Qobadya 1 - NABUWWA KEE MALIKWA

¹ Ah, Qobadya deqsita nabi Edom giddinaamak naharal edde yaabe yaaba. Toh YALLAY Mulki lehiyya kaa yuybulleeh, edde yaabeemi. YALLI isi farmoyta baadal tan ummatah ruubeeh; nanu kay farmo noobbe. Too farmoyti iyyemii, «Nee ugusay Edom marat qeebi abna'gidih nee beya» iyye.

YALLI EDOM DIGAALELE

² YALLI Edom marak iyyeemih, «Sin boolayseyyooh, kulli num burute mara sin abeyyo.

³ Isin liton kaxxiina sin aylahisseh. Boolaalik addat inaytah magaala liton. Buxaaxi siinik fayya le aroocal tenek sah, ‹Akkek iyyi nee oobisu duudah?› bagul intan.

⁴ Qarwa siinik fayyah qawi qari elle xissitta aracih missal xissaanamah, cutuukâ-missat missossaanamah, addah sin oobiseyyo. Tah intam yoo YALLA.

⁵ «Garqi bar buxa garqa waqdi, buxal sugga 'tem mabeyay, isih faxem addak dooreh beya. Sahda qinab xaylo tafiile waqdi, caxah amot dagom cabta. Takkay immay sin naqboytit gaba siinil haytu wayta saaku, tu siinik macabaanay foyya sin abelon.

⁶ Qiisok rade maraw, lakqo kee midir siinik buubelon!

⁷ Wakalih luk sugten mari sin makele. Too mari qeebi siinit abeloonuuh, qeebil siinik ayselon. Sarrak baaxok sin ayyaaqelon. Qalla sin lih luk yen mari wadir sin ganele. «Oson luk sugen kas anke keenik gexee?» siinik axcelon.

⁸ Edomuh yooboke mara digaalu waa saaku, kas le mara keenik selli heeyyo. Luk sugen kas ken waysiiseyyo.

⁹ Teman deqsitta magaalal keenik tan qaskarat warigga qideyyo. Tonna-leemiik Edomuh ubukka 'te qaskar bayelon. Tahat yabtam yoo YALLA.

EDOMUT DIGAALA AKAH TAKKU WAYTA SABAB

¹⁰ «Isin akak radden Qiiso kee Yaqkuub toobokok tene'mmay, Yaqkuub-duruyyat wararteeniih, ken qiddeenih. Tohuk gexxaamah selliimetton. Kulli waqdi qaybit rada mara akketton.

¹¹ Naqboytit magaalak afa keenik iggillaay, saami caxxa tet addal sugga 'teemil qidak, too duyye weerra heeh keenik bee saaku, isin allak asseleelequk raqten. Naqboytit innal sugten.

¹² Sin toobokot umam takke saaku, umaanel keenil tasuuleenim sin ceelak mananna. Keenit baati takke waqdi, tafriceenim sin ceelak mananna. Oson gadaamitan waqdi, wadir keenil horrissaanam, sin migaaqak mananna.

¹³ Kaxxa gadaamah gadaamiten ayro, naqboytit luk magaala keenik cultaanaah, keenit tekkem tassaleeleqeenim siinik faxxiimak mananna. Gadaamah addat yanin saaku, oson yedderen midir keenik qandet beytaanam sin ceelak mananna.

¹⁴ Giti addal gacca 'teenih, Yuudâ-maray yasillime faxa, asillime ken kaltaanam sin ceelak mananna. Oson gadaamitaanam tableeniih wadir naqboytit gabal ken haytaanam sin ceelak mananna.

YALLI UMMAT DIGAALELE

¹⁵ «Yoo YALLI kulli numul abeemih mekelu waa ayro xayih. Edomuh yooboke maraw, isin sinaamak abba hayteenim siinit akkele. Sin abini siinil aduurele.

¹⁶ «Yuudâ-maraw, isin yi digaalay qeero lehiyya, kamri innah, yi qaley taahirik tanil tooqobeeni'mmay, sin dariifal enna 'ta doolatwa qeeroh tohuk gibdi digaala kamri innah aaqubelon. Yi digaalay qeero le aaqubeloonuuh, bayelon.

ISRAAYIL MARI NASRI GEE

¹⁷ «Takkay immay Yarusalaamal tan Siyon qaleh amol sugu waa mara cattiimele. Too arac taahirik yan arac akkele. Yaqkuubuk rade mari isi baaxoy ikoytah luk sugehiyya geele.

¹⁸ Yuuda kee Israayilih yooboke mari girah innah sahda cararisele. Qiisok rade mara, caffat gexxe girah innal, carariselon. Qiisok rade marak num maraaqa. Tahat yabtam yoo YALLA» iyye.

¹⁹ «Yuudah yooboke maray gabbi-qaxat raaqahiyya, Edom rasu abbixele. Ayrô-culmat raqta mango koomaami le baaxol keenik raaqa mari kaadu, Filistiin-rasu abbixele. Israayil mari Efrayim kee Samaariyah rasu raaqiselon. Benyaamah yooboke mari kaadu Gilqad deqsita arac abbixele.

²⁰ Israayilik kilbat le kabul suge maray a saaku marin baaxol yanihiyya aduureleeh, Finiikiya deqsita rasuk Xarafat deqsita aracah amma 'yaanam fan tan baaxo, qeebit raaqiselon. Yarusalaamak been maray Sardis deqsitta magaalal yanihiyya, Yuudâ-baaxok gabbi-qaxat raqta magaalooli abbixelon.

²¹ Yarusalaam mari, Qiisoh yooboke marak qeebil ayseleeh, baaxo keenik xabba heenih keenil ackumelon. YALLI too saaku isih, malik keenik akkele» iyye.