Xafanya 1 - NABUWWA KEE MALIKWA

¹ YALLI Xafanya deqsita nabil ruube farmo ah teeti. A farmo YALLAK obtem, waktik Amon-Yoosiyaahu deqsita num Yuudâ-marih amoytah yen saakuk ten. Xafanyak kaxxa abba Ciskiyyaahu deqsita malikik ten. Ciskiyyaahu Amarya xaleeh, Amarya, Gedalya xale. Gedalya kaadu Kuusi xale; Kuusi, Xafanya xale. Xafanyak nasab toh elle yani inna.

YALLIH COKMIH AYRO AMAATELE

² YALLI iyyeemih, «A baaxoh bagul enna 'tam inkih bayseyyo.

³ Alak Adam-baxaay alaakulleyti yenek, qaraanal haada kimbir yenek, hinnay kaadu kullum yenek, inkih bayseyyo. Makri-leela deerik afah korseyyo. Bani-adantu saabo cabsiiseyyo. Tahat yabtam yoo YALLA» iyye.

⁴ YALLI qagseh kaadu iyyeemih, «Yarusalaam mara kee Yuudâ kedoh ubukka 'ye mara digaaleyyo. A Baqal akak iyyan duyyey qibaada akah abaanahiyya raat cabsiiseyyo. Baqal qibaada elle aban aroocal Baqal yaqbude mari seekah le mara kee yot darre cabte seeka raat cabsiiseyyo.

⁵ Qarwah amol gacca 'yeh, ayro kee alsa kee cutuuka yaqbude mara bayseyyo. Yoo yaqbudeeh, yi migaaqal xiibitak wadir, yok kalah Milkom deqsitta duyye yaqbude maray too duyyeh migaaqal xiibitahiyya bayseyyo.

⁶ Yot darre cabaah, yi gita kataate waa mara bayseyyo. Too mari yot baaqid sinni maray catoh yol kibalsite waahiyya kinnon» iyye.

⁷ Mulki le YALLIH cokmih ayro xayih immay kay foocal tibba 'xica. YALLI too ayroh masgaada bicseeh, Yuudâ mara buubu waa marah seeco abeh.

⁸ YALLI iyyeemih, «Too masgaadah ayro malik gubal tan abbobtiiy, malik-buxah mara kee, marin mari abuk raqtih lem kataata mara siinik digaaleyyo.

⁹ Yalla maleela taqbude duyyeeya keenik kaxxih yaqbude mara digaaleyyooh; too maray gita maliinot sahdak geyya haa duyyet isinni dageltih qari bilqisahiyya digaaleyyo» iyye.

¹⁰ YALLI kaadu qagseh iyyeemih, «Too ayro Yarusalaam magaalak Kullum Afa deqsita aracal weeqa marih anay aabbetton. Yarusalaam magaalak qusbih bicsen aroocal boogisa marih anay aabbetton. Qarway taddigilleh anay Yarusalaam koomah amok aabbetton.

¹¹ Toh tellemmo aba mari rabu waa ayro'mmay, Yarusalaamak guba raqta exxal yan maraw, weeqaay, boogisa» iyye.

¹² YALLI kaadu qagseh iyyeemih, «Too ayro gabat faanus hayya heeh Yarusalaam magaala gorriseyyo. Isil kaxxa kibaal le maray isit kaxxam yakkalehiyya digaaleyyo. ‹YALLI abba haamah lem mali. Meqem neh maabaay; umam nel mabaaha› iyya mara digaaleyyo.

¹³ Luk suggu 'yen gaddaliino keenik buubelon; buxaaxi keenik bayselon. Xissiten qarwat magacan. Yubquren qinabih kamri mayaaquban» 'yaanam iyye.

¹⁴ YALLIH cokmih ayroy kaxxa ayro kinnihiyyah mamaata nabam xayiih, too ayroh mamaata sissikih. Too ayro uma weeqa abeloonuh, cunxitelon. Kaxxa agiirinna luk sugte labhak kinni way qeebil af awqeleeh, waagiselon.

¹⁵ Too ayro Yalli bagcarritu waa ayrooy, ummat gadaama kee cisab yabbaxu waa ayro. Too ayro baaxo abur edde takku wayta ayrooy, finqi edde yabbaxu waa ayro. Too ayro baaxol data qamburreey gaanibiy kaxxa dite le radele.

¹⁶ Too ayro qeebi radu waamih astah *baanta amuggurele. Naqboyti-qaskar abtah tan tirtirah xongolo, inkih tan baaxol antaabbele. Magaalat maroh tan kaxxa gaso korelon; amo xer qarik amo korelon.

¹⁷ YALLI iyyaamah, «Ummat inti maleelah innah tataf edde inta bala ummatal ruubeyyo. Dambi lem yol baaheeniih; tohuk gexxaamah a saaku qabal leeh innah keenik caxitele. Raysi keenik abicca 'yeh baaxô-bagul qangalaalele.

¹⁸ Too ayro bagcarriteyyo'mmay, yi bagcarrak oson lon dahab kee lakqo ken mawadda. Inkih tan baaxo yi naqabuh obtu wayta girat cararele. Anu num cabe'kal, garciik addunya bayseyyo» 'yaanam iyye.