Qedra 7 - NABUWWA KEE MALIKWA

QEDRA YARUSALAAM YEMEETE

¹ Aham tekkeemih mango sanat suggu 'yeenik lakal, Artacsasta Fursi-malik edde yekke dabaanal, Qedra deqsita num yen. Too num akak radem, kaxxa seekih yen Haaruunu. Qedrah abba Seraaya deqsitak yen. Seraayah abba Qadarya deqsita numuk ten. Qadaryah abba Cilkiyya deqsita numuk ten.

² Cilkiyyah abba Sallum deqsita numuk ten. Sallum abba kaadu Saaduk deqsita numuk ten. Saaduk abba Aciitub deqsita numuk ten.

³ Aciitub abba Amarya deqsita numuk ten. Amaryah abba Qadarya deqsita numuk ten. Qadaryah abba kaadu Maraayot deqsita numuk ten.

⁴ Maraayot abba Daracya deqsita numuk ten. Daracyah abba Quddi deqsita numuk ten. Quddih abba kaadu Bukki deqsita numuk ten.

⁵ Bukkih abba Absuwaq deqsita numuk ten. Absuwaq abba Fincas deqsita numuk ten. Fincas abba Alqedar deqsita numuk ten. Alqedar abba Haarunuk ten.

^6-7 Qedra YALLAY Israayil doore Dagelta kinnihiyya Muusal oobise kitaabih addal tunkuttubem digga luk yaaxige numuk ten. Qedra YALLAY kay Dagelta kinnihiyyak barkat gee numuk teneemih sabbatah, malik esserra heem inkih kaah abeh. Artacsasta edde dardaareemih malcinhaytô-sanatat, Qedra, Baabelon rasuk Yarusalaam magaala fan yuduure. Seeka kee Leewih yooboke mara kee, Yallih Qibaadah-Qaril saare aba mara kee, Yallih Qibaadah-Qarit dacayrih yan mara kee edde taamita mara kee, kalah yan Israayilih yooboke mari kaa'lih yuduure.

^8-9 Qedra too mara luk, sanatak naharsi alsak naharsi ayrot Baabelon rasuk gexoh ugte. Safaral Yalli ken cateemih sabbatah, konoyhaytoh alsak naharsi ayrot Yarusalaam magaala gufen.

¹⁰ Yalli ken akah catem, Qedra Muusâ-kitaabal tunkuttubem baritak, tohim abinal asisa numuk yen. Tohimih addâ-faknu kee maqna Israayil mara barsaamat wakti isik rubsuusak suge.

ARTACSASTA QEDRÂ-GABAL HEE WARKATA

¹¹ Amoyti Artacsasta, YALLI Israayil ummatah Muusal ruube xinto intaamih adda digga haa Qedra deqsita numuy tohul kaxxa ixxiga lehiyyah yuktube warkat yecee.

¹² Too warkatal axcuk yeneemih, «A warkat rubtam, yoo kaxxa amoytah yan Artacsasta. Akah ruubam, sek Qedray qaraanal yan Yalli ruube xinto intam yaaxigehiyya. Naharak salaamatta kol qida.

¹³ «Anu malikih elle an rasul enna 'ta Israayil ummat kee Leewih yooboke mara kee seekak, Yarusalaam fan ko'lih gexam faxa marah ruksat keenih eceeh anik, gexxaasitoonay.

¹⁴ Yoo kee yo'lih yan malcina numuy fayu elle baahahiyya inkih, titta elle geyya hayneh: Yuudâ-rasu kee Yarusalaam addal tan ummatta, ku Dagelti ruube xintoy ku Dagelti koo akah yeemenehiyya intam, abaanam kee abe waanam wagitta'gidih koo rubnah nan.

¹⁵ Yoo kee anu fayu elle baaha mara titta elle geyya hayneh: Israayil mari yaqbude Dageltay Qibaadah-Qari akak Yarusalaam magaalal yanihiyyah migaaqal, acwah tacayu wayta dahab kee lakqo kol rubna.

