Xafanya 2 - NABUWWA KEE MALIKWA

NABI UMMATTAH WARSE FARMO AH TEETI

¹ Nabi iyyeemih, «Kee wacarriye waa maraw, maabinaay, cissi geyaay, Yallal uduura.

² YALLI bagcarritaah, kay naqbi siinil oobaamak dumal, edde tanin soxak uduuraay, caaco beyte caffa makkina.

³ YALLI aba iyyem abaah, kaal kibaal haa maraw, YALLA aqbuda. Cakkik tanim abaay, YALLAH uqunxuya. Toh abteenik, YALLI bagcarrita saaku digaalak cattintaanam takkeh.

⁴ «Gaada deqsitta magaala abur akkele. Askalon deqsitta magaala bacarih raaqele. Asdood deqsitta magaalah mara, saaku aben qeebit wallaqenta xiiriyak ayyaaqelon. Ekron deqsita magaalah mara dabaaqah elle yanin ikkek fixixih ken ruubelon.

⁵ *Filistiin-maray baddi afal yanihiyyaw, bayteenim isinnik ixiga! YALLI cokmih baati siinil ruubeeh; too baatih bayettoonuuh, num siinik maraaqa.

⁶ Ama baddi afay a saaku guubuh elle tantoonuhiyya saqi loynitteh dabaq akkeleeh, illi elle nooka booxa akkele.

⁷ Yuudâ-marak qeebik saaboh raqtem baaxo siinik raaqiseleeh, raaqisen baaxo saqi dabaaqah haysitelon. Askalon magaalal raqte qarwa, saqi loynitte xintimah haysitele. YALLAY ken Dagelta kinni luk sugen meqe mano keenih gacseleeh, ken qaxat gacele» iyye.

ISRAAYIL DARIIFAL YAN MARIH BAATI TUMBULLE

⁸ YALLAY Nabaamak Nabahiyya iyyaamah, «Mooyab kee Qammon deqsitta kedoh yooboke mari ummat yok xaafaah; oson anqibinnaanim iyyaanam keenik aabbeh an. ‹Baaxo siinik beenno› axcuk keenil tirtirisan.

⁹ Waara YALLAY Nabaamak Nabah, Israayil doore Dageltah yanihiyya kinniyooh; inni migaaqal xiibita'mmay, Qammon kee Mooyab deqsita marat duma Sodom kee Gomorra deqsitta namma magaala kee, too namma magaalal suggu 'ye marat tikka 'te baatih innah tan baati keenit abeyyo. Away elle yanin baaxo qasbo elle taabuke booxah raaqeleeh, waaqex elle yaabuke gubbi akkele. Abuuruy way tu elle suge wayta akkele. Yi ummatak carbik saaboh raqtem ken buubeleeh, sarra ken baaxo isinnih haysitelon» 'yaanam iyyah yan.

¹⁰ Xafanya kaadu iyyeemih, «Mooyab kee Qammon mari elle bayu waam tama'nnaay; too baatih ken bayissam, ken kaxxiina kee YALLAY Nabaamak Nabahiyya doore ummatat aban bura kee xaafu.

¹¹ YALLI akak cunxitan umaane keenil ruubele. Addunyal yan mari yallah le duyyeeya foyya keenik abele. Too waqdi kulli mari, elle aninnaan baaxol, YALLA aqbudele» iyye.

¹² Kuus maraw, isin kaadu seefit bayetton.

¹³ YALLI Assuuriyah ummat isi qandet baysele. Nanawe deqsitta magaala abur abbay bakarroyta cabele.

¹⁴ Saqa kee alak alaakulleyta akak inxicca yaanamih dabaq abele. Tiddigille qarwat inin dabaaqah gacele. Inin kulli taagatak kaayele. Kulli qarik afal kuraani kaay antaabbele. Naqboytit, qarwa akak xisen *sariida kalla heenih beelon.

¹⁵ Tet addal yan mari kaxxam isit yakkaleeh, tu ken xage waytam yakkaleeni'mmay, takku waytam tamaha. Ken magaalah bis le magaala addunyâ-bagul matanam keenit celta. Tohu immay ken magaala abuuruy alluwwa dabqah lehiyya akkele. Xaqu akak gaceh gexa mari tah yable waqdi, abah yan wariggak gexxaamah hagga axcelon» iyye.