Qedra 4 - NABUWWA KEE MALIKWA

YALLIH QIBAADAH-QARI XISE KALA MARI YEN

¹ Yuuda kee Benyaamah yooboke marih naqboytitteh yen mari, elle suge marin baaxok yuduure mari YALLAY Israayil doore Dagelta kinnihiyyah qari nammeyhaak xisaanam yoobben.

² Too waqdi Darabbabel kee gulubwah saqolti fanah yemeeteeniih iyyeenimih, «Sin kee nee naqbudem inki Yalla. Assuuriyah malikih yen Isar-Caddon, dabaaqah akkel gacna'gidih, akke nee rubbu heemiiy akke fan, sin Dageltih-migaaqal sadgat abak sugne. Away kaadu Yallih Qibaadah-Qarih xisnel sin catnuh nemeete» iyyen.

³ Darabbabel kee Yaasuwa kee raqqa inte Israayil-abbobti keenil gacisseemih, «Sin kee nee titta lih qari xisnam neh midnisinta. Fursi-malikih yan Kooris nee elle amrise innal, numtin cato faxe'kal, YALLAY Israayil doore Dagelta kinnihiyyah qari ninnih xisenno» keenik iyyen.

⁴ Tohuk lakal too baaxol dabaaqah suggu 'ye mari, Yuudâ-maray Yallih Qibaadah-Qari xisak sugek niya butukku heenih, tonnah kaadu, qari xisok meysiteenih akah raaqan innih gabbatiyyat gacen.

⁵ Fursih doolatih abbobti a taama abe ken akah kalta'nnah, guqul keenih yeceen. Kooris kee Daryawes dardaarinnih waktil, oson elle ackamuk sugen baaxol abbobtih suggu 'ye marah guqul acayuk, a qarih xisok ken elle yayseeden malat gacen.

SARRA YAN DABAANAL YARUSALAAM MAGAALA XISE KALA MARA

⁶ Tonnal, Ekserkas deqsita num malik edde yekke sanat, Yuuda kee Yarusalaam magaalal yan marak naqboytiitih yen mari, wayto keenik elle yuktuben warkat malikil ruuben.

⁷ Tonnah kaadu Artacsasta deqsita malik Fursi-rasul dardaare dabaanal, Bislam kee Mitradat kee Tabqel kee ken waday too malikih warkat uktubba hayteh kaah rubte. Too warkat edde yuktubeenim, Suuriyah afak teneeh; sarra warkat intam kaah warsen.

⁸ Baaxoh abbah yen Racum deqsita num kee kutbe-abeenah yen Simsay deqsita num, Malik Artacsastah, Yarusalaam magaalah xisne akke wayta'gidih, warkat yuktubeenih ruuben. Too warkatal yuktuben yab annah axcuk yen:

^9-10 «A warkat tuktubem, xintoh abbah yan Racum kee kutbe-abeenah yan Simsay kee, ken adoytitte kee cokmi abeenit kee raqqa 'ta doolat-abbobti kee, tonnah kaadu, Erek kee Baabelon kee, Qeelam rasuk Suusa deqsitta magaalak yemeete mara. Ken lih gacak a warkat tuktubem, nabna kee massakaxxa luk yen Osnaffar deqsita malik le baaxok rubba heeh Samaariyah magaala kee Furaat Weeqaytuk Ayrô-culma le kabut Raaqa Rakaakayal nookise mara kinni.

¹¹ «Nabna le Amoyta Artacsastaw, a warkat koh taktubem ku taamat yan maray Furaat Weeqaytuk Ayrô-culma le kabut Raaqa Rakaakayal yanihiyya.

¹² Nabna le amoytaw, koh warisnaamah, Yahuud-maray koo le'kkek nee le'kke fan yemeetehiyya a saaku Yarusalaam magaalal nookeenih yanin. Taaxige uma magaalay umeynitih yan mari elle sugehiyya nammeyhaak xisaanam faxan. Oson woo magaalah rakiibo bicseenih gasok kaadu xayih gaba kalaanam faxan.

¹³ A magaala nammeyhaak xissinteeh, teetit maroh gactu wayta gasoh xisnek gaba kalen ken tekkek, gabbarat geyak ten lakqo mageyta.

¹⁴ Nanu ku amrih gubat yan mara kinnuk, qaybik koo qidaanam mafanxa. Tonna-leemik a warkat koh rubnah nan.

¹⁵ Tonna kinnuk taway abtaamahaa, duma ku kaxxa abbobtih dabaanal tekkem elle yuktuben kitaabal tanim wagtetto. Tonnal too magaalal dumî-dabaanal suge mari qamalleelak sugeeniih, malikwa kee rasih abbobtil saduh akkuk suge mara kinnoonum too kitoobal keenik geetto. Too magaala kulli waqdi gaadile kee umeynit dabqik sugtem geetto. Magaala duma akah baatem, tohih sabbata.

¹⁶ Tonnal ta magaala nammeyhaak xissinteeh, teetit maroh gaso heen ken tekkek, Furaat Weeqaytuk Ayrô-culma le kabut Raaqa Rakaakay ku abbootanih gubat raaqe wayu waam naharal elle koh warisna» 'yaanam elle yuktuben warkat kaah ruuben.

¹⁷ Malik too warkat kaa gufte waqdi, tohul raddih yab yuktubeh ruubeeh iyyeemih, «A warkat akah ruubam, xintoh abbah yan Racum kee kutbe-abeenah yan Simsay kee, tonnah kaadu, sin adoytittey Samaariyah magaala kee Furaat weeqaytuk ayrô-culma le kabut raqqa 'tahiyyah inkih ruuba. Takkeenimik inkih salaamatta siinil qida.

¹⁸ «Isin yoh rubten warkat yoo gufteeh; yoh yikriyeeniih, maqna akak yoh warseenih.

¹⁹ A caagidik adda wagtu waa mara ruubeeh; Yarusalaam mari dumî-dabaanaak malik xintol saduh sugeeh, Yarusalaam magaala gaadile kee umeynit dabqik sugtem teetik geytinteh.

²⁰ Cayla leelah tan malikwa Yarusalaam kee inkih yan Furaat Weeqaytuk Ayrô-culma le kabut Raaqa Rakaakay reedisak yenen. Too rasih marak gabbara kee mango lakqo beyak sugen.

²¹ Taway isin, anu nagay yan amri siinih aceem fanah gexay, ‹Ahaysa ama magaalah xisne eyseedeya› keenik inxica.

²² Nanu faxe waynam edde akke'kal, a waqdiik gexay keenih warisa» 'yaanam yuktubeh keenih ruube.

²³ Racum kee Simsay kee ken adoytitte ta warkatay Malik Artacsasta ruubehiyya yikriyen waqdi, arduk Yarusalaam fan gexeeniih, magaala xisak suge mara xisnê-taamak caylat yeyseeden.

²⁴ Yallih-Qarih-xisne kaadu fanal teedeeh, Fursi-malikiy migaaqah Daryawes deqsitahiyya edde dardaare nammayhaytô sanat fan, xisne akak elle yeyseeden aracal elle teedeeh sugte.