¹⁶ Tohuk kalah kaadu, Baabelon rasuk gaabosseh sugte dahab kee lakqok tu cabe'kal gabat beyay; toh lih kaadu, Israayil ummatta kee seeka ken Dagelta elle yaqbuden qariy Yarusalaamal yanihiyyah isinni fayxiik ruuben acwa gabat bey.

¹⁷ «Tama lakqo anu axceemik tu cabe'kah edde duudus. Awurwa kee marwaay anaaqe kee, too saqa lih sadgatah yeceen daro kee qinabak bicsen kamri edde xaamma haay, Yalla kinni sin Dageltih Qibaadah Qariy Yarusalaamal xissiimehiyyak sadgat elle aban aracal sadgatah ucuya.

¹⁸ Lakqo kee dahabak raqqa 'tem, sin Dagelti elle faxxa haa innal, koo kee ko'lih tan seeka akah lowtaanamat culusa.

¹⁹ Yarusalaamal yan Yallih Qibaadah-Qarih taamah kol yaceenih sugen mingilwa kaadu too taamat culus.

²⁰ Wohuk kalah Yalla kinni sin Dageltih Qibaadah-Qarih tu xiqta duyyey faxxahiyya tellek, doolat makdanak beytu duddah.

²¹ «Furaat Weeqaytuk Ayrô-culma le kabut Raaqa Rakaakayal tan doolat duyye dacrisa marak, ‹Sek Qedray qaraanal yan Yallih xintoh adda nagay yaaxigehiyya sin esserra heemik,

²² lakqok sidiica alfi kee affara boolih kiilo kee, tonnah kaadu, kamadik tabna alfih kiilo kee, qinabak bicsen kamrik kaadu namma alfih litrih amma 'tam fan kee, qasbok kaadu faxxa haah gide kaah ucuya› 'yaanam amrih siinil oobiseh an.

²³ ‹Tonna'mmay qaraanal yan Yallih naqbi yoo kee yi lakal dardaara maral akah oobe waa innah, Yalli isi Qibaadah-Qarih loowe duyye, usuk elle iyye innal, taamal asissaanamih qaadal digga xica.

²⁴ Yallih Qibaadah-Qarih taamat yan marak seeka takkuu, Leewih yooboke mara takkuu, hinnay kaadu, saare aba mara takkuu, dacayrih yanoonuu, hinnay kaadu, kalah tan taama wokkel aba mara takkuu, hinnay kaadu, a qarih taamak faxe taamah taamitta 'ya marak qusuur numuk mabena. Tah intam yoo Amoyta Artacsasta.›

²⁵ «Qedraw, Yalli koh yecee kasat, Furaat Weeqaytuk Ayrô-culma le kabut Raaqa Rakaakayal Yalla kinni ku Dageltih amri yaaxige marah, cokmaaba kee makaabon isih keenih hay. Yallih xinto intam aaxige waa mara baris.

²⁶ Ku Dageltih xinto intam abe waa num yenekiiy, hinnay kaadu, rasi madqa cina num yenek, too numul digaalah rabi amaate kee, hinnay kaadu, baaxok kaa ayyaaqe kee, buxal luk suge yeddere duyye kaak bukkuse kee, woh akke wayteh casbit kaa hee yakkeenimi» 'yaanam elle tan warkat kaal yecee.

QEDRA YALLA FAYLISE

²⁷ Qedra too warkatal tanim yuble waqdi iyyeemih, «YALLAY ni kaxxa abbobti elle aamanuk sugte Dagelta kinnihiyya fayla taafay. Yarusalaamal yan kay Qibaadah-Qari malik akah yassakaxxe innah abtem YALLA.

²⁸ Yallih kacanuy digga lehiyyak gexxaamah, malik kee malikih fayu yecee mara kee, kay gubal yan cayla-leelah tan doolat marih garil, meqe intit yablen num ekke. YALLAY yi Dagelta kinni niya yot heeh, Israayil marak mango gulubuh yaabuke mari yo'lih yaduure'gidih ken lih yaabe yab yok oggoleh» 'yaanam iyye.