Yacedkel 16 - NABUWWA KEE MALIKWA

IMAAN DAGO YARUSALAAMA

¹ YALLIH qangara kaadu yol obteeh; yok iyyeemih:

² «Bani-adantow, Yarusalaam abteh tan umam-yabuli teetil qaddos.

³ Teetik intaamah, ‹YALLAY Mulki lehiyya kok iyyeemih, « ‹Elle toobokem, Kanqaan rasuuy; abba kok Amoorâ-numuuy; ina kok Ciita deqsita marih barra.

⁴ Tooboke saaku cundub koh yargiqe num magennito; koo kaqlisa num magennito. Qasbot xagar koh uskutta heeh, xagaral saro kok hayya haa num magennito.

⁵ Tahak tu koh abaah, koh xuwaawa num magennito. Tooboke saaku kok sakkiteenih; tonna-leemiik baaxot koo qidda heenih sugen.

⁶ « ‹Anu gita gexa waqdi, isi qabalat abrakuk yoh sugte. Xagar inkih ku qabalat kok bayeh sugeh immay, rabak koo cateh.

⁷ Yaysubuken caxah innah, meqe'nnal koo qarise. Dadalteeh tembeeh kaxxa qax-maqaane bahte. Kaqooni kot keenah innah gace. Qummi-xagor kok yoobokeh yen. Takkay immay qasunuk teneeh; xagaral saro luk manannito.

⁸ « ‹Sarra aki saaku wokkek gaca waqdi, dadalteeh baxuwwa tekkem kok uble. Qasunuk kok yan xagaral inni saroh exxa koh hayya heeh, koo kiciyyom koh warseh. Tokkel kol digibeyyoomuh qahdi koh culeeh; koo abiteeh yim tekke. Tahat yabtam yoo YALLAY Mulki lehiyya› iyye.

⁹ «Tohuk lakal xagaral luk sugte qabala kok leet kaqlissa heeh, xagar zeytit (saliidit) uskuttu koh hee.

¹⁰ Dilwa le kamesiy qax-meqe kot heeh; xagar meqe addaytih kabel kot hee. Qax-meqe musaan amol haysitta'gidih, koh ecee. Cariirik bicsen sartanat koo hee.

¹¹ Qax-meqe bila koh heeh; gabat lakqo koh heeh, fillat dahab koh hee.

¹² Sanat hayta dumam kee aytit hayta duyye kee amot hayta duyye koh baahe.

¹³ Mango bilay dahab kee lakqok bicseenihiyya luk ten. Talbi-qaala kee cariirik bicsen sartanay mango dilwa lehiyya luk ten. Adda meqe darok aben gaqambooy, malab kee caxâ xaylok bicsen *zeyti ku maaqoh sugte. Qaxah wir axcuk teneeh; tohih sabbatah malikáh innah gacte.

¹⁴ Kaxxam qaxa koo eymeeqeeh; tonna-leemiik litoh tan kaxxa qax-maqaaneh mango baaxol koo yoobben. Tahat yabtam yoo YALLAY Mulki lehiyya» iyye.

¹⁵ «Takkay immay a litoh tan qaxa kee migaq-gexxo isik ubulla hayte waqdi, kol amaatinnaan numih mareyta takkem bahte.

¹⁶ Isi sartanak tu takkem beyya hayteh, isi aroocay qibaada elle abtahiyyat bilqah hayte. Tokkel xiiqareh-xiinah innah, kulli num lih dalwa abte. Tannah tanim takkem faxxiimak mananna.

¹⁷ Anu koh ecee lakqo kee dahab beyya hayteeh, lab-numih-ceeloy yaqbudeenihiyya akak bicsissa hayteeh woo ceeloh mareyta tekke.

¹⁸ Woo anu koh ecee dilwa le sartan bahha hayteeh, woo lab numih ceeloh bagul hayte. Anu koh ecee caxâ xaylok bicsen *zeyti (saliid) woo ceeloh sadgatah teceeh; anu koh ecee qaydarus wokkel sadgatah rubte.

¹⁹ Adda meqe darooy zeyti kee malabay anu koh eceehiyya xeet kee cooxuk bicsen duyyeh sadgata axcuk tecee. Tah intam YALLAY Mulki lehiyya.

²⁰ «Yoh xalte xaylok say-urru kee lab-urru xeet kee cooxuk bicsen duyyeh sadgatah tecee. Yol luk sugte imaan cabtem koo maxiqinnaay;

²¹ yi xaylo beyya hayteh, xeet kee cooxuk bicsen duyyey taqbudeenihiyyah sadgatah tusguude.

