Qedra 8 - NABUWWA KEE MALIKWA

QEDRA LIH YARUSALAAM FAN TUDUURE ABBOBTI

¹ Artacsasta malikih yen dabaanal, Baabelon rasul baaxô-caboytiitih sugte abbobtiy Yarusalaam magaala fan Qedra lih tuduurehiyya akah aabakuk yen gulub kee, ken migaq ah kaana.

^2-3 Fincas deqsitta gulubuh aabakuk yen Gersom deqsita num kee Itaamar deqsitta gulubuh aabakuk yen Daaniyel deqsita num kee Dawuduk rade marih numuy Sekanyah-Cattus deqsitahiyya yuduure. Zakariyya deqsita numuy gulubuk Farqos deqsita marah yoobokehiyya, nasab akak amixxiguk yen bool kee kontom num luk yuduure.

^4-12 Daracya baxa Elyahoqeenay deqsita numuy gulubuk Facat-Mooyab deqsita marah yoobokehiyya, namma boolih num luk yuduure. Yacadiyel baxa Sekanya deqsita numuy Dattuq deqsita gulubuh gacisak yenehiyya, sidooca boolih num luk yuduure. Yonaatan baxa Qebed deqsita numuy Qaadin deqsitta gulubuh yoobokehiyya, kontom num luk yuduure. Qatalya baxa Yasaqya deqsita numuy Qeelam deqsitta gulubuh yoobokehiyya, malcina-tabanih num luk yuduure. Mikaayil baxa Dabadya deqsita numuy Safatya deqsitta gulubuh yoobokehiyya, bacra-tabanih num luk yuduure. Yaciyel baxa Qobadya deqsita numuy Yowab deqsitta gulubuh yoobokehiyya, namma bool kee taban kee bacra num luk yuduure. Yosifya baxa Seloomit deqsita numuy Baani deqsitta gulubuh yoobokehiyya, bool kee lactam num luk yuduure. Beebay baxa Zakariyyay Beebay deqsitta gulubuh yoobokehiyya, labaatanna kee bacra num luk yaduure. Hakkatan baxa Yocanan deqsita numuy Qadgad deqsitta gulubuh yoobokehiyya, bool kee tabna num luk yuduure.

¹³ Tonnah kaadu Elifalat kee Yaqwel kee Samaqya deqsita sidooca numuy Adonikam deqsitta gulubuh aabakuk yenehiyya, lactam num luk Yarusalaam yuduure. Ta mari edde yuduurem, sarrî dabaanak ten.

¹⁴ Quutay kee Dakkur deqsitta namma numuy Bigway deqsita gulubuh aabakuk yenehiyya kaadu, malcina-tabanih num luk yuduure.

QEDRA, LEEWIH YOOBOKE MARA GEE

¹⁵ Acawa deqsitta magaala fan caxita dorih garil, Qedra yakkeenimiik ken kobxiseeh, tokkel sidooca ayroh gide sugen. Safarah ugte marih addat seeka tanim kee ane waytam gorrise waqdi, Leewih yooboke maray seekah gacsahiyya yemeeteh suge'mmay, gersi mari keenik mamattinna.

¹⁶ Saqoltih yen marak sagla numuh, «Ama» 'yaanamih farmo ruube. Tohum, Elqeeder kee Ariyal kee Samaqya kee Elnaatan kee Yaarib kee Elnaatan kee Naatan kee Zakariyya kee Masullam kee, kalah kaadu, Yoyyaarib kee Elnaatan deqsitta namma kabiirik ten.

¹⁷ Ta mari yemeete waqdi, Qiddo deqsita numuy Kasifya deqsita rasih marak abbah yenehiyya fan ken ruube. Ken akah ruubemii, kaa kee kay wakaliitittey Yalla kinni ni Dageltih Qibaadah-Qarit taamittahiyya, Qibaadâ-Qarit Yallih taamat taamitu waa mara neh ruubaana'gidik ten.

¹⁸ Yalla kinni ni Dagelti nee cateemih taagah, Sereebiya deqsita numuy Leewî kedok Macli deqsita gulubuh gacisak yeneeh, isi taamal dudda luk yenehiyya, xaylo kee tooboko fanal sittat taban kee bacra num akkuk ruuben.

¹⁹ Tonnah kaadu, Casaabiya kee Yasaqya deqsita namma numuy Leewî kedok Maraari deqsita gulubuh gacissahiyya kee, keenih ramad le labaatanni num ken lih hayya heenih ruuben.

²⁰ Toh lih kaadu, namma bool kee labaatanni numuy Yallih Qibaadah-Qarit taamitak yenehiyya ruuben. Ta marak kaxxa abbobti, dumah yan saaku Leewih yooboke marah taamitaana'gidih doorimteh ten. Too taamah ken doortem, Malik Dawud kee kay gubal doolat taamat yen kaxxa-kaxxa mara. Too marih migaq inkih yuktubeenih yenen.

QEDRA UMMATAK SOOMAAY DOOQA ABA IYYE

²¹ Acawa fan caxita dorih garil elle kobxen ikkel, ummattal amri oobiseeh, keenik exceemih, «Yalla kinni ni Dagelti a safar nel yaymaaquuy, nee kee ni xaylooy neddereemik inkih Yarusalaam fan amaanah nee gufsa'gidih, kaah soomaay rammita» keenik exce.

