Yacedkel 1 - NABUWWA KEE MALIKWA

YACEDKEL YALLAK YUBLE WACYIK INIKHAYTOH EXXA ( 1:1—7:27 ) YALLIH ABBOOTANIH KORSI

¹ Anu Buudi-baxa Yacedkel kinniyooh, soddomhaytô-sanatak fereyhaytoh alsak konoyhaytoh ayrot, Baabeloonul Kabar-weeqaytuk xaqut, Yuudâ-maray seewah beenihiyya lih an waqdi, qaran fakkimma 'yeeh; too waqdi Yallih wacyi yol oobe. Too wacyi elle ublem, Baabelon rasuk Kabar weeqaytu deqsita aracih garik ten.

² Waktik kaadu Yahoyaasin deqsita malik seewah Baabelon fan edde baahen konoyhaytô sanatak ten.

³ YALLIH qangara yol obteeh; YALLI yo'lih yaabe waqdi, kay yab oobbeh, kay qande yoh tumbulle.

⁴ Amo iroh fayya hee waqdi, kaxxa caaco kilbat le kabuk amaatih uble. Kaxxa qamburreh addat cankaxay bixiq iyya uble. Cankaxi bixiq elle iyya'kkel, nacaas innah tanim ifah uble.

⁵ Caacok gudet sahdâ-gurral tan rooci-leemik ferey uble.

⁶ Too rooci leemik kulli ti foocak fereey luk yeneeh; galwak kaadu fereey luk yen.

⁷ Kulli rooci leemik ibi makot manannay missat yeneeh; xukcuno keenik awur xukcuno ceelak ten; yisiffiyen nacaasih innah ifak ten.

⁸ Affara fooca kee affara galwaay, kalah kaadu, kulli ti sahdâ gabah gurral tan gaboobik fereey luk yeneeh, affara galiy lehiyyak galikiiy gubat inki gaba luk yen.

⁹ Kulli rooci-lem namma gali fakka hayta waqdi, galwak san titta xagaah; too galway sanah titta xagtahiyya affara kaalib takke. Tonna-leemiik yangayyen waqdi, woo kabuuk a kabul angayye'kal, titta lih angayyuk yenen.

¹⁰ Kulli rooci-lem affara fooca leeh; woo affara foocak foociiy isi ceelo luk yen. Foocat yan fooci sahdayti ceelo luk yeneeh; migdi kabut raaqa fooci lubak ceelo luk yen. Guri kabut raaqa fooci awur ceelo luk yen. Salafti kabu raaqa fooci kaadu qawî ceelo luk yen.

¹¹ Kulli rooci-leemik galik san, teetil ciggiila rooci-leemih galik san xagak yen. Wohuk raqte galwah nammay titta fanah gacissa heenih xagar isinnik edde buuleenih yenen.

¹² Kulli rooci-lem affara foocay lehiyyat affara kaalib fanah wagitak teneeh; tonna-leemiik gexaanam faxan ikke fanah, yakkeenimiik inkih afkanuk tittak baxsime'kal, daqaarimak sugen.

¹³ Ta rooci-leemik ura ifoytih innah taniimiy tangayyeeh way aade waytahiyya uble. A ifoytih gira habugga 'ta waqdi gubak tawqeeh; cankaxi innah bixiqqa axcuk ten.

¹⁴ Rooci-lem inkih cankaxi-bixiqtoh sissikaane lih, sissikuk angayyuk yenen.

¹⁵ Ta rooci-leemih wagittot an waqdi, affara mansafay koramkorak gexahiyya uble. Too fereeyiik kulli tiiy rooci-leemik tattabat, baaxô-bagul daffeyah uble.

¹⁶ Fereey inkih sitta ceelak yeneeh; luul innah bixiixiqitak yen. Kulli cabbatay koramkorak gexahiyya, akiimiy kaadu too gurral yanihiyyak angayyuk adda gaceh gexam duudak yen.

¹⁷ Tonna-leemiik a affaraamay koramkorak gexxahiyya, a kabuk woo kabul angayye'kal, sittak baxsime'kal, affara kaalibil gexak ten.

¹⁸ A duyyek kulli cabbat edde yan siba kaxxam nabuk teneeh; kulli cabbatak san-sanat mango intiita ten.

¹⁹ Taaxige rooci-lem elle angayyinnaanimil, ken lih angayyuk sugeeniih; rooci-lem baaxok ugutta waqdi, taaxige duyye ken lih ugutak sugte.

²⁰ Rooci-lem isih elle faxxe kabul gexak teneeh; a duyye kaadu oson elle gexan kabul ken lih gexak ten. Toh akah akkuk tenem, a duyye rooci-leemih-milkih teneemih sabbata.

²¹ Tonna-leemiik rooci-lem angayye kee soole kee, hinnay kaadu, qaran bagul aade tekkek, taaxige duyye hununuh rooci-lem abinnaanim abak ten.

²² Rooci-leemih-moyyak daga, miraayat innah wir intaamay luuluk bicsen qarih amoh ceelo lehiyya ten.

²³ Too tiyak gubal, taaxige rooci-lem soolak teneeh; too rooci-leemik tiiy namma gali fakka heeh aki namma gali xambaqqa heeh xagar isik edde buuleh yen.

²⁴ Haadan waqdi galway tittat keenik booddah anay oobbe. Too anay roobuy yangudehiyyah anay luk yen. Tonnah kaadu mango macaxuy waxxaq iyyah anay luk yeneeh; Nabaamak Naba Dageltih xongolo kaadu ceelak yen. Haadak suggu 'yeenih yeeden waqdi, rooci-leemik kulli ti isi galwa xambaqqa hee.

²⁵ Qari-amo-celtaamay keenik daga raqtahiyyak, uxih aggiriqe sinni xongolo antaabbuk ten.

²⁶ Qari-amo-celtaamak daga, safir deqsita luuluk bicsen korsiy malik elle daffeya celtahiyya uble. Too korsih amol sahdâ-ceelo lem daffeyah uble.

²⁷ Too numuy sahdayti gurral yanihiyyak, xonkok daga raaqa xagar girat laqlaqen nacaasih innah urak yen. Xonkook guba raaqa xagar kaadu, giray habug inta kaak ceelak yen. Kay xagarak yawqeh yan ifih diifi kaak dariifal urak yen.

²⁸ Too ifuy urahiyya qaran-bagih calawwaytu bisu luk yeneeh; YALLIH nabna yaybulle ifuk ten. Toh eexege waqdi, gomboh baaxok bagul rade. Sarrak yabti xongolo yol radde.