²² A dalway edde tanihiyya, duma qunxuk ten saaku elle sugte'nna kassite koo kalteh. Qunxuk ten saakuy isi qabalat abrakuk sugtehiyya elle sugte'nna kase cinteh» iyye.

YARUSALAAM MANOOY, XIIQAREH XIINA BIS LE

²³ «Yoo YALLAY Mulki le kok axceemih, ‹Woyyow! Kot takku waytaamow! Ta axxul le umaanet assek wadir,

²⁴ kulli gitih xaqul too duyye elle taqbude arooca hayya hayteeh;

²⁵ luk sugteh tan qaxa nadaasat isik bayisse. Amaatinnaan num lih dalwitak, qaxa isik bayisseh.

²⁶ Woo dalweenitih yan Masri maray cuggaaneh kok yanihiyya lih dalwa abak sugte. Dalwa abak akah sugtem, anu anqibe'gidi.

²⁷ «Tonna leemiik koo digaaluuy, ku baaxoy barkat lehiyya koo waysiisuh ugteh en. Koo niqba *Filistiin maray atu abtah tan umâ-yabuli xiqe waahiyyah gabal koo hee.

²⁸ Assuuriyah mara lih kaadu dalwa abte. Ken mareytá tekke'mmay, koo cayisoonu yeffereenih.

²⁹ Baabelon maray badaaqat abahiyyah mareytáh sugte. Sugteh immay, too mari kaadu koo macayisinna.›

³⁰ «Yoo YALLAY Mulki le kok axceemih: ‹Kaxxam walfitak, wacarriye wayta xiiqareh-xiina akah abta'nnah, wacarriyih taniimit asse.

³¹ Giti elle aninnaanih xaqul, xeet kee cooxuk bicsen duyye elle yaqbuden arooca hayteeh; tokkel dalwa abte. Takkay immay abta dalwal, timixxige xiiqareh-xiina akah abta'nnah, lakqo elle mabennito.

³² Isi baqala cabba hayteh marin mara lih dalwa abta barrah caalatat gacte.

³³ Duma xiiqareh-xiinah mareytit lakqo acayuk ten. Koh tu gactek isih keenih tecee. Kulli kaalibik sahda kol temeeteeh; mareytit kok takke'gidih, guqul keenih acayuk sugte.

³⁴ Tonna-leemiik atu xiiqareh-xiina elle tani'nnal tan barra hinnito; rikeek tan xiiqareh-xiina kinnito. Koo faxxam matanaay, atu isih ken lakat tarde. Koh yeceen lakqo matanaay, atu sinaamah tecee. Rikeek tan kacba kinnito.›

YARUSALAAMAL YEKKE YALLIH COKMI

³⁵ «Tonna'mmay Yarusalaam kacbay, YALLI kok iyyam oobbey.

³⁶ «YALLAY Mulki lehiyya kok iyyaamah: Sara isik kalla hayteh, isi mareytit kee woo Yalli niqba xeet kee cooxuk bicsen duyyey taqbudehiyyah isi xagar teceeh; too xeet kee cooxuk bicsen duyyeh sadgatah isi xaylo qidde.

³⁷ Tonna-leemiik duma mareytiitih kok suge marak niqibtom kee kicintom inkih, bahha heeh foocal kok xayyoyseyyo. Too mari maraasiyya koo heele. Too waqdi oson koo elle yablen ikkel, qasunuk koo cabeyyo.

³⁸ Abtah tan dalwa kee sahday qiddahiyya kok weeyyo. Abah an bagcarrah rabi digaalah koo digaaleyyo.

³⁹ Ken gabat koo heeyyooh, xeet kee cooxuk bicsen duyye elle aqbuduk sugte arooca kee, mareytáh koo elle luk sugen aroocay fayya le ikkel tanihiyya aggiggilelon. Xagarat lito sartan kee bila kok kalla heenih, qasunuk koo cabelon.

⁴⁰ «Xeetit koo qidaah, seefit xagar kok kuramkuru waa mara kot ugselon.

⁴¹ Buxa kok carriselon; kot takku wayta digaalak agbi asseleeleqele. Tonnal abtah tan dalwa koo cabsiiseyyo. Mareytiitih dalwah mekeltah tan lakqo tonnal koo waysiiseyyo.

⁴² Tohuk lakal abah an bagcarrat xabbacooweyyooh; aysinu cabeyyooh; sahha axceyyo.

⁴³ Qunxuk ten saaku koo elle abbaxuk suge inna hawwenteh. Abteh tan uma taamak gexxaamah, naqbi yot hee. Tonna-leemiik abba hayte umaaneh akah diggalsinta innah kok abe. Abba hayte uma-taama koo maxiqinnay, wadir dalwa edde osisse. Tahat yabtam yoo YALLAY Mulki lehiyya» iyye.

