Ruut 2 - NABUWWA KEE MALIKWA

RUUT BOOQAS DEQSITA NUMIH BUQREH TAAMAT GACTE

¹ Noqmi-baqalah yen Alimelekih ramad le numuy migaaqah Booqas deqsitahiyya suge. Usuk gaddalih yan numuy sinam yab akak taabbehiyyak ten.

² Ayrok teena Ruut tet balloh tan Noqmik, «Daro orbisa mari cabe daro afiile'gidih, buqre fan gexay yoo m'itta?» teetik inte. «Wokkel marak teeni edde taamitam yoh aceelem digga haak» teetik inte. Too waqdi Noqmi, «Gex hay, yi baxáy» teetik inte.

³ Ruut buqreh adda gexxeeh; tokkel daro orbisa mari cabem gaabossa'gidih, sinaamak darre-darret gexxe. Nasiibih woh elle abak sugtem, tet baqalah ramad le numuy Booqas deqsitahiyyah buqreh adda.

⁴ Waqlak wadir Booqas Beetlacamak yemeeteeh, taamâ-marah salaamatta abe. «YALLI sin lih yanay» iyye. Osonuuy, «YALLI barkat kot haay» kaak iyyen.

⁵ Sarrak Booqas taamak abbah yan numuk, «A qunxa barra iyyin barray?» iyye.

^6-7 Woo numuuy, «Ama barra Mooyab-baaxok Noqmi lih temeete barraay; ‹Sinam cabte daro afiilu waa› yok itteehiiy, akkeey saakuh taamat tan. Away inki adda silaalal ufuy rubbu hayteh immay, akkeey saakuh taamat tan» kaak iyye.

⁸ Too waqdi Booqas Ruutuk annah iyye. «Anu fayu koh acayu waak. Ta buqreek kalih buqreerah addah darô-mafaalah magexinay; akkel yan say-mara lih taamit.

⁹ Sahda daro elle orbissa ikke wagitey, agbi darok raqtem yafiile waqdi ken lih gex. Yi labhak, ‹Tet maxagina›, 'yaanam exceh an. Bakaaritta waqdi kaadu gexxa 'xicay, oson kiben gacloolik aqub» teetik iyye.

¹⁰ Ruut qansa teetik baaxo xagtam fanah massakaxxah qununna 'teeh, Booqasak annah inte. «Yooy marin baaxoh barrah yanihiyyah a gideh maqaaneh macah taqabta?» kaak inte.

¹¹ Usuk too waqdi teetil gacseemih, «Atu ku baqli rabba 'yeemiy akke, isi balloh abtem yoh warseeniih; isi inaay isi abba kee isi baaxo cabba hayteh, aaxige wayta marih adda elle temeete inna oobbeh.

¹² Atu abteemih galto YALLI koh yacaay; catoh elle temeete YALLAY Israayil ummatta doorehiyya dudda le galto koh yacaay» teetik iyye.

¹³ Is too waqdi, «Yi qammow, yooy ku buxal taamita agbih gide kinni way akke waahiyya lih meqe yaabah yabteeh, ruffu yoo hayteeh, yoh temqeh» inte.

¹⁴ Qeerô-kaloh-waqla tekke waqdi, Booqas Ruutuk annah iyye. «Gaqambô-rike luk annah amaay a saalot kumus» teetik iyye. Is too waqdi amma inteh taamâ-mara lih daffeyteeh; sarrak Booqas alen alo teetih yecee. Too maaqok cayya 'tam fan tokmeeh, geera elle cabte.

^15-16 Sarrak darô-mafaalah ugutte waqdi, Booqas taamâ-marak iyyeemih, «Tifiilen daroy axaw axawah tabbixeenihiyyah garik, faxxeh gide tafiilay tet inxicaay, woo axaw axawah tabbixen darok kaadu tu-tu siibay teetih eyyeeqay, bettay tet inxica. Num teetit yaabe waay» keenik iyye.

¹⁷ Ruut abak sugte darô-mafaala nagay abteeh, carri tikka 'yam fan afiiluk sugte. Sarrak woo qaalak luuqusak asse. Daro keexxe waqdi, tittat kiisik garab tekke.

¹⁸ Tohuk lakal magaala fan tuduureeh, darok gaabosseh gide isi ballo tuybulle. Qeerô-kalok raaqe geera kaadu teetih tecee.

¹⁹ Too waqdi Noqmi teetik inteemih, «Darok a gide elle tifiilem ankeey? Koh a taama yecee numut Yalli barkat haayik, elle taamitak assem iyyin buqreey?» teetik inte. Ruut elle taamitak sugte arac teetih warisseeh, «A saaku buqrel akak taamitak sugem, Booqas deqsita numu» teetik inte.

²⁰ Noqmi inteemih, «Booqasat YALLI barkat haay. YALLI addunyal-yan-mara kee rabe-marah inkih cule qahdi keenil mamakam ableh. Booqas nek ramadaay; ni cegsi elle yamaate marak numuk teeni kaa» teetik inte.

²¹ Too waqdi Ruut inteemih, «Wohuk tayseemih, ‹Darô-fiila gaba kalla haytam fanah yi taamah mara lih taamit› yok iyye» inte.

²² Too waqdi Noqmi annah teetik inte. «Nummah, yi baxáy, Booqas-buqret taamita agabu lih taamittam meqeeh; aki arac gexxek koo xagitaanam takkeh» teetik inte.

²³ Tonna leemiik Ruut wokkel Booqas buqret taamita agbi elle yan ikkel, kamadi kee gabru deqsitta daro mafaalak gaba kalla haytam fanah, taamitak sugte. Dabqih isi ballo lih sugte.