ayyuufi nagay teetih elle yaabukeeh, meqe xaylo xaltu elle dudda aracak tene, iyyen› keenik inxic» yok iyye.

⁹ «Keenik intaamah, ‹YALLAY Mulki lehiyya siinik iyyaamah: A qinab rabe waah, dadalam maay duudaa? Naharal suge qawi ragidiik kaa masiiba'nnaa? Tooboke caxak xaylo maluuqusa'nnaa? Ludwa akak mayaggiggilaay ayyuufa akak makafsa'nnaa? A caxa ragidik siiba'gidih mango qandeh faxxintam maliiy, mango marah faxxintam mali.

¹⁰ Ubkak toobokeh immay mango saaku kafe'kal maay sugelee? Ayrô-mawqak yamaate caacay tet yaagure way, malaqaymumta'nnaa? Woo elle tani ikkel makafta'nnaa?› siinik iyya» iyye.

¹¹ YALLIH qangara yol obteeh; yok iyyeemih:

¹² «Ama yabti-cina-leela a ceelalloy baahehiyyak maqna yaaxigeenim keh ken esserey. Baabelon malik Yarusalaam fanah amma 'yeh, malik kee kay maray kay gubal abbootan luk sugehiyya Baabelon fan beem keenih waris.

¹³ Malikih ramad le num bahha heeh, kaa make waamah kaa xiibissa heeh xagana kaa'lih heeh, malik aracat kaa cabe. Mango makaaban gabat bee.

¹⁴ Toh akah abem, woo baaxoh mari wadiriik akah uguugute waah, kaa'lih haysiten bica kaal akah make waana'gidik ten.

¹⁵ Takkay immay Yuudâ-malik qeebi kaat abuh ugteeh, Masri malikih farmo ruube. ‹Mango qaskar kee faaris yoh rub› 'yaanam kaah ruube. Tonna'mmay yakkaleh ikkal elle yakkale'nnal, annah tanim aba num yasillimu maay duudaa? Yalla-kee-xagana make num maay yasillimee?» iyye.

¹⁶ «Waara YALLAY Mulki lehiyya kinniyooh, inni migaaqal xiibita'mmay, a malik Baabeloonul rabele. Macaay inteenik, malik kaa abtem, Baabelon malikiiy; kaa'luk abe xiiba kee xagana kaal makeemih sabbatah rabele.

¹⁷ Baabelon mari magaalat maroh xissen gasoosak amo kora'gidih mango mara qidaana'gidih, burtak eded bicseloonuuh megdebih edde gacan boodooda bicselon. Too waqdi Masrik agiirah tan qaskar tamaateemih, qeebil kaah tu maxiqta.

¹⁸ Abe xiiba kee Yalla-kee-xaganay heehiyya makeemih sabbatah, rike asillimi kaa mahaanay kaa qidelon» iyye.

¹⁹ YALLAY Mulki lehiyya kaadu iyyeemih, «Waara Dagelta kinniyooh inni migaaqal xiibita'mmay, yi migaaqal abeh yan Yalla-kee-xagana makeemih sabbatah, kaa digaaleyyo.

²⁰ Sahdah admoh qidan oflo kaah qideyyooh, too oflot kaa abbixeyyo. Baabelon fan kaa beeyyooh, tokkel kaa digaaleyyo. Toh kaal akah baahu waam, imaan yol heeh masuginna.

²¹ A carbit kaak mango qaskaray agiirah tanihiyya edde rabele. Rabak raqtem kulli kabul fixixih gexele. Tahat yabtam yoo YALLA kinnim too saaku aaxigelon» iyye.

YALLI YECEE NIYA

²² YALLAY Mulki lehiyya iyyaamah, «Anu innih woo xexxaarin sariidik amok ruqa irgiqqa heeh beeyyooh; amo xer qalel daabiseyyo.

²³ Israayil rasul tan amo xer qalel daabiseyyo. Tokkel dadleleeh, ludwa baaheleeh xaylo xalele. Kaxxam qaxa baahele. Mango kimbir amol teetik silaalitele.

²⁴ Baaxol yan coox inkih YALLA kinniyom yok aaxigele. Xer caxa targiqeeh; ux caxa tayxeerem yoo. Anxaxinuk sugte caxa kafsaah; kafinuk sugte caxa anxaxxoosem yoo. Tahat yabtam yoo YALLA. Abeyyo excem aba Dagelta kinniyo» iyye.