Yacedkel 10 - NABUWWA KEE MALIKWA

YALLIH NABNA QIBAADAH QARIK TEERREH

¹ Woo galwa leemih moyyak daga raaqa aracay qari-amoh ceelo lehiyya fanah wagga hee waqdi, too tiyak daga, malik elle gaca korsih innah taniimiy safir deqsita luuluk bicseenim celtahiyya uble.

² Sarrak Yalli woo *baftak bicsen meqe sarot sartanah yan numuk iyyeemih, «Woo galwa leemik gubal tan koramkorak gexxa duyye fan gacca 'xicay, xikciinik gaba kibba haay; gexay Yarusalaam magaalal cax» iyye. Sarrak too num tokke fan cule waqdi, anu kaa wagitak raaqe.

³ Usuk addah cule waqdi, galwa-lem Yallih Qibaadah Qarik gabbi kabuk soolak ten. Too waqdi Qibaadâ-Qarik adda le kabu raaqa daarat qamburre bulte.

⁴ Tohuk lakal YALLIH nabna yaybulle ifuy kaxxa diifu lehiyya galwa leemik cabba heeh, Qibaadâ-Qarih culma fanah gexe. Qamburre inkih yan Qibaadah-Qari bulte. YALLIH nabna yaybulle ifuy diifu lehiyya Qibaadâ-Qarih daarat duuduse.

⁵ Galwa-leemih galwak tawqeh tan xongolo, Qibaadâ-Qarik afa le kabu raaqa daaratal kinni way antaabbuk ten. A xongolo Nabaamak Naba Dageltih xongoloh anay luk ten.

⁶ Yalli taaxige meqe sarot sartanah yan numuk, «Gexay, woo koramkorak gexxa duyyey rooci leemik gubal tanihiyyak fanak, gira bah» kaak iyye waqdi, sissikuk addah culla 'yeh koramkorak gexxa duyyek tiyak teenak gariik soole.

⁷ Galwa leemik tiyak teeni, fanal keenik ten gira fanah gaba rubbu heeh, xikcin yeyyeeqeeh; taaxige meqe sarot sartanah yan numul yecee. Too num too xikcin luk gexe.

⁸ Too galwa leemik kulli alih galih gubat sahdayti gaba celtam uble.

^9-10 Toh lih kaadu affara mansafay koramkorak gexahiyya uble. Fereey inkih sitta ceelak yeneeh; too fereeyiik kulli tiiy galwa leemik tattabak yen. Too duyye inkih luul innah bixiixiqitak ten. Kulli cabbatay koramkorak gexahiyya, akiimiy kaadu too gurral tanihiyyak angayyuk adda gaceh gexam duudak yen.

¹¹ Too duyye galwa-lem gexxa waqdi, oson elle gexinnaan kabul annak wonnah axce'kal, ken lih gexak yenen.

¹² Galwa leemik xagaraay buucusuuy gabaay galwa kee, koramkorak gexxa duyyet inkih intiita luk yenen.

¹³ A mansafway koramkorak gexxahiyyak «Mermeritta duyye» iyya migaaqal muggaaqissa xongolo oobbe.

¹⁴ Kulli galwa-lem affara fooca luk ten. Naharsi fooci awur fooca ceelak yen. Nammeyhaytô fooci sahdayti fooca ceelak yen. Sidochaytô fooci lubak fooca ceelak yen. Fereyhaytô fooci qawi fooca ceelak yen.

¹⁵ Ta galwa lem qaran fan tewqe. Kabar deqsita weeqaytih garil duma wacyih uble rooci-lem ceelak yenen.

^16-17 Too galwa lem qaran fan tewqe waqdi, too koramkorta mansafwa kaadu ken lih tewqe. Taaxige galwa-lem galwa elle fakinnaanimil, duyye keenik baxsime'kal ken lih gexxe. Galwa-lem soolinnaan waqdi, duyye kaadu soolak ten. Toh akah tekkem, a duyye galwa-leemih milkih teneemih sabbata.

¹⁸ YALLIH nabna yaybulle ifuy diifu lehiyya Qibaadâ-Qarih culma cabeh, rooci-leemik daga raaqa arac fanah gexe.

¹⁹ Anu wagittot an waqdi, galwa-lem galwa fakka hayteh, baaxook qaran fanah haadde. Too waqdi koramkorak gexxa duyye ken lih haadde. Qibaadâ-Qarik ayrô-mawqa le kabuk tan mawqah yemeeten waqdi, dagoom idiyya iyyen. Israayil doore Dageltih nabna yaybulle ifuy diifu le keenik amol ifak yen.

²⁰ Wagga ken hee waqdi, Kabar-weeqaytih garil suge saaku, Israayil doore Dageltih daffeynah korsih gubal uble rooci-lem kinnim eexegeh.

²¹ Kulli tiiy affara fooca kee affara gali luk keenik yen. Kulli galih gubat sahdayti gaba celtam ten.

²² Foocitte keenik kaadu, Kabar-weeqaytih garil suge saaku uble foocitte ceelak ten. Kulli tiiy keenik fooca fanah gexe.