Yacedkel 13 - NABUWWA KEE MALIKWA

YALLI DIRAB-NABUWWA ILAAQE

¹ YALLIH qangara yol obteeh; yok iyyeemih:

² «Bani-adantow, a isi amok eyyeqqa heeh, ‹Nanu wacyi nuble› iyya maray nabuwwa akak iyyaanak intaamah, ‹YALLI siinik iyyam oobbeya› keenik inxic.

³ Yoo YALLAY Mulki lehiyya axceemih: able ween wacyi ‹Nuble› iyyan. Isinni amok yeyyeeqen yaabal, ‹Woh akkele ah akkele› iyyan. Oson duquuraay; kenim tekkeh!

⁴ Israayil maraw, isin nabuwwah liton mari wakarway abuuruh raqte magaalal tanihiyyah gide ikkal, xiqaanam malon.

⁵ Tiddigille gidaarwa siinih madacrisaanaay; woo gidaarwa nammeyhaak maxisan. Yallih-carbi siinit yakku waa saaku, kalalu siinih mayakkan.

⁶ Oson ‹Nubleh› iyyan wacyi, dirab wacyi. ‹Akkele› iyyaanam, takku waytam hinna. ‹Siinih warisnam, YALLIH farmo› siinik iyyan. Toh keenik diraabaay; siinih warsaanam yi farmo hinna. Isinni amok yeyyeeqen yab akkelem keenit celta.

⁷ Anu keenik axceemih: Ama ‹Nubleh› intan wacyi, dirab wacyi. ‹Sarrah woh akkeleeh ah akkele› akak intaanam kaadu, takku waytam hinna. ‹Ah neh warissem YALLA› intan. Diraaba siinik, anu siinih warsem hinna, siinik axceh an.

⁸ «Tonna-leemik YALLAY Mulki lehiyya siinik iyyaamah, ‹Isin edde yabtan yab diraabaay; «Nubleh» intan wacyi tublen wacyi hinna. Tohih sabbatah tahal saduh siinil an› siinik iyya.

⁹ Able ween wacyi ‹Nubleh› iyya maray sahda makot beyahiyyaw, sin digaalu waah an. Isinni baaxo fanah mataduuran. Yi mari mabloh maro hayu waa saaku, wokkel mageytimtan. Israayilih yooboke marih loowot magactan. Anu YALLA kinniyom too saaku yok aaxigetton» iyye.

¹⁰ YALLI kaadu iyyeemih, «A nabuwwa akak iyyan mari, ‹Umam matanaay; baaxo amaana› axcuk, deedala amaan yanim sinaamat celsiisan. Tonna'mmay amaan mayana. Yi mari bokoke gidaar xisaanaah; too nabuwwa akak iyyan mari bagul akak noora haan.

¹¹ Ama nabuwwa akak iyyan marak, ‹Kaxxa roobuy arroqle lehiyya ruubeyyoh; caaco ruubeyyo. Too rob kee caaco gidaar siinik aggilele› keenik inxic.

¹² Gidaar addigillele. Too waqdi, ‹A gidaaral hayten noora maca xiqteeh?› 'yaanam siinik axcelon» iyye.

¹³ YALLAY Mulki lehiyya iyyaamah, «Anu bagcarrita saaku, sin baysa'gidih kaxxa caaco kee roobuy arroqle lehiyya ruubeyyo.

¹⁴ Isin noora elle hayten gidaar bayseyyooh; gidaarak guba rakiiboh heen xeet qasunuk raqqa 'yam fanah, bututtukku heeyyo. Gidaar rada waqdi, isin addat akak bayetton. Anu YALLA kinniyom too saaku yok aaxigetton.

¹⁵ Gidaar kee gidaaral noora hee mari yi qande le'nna ablele. Too saaku, ‹Gidaar kee gidaaral noora hee mari gaba kaleh› siinik axceyyo.

¹⁶ Ane waah yan amaanah ‹Amaan yani› axcuk, Yarusalaam maral dirab yecee mari too saaku masuga. Tahat yabtam yoo YALLAY Mulki lehiyya» 'yaanam yok iyye.

YALLI, DIRAB-NABUWWAH YAN AGABUH RUUBE FARMO

¹⁷ Yalli yok iyyeemih, «Bani-adantow, ama ku marih addat yan agabuy isi amok eyyeqqa heeh, ‹Woh akkeleeh ah akkele› iyyak, tamah essecekkey.

¹⁸ Keenik intaamah: YALLAY Mulki lehiyya siinik iyyaamah, « ‹Kee agabow, sinim tekkeh! Amot malmaalan sara sinaamah bicissan. Carayat haan kitooba sinaamah gaaxxan. Toh akah abtaanam, woo marih roocik isinnih faxxeenim abtoonu duddaana'gidih abtan. Isinnih faxxeenim edde geytaana'gidih, yi ummat rabak cattaanam kee qiddaanamih dudda taalleenim faxxan.

¹⁹ Inki gaba kibe wayta gabru deqsitta daro akke kee, hinnay kaadu, gaqamboytâ-rike geytaana'gidih, sahdak foocal qaybik yoo qiddan. Yi maray sin yab numma yakkaleenihiyyal dirab acayuk, rabi akah aguude waa mara qiddaanaah, rabi akah yaguude mara cabtaanah. Tonnal qaybik yoo qiddan› siinik iyya» iyye.

²⁰ Away uxih YALLAY Mulki lehiyya iyyaamah: «Sahda raba kee mano isinni gabah gacissaana'gidih, carayat haytan sicri duyye niqibyoh an. Isin kimbir oflot akah qidan innal, too duyyet sinam tabbixen. Carayak siinik irgiq-irgiq heeh, baaxot siinik qideyyooh; inni mara sin gabak currih ayyaaqeyyo.

²¹ Ama moyyat malmalten sara siinik wonnah qidda heeh, yi mari wadiriik sin gubat akah raaqe waan innah, currih ken ayyaaqeyyo. Too waqdi YALLA kinniyom yok aaxigetton.

²² «Yi maray cakki gital yaniih, anu umam elle baaham faxe waahiyyak niya taggilen. Uma taamat yan mari, woo uma taamak eweqqa 'yeh meqe manoh xiinaanamak, adaf keenil takken.

²³ Tahaysa able wayten wacyiy ‹Nubleh› intaanahiyya kee, akke waytu waytaamay ‹Akkele› axcuk dirab akak teceenihiyyah dirab gaba kaleh. Anu YALLA kinniyom yok elle taaxigeeni'gidih, inni mara sin gabak currih ayyaaqeyyo» iyya.