Ruut 4 - NABUWWA KEE MALIKWA

BOOQAS RUUT ABITEH

¹ Booqas magaalah culmal daffeyna elle aban arac gexeeh, wokkel daffee. Too waqdi Alimelekik xayi ramadah yan numuy Booqas edde yaabeh sugehiyya wokke yemeete. Booqas kaa yuble waqdi, «Annah amey akkel daffey» kaak iyye. Too waqdi woo num yemeeteh wokkel daffee.

² Sarrak Booqas magaalah idoolah yan tabna numuh kaadu seeceeh, «Akkel daffeya» iyyeeh; too waqdi woo mari kaadu wokkel daffee.

³ Tohuk lakal woo numuk iyyeemih, «Noqmi away Mooyab rasuk tuduureeh, neh ramad luk yen Alimelek baaxo taylammem faxxaah;

⁴ atu wohim taaxigem faxxintam yot celta. Hay tonnal, faxxek, a maray akkel daffeyah yanihiyyah foocal xaamitaay, faxe waytek kaadu, ken foocal ‹Mafaxa› inxic. Macaay intek, a baaxo xaamaanamih cakki naharat elle yamaatem kooy; ku lakal elle yamaatem yoo» kaak iyye. Woo num woo waqdi, «Meqeh hay, anu xaameyyo» kaak iyye.

⁵ Too waqdi Booqas kaak iyyeemih, «Nabam meqe hay. Noqmik woo baaxo xaamta waqdi, baaxo Alimelek-buxah-mari akah nagra innah, Ruutuy gubnah tanihiyya kaadu cigissam kol tan. Tonnal rabe numih ikoyta kee migaq baye kaletto» kaak iyye.

⁶ Too waqdi woo num, «Nagra yi xaylol akak amaate waytek, wonnalaay, atu xaamite waytek, anu a baaxoh limok raaqah an» kaak iyye.

⁷ Too dabaanal duyye aylammee kee duyye-duyyet milaage yakken waqdi, aylammee kee milaage yakke num ibak kabella eyyeqqa heeh xaama numul yeceem, Israayil marih qaadah luk yen. Too kabella yeyyeeqeenik wadir, caagid gaba kalem elle aaxaguk yenen.

⁸ Tonnal woo num Booqasak, «Atu xaamit» iyyeeh, ibak kabella eyyeqqa heeh, Booqasal yecee.

⁹ Too waqdi Booqas magaalah idoola kee wokkel suggu 'ye marak inkih iyyeemih, «A saaku Alimelek kee kay xayloy Kilyon kee Maclon deqsitte, luk sugga 'tem inkih Noqmi-gabak xaamaamih sumaq siini.

¹⁰ Toh lih kaadu Ruutuy Mooyabah toobokeeh Maclon abbaxuk suge yi barra tekkeeh; yi lakal aham Alimelek buxah mari nagrele. Kay buxah mari kay nagrak mayawqa. Tohul ta saaku sumaaqah tanim siini» iyye.

¹¹ Tokkel sugte magaalah idoola kee raqqa 'ye mari inkih iyyeemih, «Nanu a saaku tekkeemih sumaq kinninoh. Digibte barra, Raacel kee Liyay Israayil ummatta akak raddehiyya innah YALLI tet abay. Efrata-gulubuk inkih gaddali koo abay; Beetlacam magaalal kaadu migaq-gexxo le num koo abay.

¹² A barrat YALLI koh yecee xaylo, Yuuda kee Tamaari fanak yooboke Fares deqsita numih xaylo tekkem yakkoonay» axcuk dooqa kaah aben.

¹³ Tohuk lakal Booqas, Ruut abiteh buxah tet bee. YALLI bagut baxa teetik heeh, lab baxa kaah xalte.

¹⁴ Too waqdi agbi Noqmik annah iyye. «YALLA fayla taafay! A saaku YALLI amo akak wagitta lab-baxa koh yecee. Yooboke awki Israayil rasul migaq-gexxo le num yakkay.

¹⁵ Ruut koo kicnaah, malcina lab-baxi xiqaamak fula koh xiqte. Away absuma koh bahteeh; a absumi idoolinnal ruffu koo heeleeh, qande kot heele» teetik iyyen.

¹⁶ Noqmi yooboke awka tukkuqeh, gurumbal isik hayya hayteeh, amo kaak wagitte.

¹⁷ Cuggaaneh agbi inkih, «Noqmih lab-baxi yooboke» iyyen. Yooboke awkak migaaqah Yoobad iyyen. Yoobad Yiisa xale; Yiisa kaadu Malik Dawud xale.

FARESIK RADE MARIH SAMAD ELLE YANIM ANNA

^18-22 Fares, Cesram xaleeh, Cesramaay Raam xale. Raam Qamnadab xaleeh, Qamnadab Nacson xale. Nacson Salmon xaleeh, Salmon Booqas xaleeh, Booqas Yoobad xaleeh, Yoobad Yiisa xaleeh, Yiisa Dawud xale.