Ruut 3 - NABUWWA KEE MALIKWA

NOQMI, RUUT DIGIBISSAM FAXXA

¹ Ayrok teena Noqmi Ruutuk annah inte. «Ahaysa, atu isi buxa le barra takke'gidih, baqala koh gorrisam meqe» teetik inte.

² «Atu taamah agabu lih akak taamitak sugte Booqas nek ramadah yan numu. Taway abtamaa: a bar usuk caffalik caffa kee daro tittak baxsele.

³ Too waqdi atu kaqalla 'xicaay qatri isil caxxaay meqe sarat gacca 'xic. Tokkek usuk too caffali daro kee caffa tittak elle baxsa ikke fan gex. Sarrak usuk makum kee maqubuk gaba kalla haam fan wokke temeetem isik maysaxxagin.

⁴ Qaxah gacam wagitak suggu 'xicay inaaqitem table waqdi, edde yumbuduude saro ibak kaak cankaffa haay ibi-gubgubat kaak inaaqit. Too waqdi abtu waytam usuk koh warsele» teetik inte.

⁵ Ruutuuy isi ballok, «Meqeh hay, atu ab axcinnaanim inkih abeyyo» teetik inte.

⁶ Too waqdi daro kee caffa tittak elle baxsan arac gexxeeh, tokkel tet ballo ab teetik inxicci 'tem inkih abte.

⁷ Booqas makmo kee maqubuk gaba kalla hee waqdi xagar kaak ruffu iyye. Sarrak tittak bagul kobxisen caffali daroh xaquk xiina'gidih qaxah gacca 'ye. Too waqdi Ruut raarisak amma 'teh edde yumbuduude saro ibak kaak cankaffa hayteh ibi gubgubat kaak inaaqitte.

⁸ Booqas barak gude tuk wariggiteh; ugte waqdi barra ibak gubat kaak tanim yuble.

⁹ Too waqdi «Atu iyyaay?» teetik iyye. Is inteemih, «Ah yoo Ruutuuy; yi cigsi elle yamaatem koohuk, yoo cigis» kaak inte.

¹⁰ Too waqdi Booqas teetik iyyemii, «Yi baxáy, YALLI barkat kot haay. Atu away abte maqaane duma abte maqaanek tayseh. Gadda alle kee baaca alle yakken immay, furraynâ-lakat magexinnito.

¹¹ Away yi baxáy, ayti kibba haysit; atu faxxem koh abeyyok» teetik iyye. «A magaalal sinam inkih atu kas le barra kinnitom kok yaaxigeenih.

¹² Anu nummah xayi ramad kinniyoh immay, yok xayi numuy cigsi elle yamaatehiyya yan.

¹³ Tonna leemiik a barak akkel elle xiinaay; maaca woo num ku cigso oggolek, oggolaah; usuk oggole edde weemit YALLAY waarahiyyah migaaqal koh xiibitaah anu innih koo cigseyyo» teetik iyye.

¹⁴ Woo barak, ibi-gubgubat kaak xinteeh, maaca num tet able waa waqdi ugutte. Too waqdi teetik iyyeemih, «Atu a arac temeetem num aaxige waam faxxinta» iyye.

¹⁵ Kaadu qagseh iyyeemih, «Ama amô-saro kalay annah xayyoosay fidisey» teetik iyye. Woo saro kaal xayyosse waqdi, gabru deqsitta darok laca keexo takkem woo sarol teetih hayya heeh, quukah fillal teetik hee. Tohuk lakal magaala fan gexe.

¹⁶ Ruut, ballo fan tuduure waqdi tet ballo teetik inteemih, «Yi baxáy, caagid koh bicee?» teetik inte. Too waqdi Ruut, Booqas teetih abba heem kee teetik iyyem inkih teetih warisseeh,

¹⁷ kaadu inteemih, «Koo fan gabâ-foyya luk gacaamak, ‹Gabru deqsitta daro gabat luk gex› yok iyyeeh; a daro ah teetiiy, inkih yoh yecee» teetik inte.

¹⁸ Too waqdi Noqmi teetik inteemih, «Tahaysa taham elle takke inna nable fanah sabri abit. Booqas aham bicse'kal maxiinak» teetik inte.