Yacedkel 14 - NABUWWA KEE MALIKWA

YALLI DUYYE YAQBUDEENIMIL SADUH GACE

¹ Israayil idoolak tu'baxa yakke mari Yallih yab yoo esseraana'gidih, yol yemeeteenih foocal yok daffeen.

² Too waqdi YALLIH qangara yol obteeh; yok iyyeemih:

³ «Bani-adantow, ama marih kalbi, gabat bicsen duyyeh qibaadat yufkuneh yaniih; too duyyey dambi lem xalta isinni misinkacal heenih yaniinik, anu tu yoo esseri ken maha.

⁴ «Taway anu keenik axcem keenih waris. Intaamah: ‹YALLAY Mulki lehiyya siinik iyyaamah: Faxe Israayiliiti isi kalbit gabat bicsen duyyeh qibaadat yufkuneeh; too duyyey dambi lem xalta isi misinkacal hayyaay, wadir nabil fayuh yemeetek, tohul yok geyoonu waan raddi keenih waris. Too gabat bicsen duyyey yaqbudeeni manga takkeh gide, umaanek keenil baaheyyom keenih waris.

⁵ Toh akah abam, yol akah yaduuren innah keenik aba'gidi. Israayil mara yok teyxeerem, oson yaqbuden xeet kee cooxu.

⁶ «Tonna-leemik Israayil marak, ‹YALLAY Mulki lehiyya siinik iyyaamah: Ama qaybik tan xeet kee cooxuk bicsen duyyeh qibaada cabba haay yol uduura› keenik inxic.

⁷ «Israayil marak numuk teena takku, hinnay kaadu ken addat yan allî-baaxoh marak numuk teeni yoo cabba heeh, isi kalbit gabat bicsen duyyeh qibaadat yufkuneeh, too duyyey dambi lem xalta isi misinkacal hayyaay, wadir nabil fayuh yemeetek, yooy YALLAH yani, tohul kaal gacisu waam innih kaa aybulleeyyo.

⁸ Usuk abaamal saduh anim kaa aybulleeyyo. YALLA kinniyom yok elle taaxigeeni'gidih, ummat addak kaa ayyaaqeyyo. Ta umaane kaat akah tekkem, Yallak yemeete cokmi kinnim, kulli mari aaxigeleeh; kaat tekkem missila akkele.

⁹ «Nabuwwak tiyak teeni aylahitta 'yeh, akke waytaamat yaabe kaa tekkek, kaa aylahissem yoo kinnim ixiga. Tonnah yan nabi Israayil ummatih addak ayyaaqeyyo.

¹⁰ Woo nabi kee kaal fayuh yemeete mara inkih, inki digaalah digaaleyyo.

¹¹ Toh akah abu waam, Israayil mari yok axxeere waa'gidiiy, dambik gexxaamah isinni nabsi nadaasa abe waana'gidi. Tahaysa oson yi mara akkeloonuuh; anu ken Dagelta akkeyyo. Tahat yabtam yoo YALLAY Mulki lehiyya» iyye.

NUUCUUY, DAANIYEL KEE AYYUUBU

¹² YALLIH qangara yol obteeh; yok iyyeemih:

¹³ «Bani-adantow, ayyuntak teeni yol yaaminem cabba heeh dambi le taamat ase kaa tekkek, tonnal gaba keenil heeyyooh, maaqo akak geyak sugen arooca keenik bayseyyo. Qulul ruubeyyooh; saq kee ummat akah tambaxe'nnah abeyyo.

¹⁴ Too saaku Nuuc kee Daaniyel kee Ayyuub sugta way, ken maqaane ken cate waytek, a marah tu xiqak mananna. Tahat yabtam yoo YALLAY Mulki lehiyya» iyye.

¹⁵ «Hinnay kaadu, baaxoy alluwwah giddinaamak foyyah raqtahiyya gital num akah angayye waa'nnah, alluwway sinam qiddahiyya ruube yoo tekkek,

¹⁶ woo sidiica num sugaanamah, waara YALLAY Mulki lehiyya kinniyooh, inni migaaqal xiibita'mmay, isinni rooci akke waytek, isinni xaylo cataanam duudak manannon. Baaxo foyyah raqqa axcuk ten.

¹⁷ «Hinnay kaadu, too baaxol carbi ruubeh, saq kee ummat akah tambaxe innah, kullim duufut beya silac ruube yoo tekkek, too saaku

¹⁸ woo sidiica num sugaanamah, waara YALLAY Mulki lehiyya kinniyooh, inni migaaqal xiibita'mmay, isinni rooci akke waytek, isinni xaylo cataanam duudak manannon.

¹⁹ «Hinnay kaadu, abeh an bagcarrah sahdat tabta dalka woo baaxol ruube yoo tekkeeh, too dalka ummat kee saq selte kaa tekkek,

²⁰ too saaku woo sidiica num sugaanamah, waara YALLAY Mulki lehiyya kinniyooh, inni migaaqal xiibita'mmay, lon maqaanet sinni rooci faxeemi'mmay, isinni xaylo cataanam duudak manannon» iyye.

²¹ YALLAY Mulki lehiyya iyyaamah, «Yarusalaam mara kee ken midir edde baysa'gidih, inni kaxxa digaala keenil ruubeyyo. Carbiiy qululuuy alluwwa kee dalka keenit ruubeyyo.

²² Too marak dago agabu kee labhay too digaalak raqqa 'tehiyya, sin fan amaateloonuh; nagay ken cubbussan waqdi, uma mara kinnoonum keenik abletton. Too waqdi Yarusalaam marat abe digaala celta digaala kinnim elle aaxigetton.

²³ Abba heem akah abeh meqe sabab too saaku yok aaxigetton. Tahat yabtam yoo YALLAY Mulki lehiyya» iyye.