²² Kaadu keenik exceemih, «Anu dumah yan saaku Malikik, ‹Ni Dagelti isil yaamine marat barkat haah, darre isit caba mara fan mawagitaay, ken digaalah› 'yaanam exceh sugeemih sabbatah, sarra qaskaray faaris amok qeebi abtahiyya gital umeynitik nee dacrissa'gidih ‹Neh ucuya› 'yaanam, malikik axcem wacarriy yol tekke» exce.

²³ Tonna leemiik soomneeh, abna safaral Yalla kinni ni Dagelti nee dacrisa'gidih, dooqa abne. Yalli kaadu too dooqa nek raabiteh.

YALLIH QARIL YACEEN ACWA

²⁴ Tohuk lakal, saqoltih ten seekah addak taban kee namma sek kee, kalah kaadu Leewih yooboke marak Sereebiya kee Casaabiya kee keenih ramad le tabna num doore.

²⁵ Too waqdi malik kee kay gubal taamita maraay, fayu kaah yecee mara kee Israayil mari, Yallih Qibaadah-Qarih taamat assa'gidih, yeceeh suge dahab kee lakqo kee kalah tan duyye miizaanal hayya heeh, kinnih gide ublek wadir too marih gabal hee.

^26-27 Ken gabal hee duyye akkuk teneh gide ah teeti. Lakqo labaatanna kee namma toon akkuk ten. Taama edde aban mingilway lakqok bicseenihiyya bool akkuk teneeh; qilsah malcina-tabanih kiilo akkuk ten. Dahab kaadu sidooca alfi kee affara boolih kiilo akkuk yen. Dahabak bicsen sacni mangah labaatanna akkuk yeneeh; qilsah bacaar kee garab kiilo akkuk yen. Nacaasak bicsen namma sacniy tuxxiiqik dahab gide lehiyya keenil ecee.

²⁸ Too waqdi keenik exceemih, «YALLAY sin kaxxa abbobti doorehiyyah garil taahirik yan mara tekken. Ta dahab kee lakqo kee kalah tan duyyey isinni fayxiik YALLIH mattacoh baaheenihiyya kaadu, taahirik tan duyye tekke.

²⁹ YALLIH Qibaadah-Qari guffa haytaanam fanah, ta duyye meqe innal daanisay amo akak wagita. Yarusalaam guftan saaku seeka edde tan golih adda beyay miizaanal haa. Tokkel seekak saqoltih yan mara kee, Leewî-kedok saqoltih yan mara kee, tonnah kaadu, Israayil ummattak saqoltih yan marih gabal heetton» keenik exce.

³⁰ Tonna leemiik seeka kee Leewî-mara, Yallih Qibaadah Qariy Yarusalaamal yanihiyya fan guffu haanam, too dahabaay lakqo kee wohuk kalah tan duyyeh dacayrit gacen.

ELLECABOL YARUSALAAM GUFEN

³¹ Sanatak inikhaytoh alsak taban kee nammeyhaytoh ayro Acawâ-Dora deqsita dorak ugunneeh, Yarusalaam fan haysinne. Safaral ni Dagelti ne'lih yeneeh, naqboytit kee gital raarisak sugta umeynitik nee cate.

³² Sarrak Yarusalaam gufne. Too waqdi sidooca ayroh gide gexô-taqabik ufuy rubsutak sugne.

³³ Fereyhaytoh ayrol Yalla kinni ni Dageltih Qibaadah-Qari fan genxeeh, lakqo kee dahab kee kalah tan duyyey bahnehiyyak tu raaqise'kal miizaanal hayya hayneh, Mereemot deqsita seekih gabal hayne. Mereemot Uriyya baxak ten. Kaa'lih inki sek kee Leewih yooboke marih nammay suge. Tohum Fincas baxa sek Alqedar deqsita sek kee Leewih yooboke namma numuy migaaqah Yaasuwá-Yoodabad kee Binnúy-Noqadya akak axcuk yeneenihiyyak ten.

³⁴ Bahha hayne duyye inkih miizaanal haynek lakal, lowwa hayneh takkeh gide akak warkatal nuktube.

³⁵ Allî-baaxok uduurra ye mari, Israayil doore Dageltih migaaqal cado akak cararisan saq sadgatah baahen. Sadgatah inkih tan Israayil ummattah migaaqal saqak baaheenim, taban kee namma awur kee marwak sagla-taban kee lica maruyuuy, anaaqek malcina-taban kee malcina anaqtuk ten. Too saq inkih yusguudeenih, cado akak cararisen. Tohuk kalah, isinni dambi kalootuh wadarak taban kee namma dabeela baahen.

³⁶ Sarrak malik yuktubeh nel yecee warkatay gabat bahnehiyya Furaat Weeqaytuk Ayrô-culma le qaxat Raaqa Rakaakayah abbobtih gabal hayne. Too abbobti ummat kee Yallih Qibaadah Qaril aban qibaadah catoh qaadah faxximma 'tam aben.