BAXAAY INA BIS LE

⁴⁴ Yalli iyyeemih, «Yarusalaamey, sahda missilah koo haysitte. Kok iyyaanamah, ‹Baxá lem inah caala› kok iyyan.

⁴⁵ Nummah, atu isi inah baxá tekke. Ku ina isi xaylo kee baqala niqibuk ten. Ku maqanxiixiy kaadu isi baqolti kee xaylo niqbahiyyah bis lito. Ku ina Ciitâ barrak teneeh; ku abba Amoorâ numuk ten.

⁴⁶ Barah kok naba ku maqanxáy Samaariya deqsittahiyya kee tet xaylo dabaaqah-elle-tanim, atu elle tani'kkek kilbat le kabut raaqa araca. Kok qunxa maqanxá kee dariifal tan gaandoodiy gabbi-qaxat kok raqtahiyya, migaaqah Sodom deqsitta.

⁴⁷ Atu kaadu ken raat katatteeh; oson abak sugen uma taamat asse. Atu uma taama qimbissem qusba saaku'mmay, keeniy dumaak abak sugehiyyak lafissa hayte.

⁴⁸ «Waara YALLAY Mulki lehiyya kinniyooh; inni migaaqal xiibita'mmay, ku maqanxá Sodom kee tet dariifal tan gaandoodi, koo kee kok dariifal tan gaandoodi abtem maabinnon.

⁴⁹ Tet kee tet xaylo ken dudda maaqo geyyaay amaanah gacca iyyen waqdi, kaxxa kaxxiina xagarat keenik gacte. Takkay immay masaakiina kee tu sinni marah cato abak masuginnon.

⁵⁰ Kaxxiina luk yeneeniih anu niqbiyom abak yenen. Tohih sabbatah, atu akah tuble'nnah, bayissa ken hee.

⁵¹ «Samaariyah tu gactek, dambik atu bahteemik garab maabinna. Teetik fula kaxxa dambit assem koo. Koo kee ken abto tittal wagga haan waqdi, oson ku garil tu abe weenih gide.

⁵² Tonna-leemiik isih abte qaybih isih lakmisetto. Ku dambi kaxxa dambi kinnuk, ku maqanxix abem kee ku qaybi tittal wagga haan waqdi, ku dambih garil ken dambi foyya. Ku maqanxix ku garil tu'qellat sinni marak loowimem abaluk, abte umaanet wacarriyaay; isih abte qaybih lakmis» iyye.

SODOM KEE SAMAARIYAH QUSBAANE

⁵³ Yalli iyyeemih, «Sodom kee tet dariifal tan gaandoodiiy Samaariya kee tet dariifal tan gaandoodit barkat hayu waa ayro, Yarusalaamey, kot kaadu barkat heeyyo.

⁵⁴ Abteemit wacarriyetto; Sodom kee Samaariya maray ku innah dambih ane waak sugehiyyal rooci aduurele.

⁵⁵ Nammeyhaak gaddaleela akkeloonuuh; koo kee kok dariifal tan gaandoodit kaadu barkat heeyyo.

⁵⁶ Kaxxiinitak ten saaku, Sodomul anqaasak sugte.

⁵⁷ Abte umaane kok qaddowtaamak dumal, keenil asaaluk sugte. A saaku atu kaadu miduh elle yasuulen sahdaytó tekke. Edom kee Filistiin mari elle yasuulem koo. Ku deraafil yan mari koo bursuta.

⁵⁸ Abteh tan umâ-yabulik gexxaamah, celta digaalah diggalsimtam kol tan. Tahat yabtam yoo YALLA» iyye.

WAARA QAHDI

⁵⁹ «Yoo YALLAY Mulki le axceemih, ‹Abeyyo intem duuduse cinteeh; titta elle geynem yol makteemih sabbatah, koo celta digaalah koo digaaleyyo.

⁶⁰ Yoh tu gactek, qunxuk ten saaku rihimih koh cule qahdi kol mamaka.

⁶¹ Kaxxa maqanxix kee qunxa maqanxix xayloh innal kol gacisu waa saaku, duma abtem kassa haak wacarriyetto. Duma haysinne bical exceh suge weemiiy, away kok axcem, ken ku xaylo abeyyom koh warsa.

^62-63 Ko'lih haysite qahdi wadir aqusbuuseyyo. Too saaku abba hayte umaane koh cabeyyo. Koh tu gactek, abba hayte umaane isik aaxaguk tut mayabta. Too saaku YALLA kinniyom yok aaxigetto. Ahat yabtam yoo YALLAY Mulki lehiyya» iyye.