Ruut 1 - NABUWWA KEE MALIKWA

ALIMELEK KEE KAY BUXA MOOYAB BAAXO ELLE GEXXE'NNA

^1-2 Makaabon Israayil baaxol dardaarak ten saaku, Israayil baaxol qulul rade. Too waqdi Alimelek deqsita num, lab-xayloh nammay kee barra gabat hayya heeh, Yuudâ-baaxok Beetlacam deqsitta magaalak Mooyab deqsita marih baaxo fan dulah gexe. Kay barra migaaqah Noqmi deqsitak ten. Teetik lab xayloh nammay kaadu migaaqah Maclon kee Kilyon deqsitak yenen. Alimelek akah yoobokem, Efrat deqsitta gulubuk ten.

³ Alimelek elle gexe baaxol waqlak wadir rabeh. Too waqdi kay barra xaylo nammay lih dibuk raqte.

⁴ Sarrak tet xaylo Mooyabah yooboke baxuuwul digiben. Woo baxuuwuk tiyak teena migaaqah Qorfa deqsitak teneeh; akitto Ruut deqsitak ten. Tabna sanatak lakal

⁵ Maclon kee Kilyon kaadu rabteh. Noqmi-baqla kee tet xaylo inkih rabteh; is dibuk raqte.

NOQMI KEE RUUT BEETLACAM FAN TUDUURE

⁶ Waqlak wadir Noqmi, YALLI isi marat barkat heeh baaxol mango daro tooboke 'yaanam toobbe. Too waqdi isi xayloh agabu kee isih Mooyab-baaxo cabteh gexxam faxak ten.

⁷ Sarrak Yuudâ-baaxo fan gacaana'gidih safarah ugteenih; Yuudâ-baaxo fanah aban gexoh gitat yanin waqdi,

⁸ keenik inteemih, «Isin isinni inonti fan uduuraay; yoo kee isinni baqoltih maquk akah sugten innah, YALLI siinih yamqay.

⁹ YALLI, digibeeh buxa le mara sin abay» keenik inte. Sarrak fugga ken hayteeh, «Salaamata» keenik inte. Too waqdi tet xayloh agbi weeqah hayya heeh,

¹⁰ «Nanu ku mara fan ko'lih gexenno'kkal, kok maraqna» teetik iyyen.

¹¹ Noqmi keenik intemii, «Yi xayloy uduuraay, yo'lih magexina. Anu ahaksa sin cigissa xaylo maxalak,

¹² isinni buxah uduura. Ahaksa digibeh xaylo xalam faxaamah; idooliteh ikkal digib mageya. Anu digib niya luk sugam takke-way, a barat digibeh xaylo xaleh,

¹³ ahaksa yi xaylo catteh sin abittam fan maay qambaltan? Ken taagah digibik tabboodeenim maay faxxan? Kata, yi xayloy, ah takkem hinnam taaxigeenih. YALLI yoh maqaane maloowinaay, tekkem siinik yol gibdi» keenik inte.

¹⁴ Toh keenik inte waqdi kaadu oson weeqeenih. Sarrak Qorfa isi ballo fugga hayteeh, salaamata teetik inteh isi buxah tuduure. Ruutuuy teetik baxsime cinteh, elle raqte.

¹⁵ Too waqdi tet ballo teetik inteemih, «Qorfa isi baaxo kee isi taqbudem fan taduureh tanik, atu kaadu uduur» teetik inte.

¹⁶ Ruut teetik inteemih, «Annah tanim yok maxcin. Atu gexinnaan ikke ko'lih gexeyyok, anay yoo inxic» teetik inte. «Atu dabqah elle gacinnaan baaxol ko'lih gaceyyo. Ku mari yi maraay; ku Dagelti yi Dagelta.

¹⁷ Rabi yok, atu elle rabtu wayta ikkel akkeleeh; magaq yok ku magaqa lih gacele. Koo dibuk cabaanamak, YALLIH digaala yot takkem tayse. Rabak sarra tittak nee baxissam matana» teetik inte.

¹⁸ Sarrak Noqmi Ruut teetik raaqe waytam tuble waqdi, teetik intem maliiy, is lih tanay tet inte.

¹⁹ Wohuk wadirih abak sugen safarah sitta luk Beetlacam magaala fanah haysiten. Beetlacam gufen waqdi sinam ken tubleeh, woh kaxxam waagisse. Wokkel suge agbi, «Ah nummah Noqmii?» iyyen.

²⁰ Isiiy, «Yalli mano yot qeero bahsiisek, Noqmi yok maxcinay Maara yok inxica.

²¹ Anu akkek gexe saaku kullim luk gexeeh, a saakuy YALLI a baaxo yoo gacsehiyya gaba foyyah luk uduure. YALLI gadaama kee baaca inkih yol ruube way, Noqmi macah yok intan?» keenik inte.

²² Noqmi, too caalatal, tet-baxih-gubnah tan Ruutuy Mooyab marah tooboke gabat luk Beetlacam fan tuduure. Oson Beetlacam gufen saaku, gabru deqsitta daroh orbah taama qimbisseh keenih sugte.