Yacedkel 11 - NABUWWA KEE MALIKWA

YALLI YARUSALAAMAL COKMI ABE

¹ Yallih *Roocaaniyya baaxok ugussa yoo hayteh, ayrô-mawqa le kabut raqta YALLIH Qibaadah-Qarih culma fanah yoo bahte. Tokkel culmak xaqul labaatanna kee koona num uble. Too labaatanna kee konooyut Qaddúr-Yaadanya kee Banaayá-Falatya deqsitta abbobti yan mari edde yen.

² Too waqdi Yalli yok iyyeemih, «Bani-adantow, uma malah malissaah, a magaalah addal uma fayuh sinam fayissam tama mara» yok iyye.

³ «Oson iyyaanamah, ‹Qarwa xisan wakti uxih maamaatinna. Yarusalaam maaqo elle alaysan buutih gideey; nanu tet addal tan cadoh bis lino. Takkay immay buuti akim raqatuh girak reebu neh akkele› iyyan.

⁴ Bani-adantow, keenit takku waytam keenih waris» yok iyye.

⁵ Tohuk lakal YALLIH *Roocaaniyya yol obte. YALLI Israayil-ummatah warisu waa farmo yol ruube. Yok iyyeemih, «Israayil ummatak intaamah, ‹YALLI iyyaamah: Kee ummatey, isin edde yabtan yab kee edde malissan malak garcik maan.

⁶ A magaalah addal mango mara qiddeeniih; isin qidden marih raysi magaalâ gitittel kibuk yan.

⁷ « ‹Tonna-leemiik yoo YALLAY Mulki lehiyya siinik iyyaamah: nummah Yarusalaam maaqo elle alaysan buuti kinnihik, woo alaysaanam, isin a magaalal qidden marih raysitte› keenik inxicey; ‹A magaalal ahaysa magactan; sin akak ayyaaqeyyo.

⁸ Seefik meysittaana'mmay, seef le maray qeebi siinit abu waa siinit ruubeyyo.

⁹ Yarusalaamak eyyeqqa sin heeh, marin marih gabal sin heeyyo. Raba siinil uckumeh an.

¹⁰ Seefit rabettoonuuh; Israayil cuduudul sin digaaleyyo. Too saaku anu YALLA kinniyom kulli num aaxigele.

¹¹ Buutit tan cado girak nagay elle raqta innal, a magaala siinih reebu matakka. Israayil cuduudul sin digaaleyyo.

¹² Too waqdi anu YALLA kinniyooh; isin kaadu cuggaaneh siinik yan marih xinto kee abto katayak yi amri cinteenih, anu siinih hee xinto cabba hayteenim aaxigetton› keenik inxic» yok iyye.

¹³ Anu too farmo keenih warsa waqdi, Falatya baaxol dub iyyeh rabeh. Anu kaadu baaxok bagul gomboh radeeh, «YALLAW, Mulki le Dageltaw, Israayilik raqte saabo inkih selta'nnaa?» axcuk anay fayya haak yaabe.

¹⁴ YALLIH qangara yol obteeh; yok iyyeemih:

¹⁵ «Bani-adantow, Yarusalaam mari koo kee ko'lih yan maray seewah been baaxol yanihiyyak giddinaamak iyyaanamah, ‹Seewah been mari elle yanim, allî-baaxooy; xexxaarah YALLA akak yaqbudoonu duudan baaxo hinna. Ahaysa, YALLI a baaxo ikoytah neh yeceeh yan› iyyan.

¹⁶ «Too mari toh iyya'mmay, atu ama seewah been marak intaamah, ‹YALLAY Mulki lehiyya siinik iyyaamah: Allî-baaxo sin rubteeh, kulli baaxol fixixih sin tabbixem, yooy; uxih dago wakti ama fixixih elle tanin baaxol, taahirik yan aracal elle suge'nnal, sin lih an› keenik inxic.

¹⁷ «Anu keenik inxic axcem keenih waris. ‹Fixixih sin elle abbixe baaxooxak sin gacseyyo. Israayil baaxo ahaksa siinih aceeyyo.

¹⁸ Taduuroonu waytan saaku, taaxige gabat bicsen duyyey yaqbudeenihiyya baysetton.

¹⁹ Qusba niya siinit heeyyo. Qusba kas siinih aceeyyo. Xaak yan lubbi siinik kalla heeh, algin lubbi siinit heeyyo.

²⁰ Too saaku yi xinto oggoletton. Anu aba axcem abetton. Isin yi mara akkettoonuuh; anu sin Dagelta akkeyyo.

²¹ Takkay immay anu niqibyo duyyeh-qibaadah amok kate waa mara siinik digaaleyyo. Oson abba haan uma taamah ken digaaleyyo. Ahat yabtam yoo Mulki le YALLA› keenik inxic» yok iyye.

YALLIH NABNA YARUSALAAMAK KATTEH

²² Tohuk lakal galwa-lem galwa fakka hayteh haadde. Taaxige koramkorak gexxa duyye ken lih haadde. Israayil doore Dageltih nabna yaybulle ifuy diifu le ken amol ifak yen.

²³ Too ifuy YALLIH nabna yaybulle, magaala cabba heeh, ayrô-mawqa le kabut raqta qale fanah gexeeh, wokkel elle yeede.

²⁴ Sarrak Yallih Roocaaniyya ukkuqqa yoo hayteh, Baabeloonuy seewah yoo elle yabbixeenihiyya fanah yoo bahte. Toh, suwaawur gurrah ubleeh; Baabelon gufek wadir abaluk maraaqinniyo.

²⁵ Tohuk lakal YALLI yoo uybulluyyu heem inkih, Baabeloonul seewah yabbixen marah warse.