Xafanya 3 - NABUWWA KEE MALIKWA

YARUSALAAM MARI ABE DAMBI

¹ Xafanya iyyeemih, «Yarusalaam magaala yabti cina leeh, tutlukeeh, isi ummatat xukkuttah immay baati teetit akkele!

² Yarusalaam magaalah mari YALLIH yab cineeh, YALLI keenik akah xiina iyye meqe manoh xiinaanam cineenih. Imaan YALLAL hoonu cineeniih; kaal cato essera mara makkinnon.

³ Tet addal tan doolatat taamitta abbobti, qulule lubaakih innah, baaxo meekitan. Tet addal tan cokmi abeenit, maaci edde maacise barugak cayye wayte suulah innah gacan.

⁴ Teetil tan nabuwwa kaxxam isinnit yakkaleeniih, yaaminen mara hinnon. Teetil tan seeka taahirik tanim nadaasa abtaah; Yallih xinto isinni faxaanamih taagah makot warsan.

⁵ YALLI Yarusalaamak addal yanih immay, gitah taniimik sa makot tanim aba Dagelta hinna. Maaci maacisek wadir kulli saaku isi ummatah qadaalat lem abaah; tohu'mmay cakki gitak yexxeere mari uma taamah abittok maraaqaanaay, aban umaanek mawacarriyan» iyye.

⁶ YALLI iyyaamah, «Doolatwa bayseeh, magaalooli keenik bayseh aniih, xeetik xisen gasoy magaaloolit maroh sugtehiyya kaadu keenik bayseh. Megdebitte keenik foyya abeeh, magaalah addal gititte abuuruy num sinniih, lac sinnihiyya abe.

⁷ ‹Tahaysa yi mari yok meysiteleeh, anu maabina keenik axcem maabaana› 'yaanam niyal heeh suge. Takkay immay keenil baahem abaluk, yol yaduure marak masuginnoonuuy, dumaak abak sugen uma taamat qagten.

⁸ «Abletton! Ablettoonuk qambaala meqehik! Anu ummat abte umaane ummatal diggoysu waah, ken umaaneh ken digaalu waa saaki yanih. Doolatwa kee malikwa inki aracal gaabossa heeh, yi naqbi le'nna ken aybulleem faxa. Inkih tan baaxo yi naqabuh obtu wayta girat cararele.

⁹ «Tohuk wadir baadal tan ummatak afkan korseyyo. Deedaltaamay yalla axcuk yaqbudeenihiyya cabba heenih yol aduureloonuuh, yoo dibuk aqbudelon. Dooqa aban way, ‹YALLAW› axcuk yoo kallacelon. Tikka 'yaanamaak yi amri oggolelon.

¹⁰ Kuus-rasuy xeerihiyya fan yinkiliqeh suge yi mari sadgat yoh abeleeh yol xaaqimele.

YALLI YARUSALAAM-MARAH QAFU ABELE

¹¹ «Too saaku, yi maraw, duma yol bahten yabti-cinak gexxaamah mawacarriytan. Macaay inteenik, kaxxiina kee anaani le mara bayseyyo. Tohuk wadir isin yi qaley taahirik tanihiyyal kaxxiinah qubbuy m'intan.

¹² Tokkel too saaku niya akak baxaqteh, kaxxiina xagarat aalle waa maray faxaamah yoo kallacahiyya raaqiseyyo.

¹³ Israayil ummatak saaboh raaqe mari tahaysa sahdal umam mabaaha. Diraabat mayaabaanaay, sahda maduquurusan. Yakmeeniih yaaqubeenim ken mawaysiisa. Ken xagtam matanaay, numuk mameysitan» 'yaanam iyya.

FARCATAH ABEN SAARE

¹⁴ Israayiley, qililisay; tet ummatey, ruffa 'xica. *Yarsalaam magaalah maraw, baguuy afqadok wallita.

¹⁵ Aysa siinil tan digaala YALLI siinik kalla hee; naqboytit siinik kalla hee. YALLI sin amoyta kinni; Israayil ummat waklisa. Ahaysa akak cunxittaanam matan; sin fanat maraqta.

¹⁶ Too ayro tamaatu wayta way Siyon qalel tan magaalay, «*Yarsalaamey, mameysitin; niya isik margaqin» axcuk, teetih aytikuma aceelon.

^17-18 YALLAY ku Dagelta kinni ko'lih yaniih, koo waklisa. Yallih cayla nasri geetton. YALLI sin assakootele. YALLI siinih le kacanuh, qusba manoh xiine liton. Ummat qiidit tassa elle intaah, wallitak ruffa elle inta'nnal, YALLI siinih le kacanuh, qililisak, tassa axcele. YALLI siinik iyyaamahaa: «Aysa baati sin mageyta; ahaysa qaybik maraddan.

¹⁹ Xukko siinit abe mara, edde digaala uddur xayih; maxeeriiy, ahaysa xayih. Kos iyya maray boola le edde wadu waa uddur xayih; maxeeriiy, ahaysa xayih. Fixixiseh suge mara le baaxo fanah gacseyyo. Sinam keenit abta qaybik, nagay ken saytunuseyyooh kaxxa mara ken abeyyo. Qaybi yibbixe baaxooxal, migaq akak yaabben maray faylisaana ken abeyyo. Tohum edde abu waa wakti, maxeeriiy, ahaysa xayih.

²⁰ Sin maray fixixih yani le baaxo edde yaduure wakti, maxeeriiy, ahaysa xayih. Meqe manoh sin gacseyyo. Toh edde yakku waa wakti isin 'sinni intit abletton. Migaq akak yaabben maray, faylisaana sin abeyyo. Baadal inkih sin aabbelon. Tah intaah, tahamat yabtam, yoo YALLAY sin Dageltah tan» 'yaanam iyye Meqe Goyta.