Yacedkel 12 - NABUWWA KEE MALIKWA

NABI SEEWAH BEYAN NUMIH INNAH GACE

¹ YALLIH qangara yol obteeh; yok iyyeemih:

² «Atu fanat akak tanim, yabti cina le maraay; makoleela kinnoonumih sabbatah, abalih mayablaanay aabbih mayaabban.

³ «Tonna'mmay, bani-adantow, seewah beyan mari akah aba'nnah, ifaanih akah duyye bicsitay safarah ugut. Away elle tan arac cabba hayteh gersi arac fanah gexxa waqdi, sahda inkih koo tabalay inxic. Ama makoleela koo table waqdi, cedeloonum takkeh.

⁴ Kulli num koo akah yable'nnah, laqo-ifaanih baaxo cabah seewah gexu waa numih innah, duyye bicsit. Bari yakke waqdi baaxo cabah seewah gexa numih innah, safarah bicaay; sahda koo akak table ikkek ugutay gex.

⁵ Sahda koo table waqdi, qarik gidaar boohassa haay; duyye gabat hayya haay too boohaak eweq.

⁶ Gexxa waqdi, sinam koo akah table innah, duyye sunkul hayyaay; baaxo akah able wayta innah, foocal gaba hayya haay, diteh addat gex. Tamah abta waqdi, tamah, Israayil maray koo yabalu waahiyyah garci-kaloot akkele» yok iyye.

⁷ Sarrak anu too Yalli aba yok inxicca 'yem abe. Too ayro seewah beyan mari gexa waqdi akah aba'nnah, duyye bicsitta hee. Carra kaadu bari radam faxa waqdi, gidaar inni gabat boohassa heeh akak ewqe. Kulli num yoo elle yable'kkel, duyye sunkul hayya heeh foore.

⁸ Ciggilta ayro YALLIH qangara yol obteeh; yok iyyeemih:

⁹ «Bani-adantow, Israayil mari, ‹A num abam macaay?› kok iyyaanah yaniinik,

¹⁰ yoo YALLAY Mulki lehiyya taway kok axcem, anu kok elle axce'nnal inxic. Anu ah akah abem, Yarusalaamal abbah yan num kee wokkel tan Israayil marat takku waytaamih ceelallo.

¹¹ Atu abtem, keenit takku waytaamih ceelallo kinnim keenih waris. Casbi-gurral ken abbaxuk, marin baaxo fan seewah ken beelon.

¹² Abbah keenik yan num duyye sunkul hayya heeh yasillime'gidih, kaah heen boohak barat kudeh maacisele. Foocal gaba hayya heeh gexele. Gexa'kke isik mayabla.

¹³ Anu too waqdi inni oflo qideyyooh, too oflot kaa abbixeyyo. Tokkeek Baabelon kaa beeloonuuh; tokkel elle yani'kke isik able'kal rabele.

¹⁴ Kay taamak abbobtih yen maraay, kaat dacayrih yan mara kee, kay qaskar kulli ikke fixixih ruubeyyo. Ken qidu waa mara kaadu lakat keenik ruubeyyo.

¹⁵ «Ummat addat ken ruubu waah, aaxige waan marih fanat ken fixixisu waa saaku, YALLA kinniyom yok aaxigelon.

¹⁶ Ken yabbixu waa qeebi kee qulul kee dalkak dago mara keenik cateyyo. Toh akah abu waam, rabak raqte saabo duma abak sugeenim uma taama kinnim, fanat ken akah fixiixise marah warsaana'gidi. YALLA kinniyom too waqdi yok aaxigelon» yok iyye.

CUNXOH AXAXITA NABIH ASTA

¹⁷ YALLIH qangara yol obteeh; yok iyyeemih:

¹⁸ «Bani-adantow, maaqo takme waqdi, axaxitak ukum. Lee taaqube waqdi, kaadu cunxoh axaxitak uqub.

¹⁹ Taham Israayil maray away isi baaxol yanihiyyat takku waytaamih ceelallo takke'gidih ab. Israayil mari yaaqubeeh yakme waqdi meysih axaxitele. Sahdah cakkiy yaaxigeenihiyya maloonuuy; edde yaniinim kulli way baatili kinnuk, oson elle yanin baaxo suge wayteh innah gacele.

²⁰ Away ummat kibuk elle tan magaalooli abur akkele. Inkih tan baaxo num sinniih lac sinni bacari akkele. YALLA kinniyom yok taaxigoonu waytaanam, too saaku, keenik inxic» yok iyye.

MEQE MISSILA KEE YINQIBEN NABIH QANGARA

²¹ YALLIH qangara yol obteeh; yok iyyeemih:

²² «Bani-adantow, Israayil mari, ‹Warsen wakti tatreeh; akkele iyyeenimik tu makkina› akah iyyam macaay?

²³ Keenik intaamah: YALLAY Mulki lehiyya tohumuk iyyam, ah teeti. ‹Ahaysa ama yab gexak maraaqa› iyya. ‹Wakti xayyooweeh, akkele iyyeenim akkele› keenik inxic» yok iyye.

²⁴ «Ahak wadir able ween wacyi nubleh iyya mara kee, akke waytu waytam akkele inta nabuwwa Israayil ummattah addat matablan.

²⁵ Yoo YALLAY Mulki lehiyya abu waamat yaabeyyooh; inxicca excem muudurruttay akkele. Makoleelay, siinik abeyyo excem abeyyooh; isin addunyal anih, akah takke'nnah abeyyo. Tahat yabtam yoo YALLAY Mulki lehiyya› iyye.

²⁶ YALLIH qangara yol obteeh; yok iyyeemih:

²⁷ «Bani-adantow, Israayil mari, ‹Atu-tuble-wacyi xer saaku anguddubele› axcuk yaabaana'mmay,

²⁸ yoo YALLAY Mulki lehiyya keenik axcem keenih waris. Keenik intaamah, ‹Anu inxicca excem akkeleeh; muudurruttay xayuk akkele› keenik inxic. Tahat yabtam yoo YALLAY Mulki lehiyya kinni» iyye.