Qedra 3 - NABUWWA KEE MALIKWA

YALLIH QIBAADA YARUSALAAMAL QIMBISEENIH

¹ Malcinhaytoh alsat kulli num isi magaalal keenik dabaaqah gace. Tohuk lakal yakkeenimiik Yarusalaamal gaaboowen.

² Yahuuxadák-Yaasuwa kee kaa'lih ten seekaay, Saltiyál-Darabbabel deqsita num kee kay ramad, cado akak carrisan sadgat Yallah abaana'gidih, Yallih naqasuh yen Muusal oobe kitab elle iyya'nnal, Israayil doore Dageltah sadgat elle aboonu waan arac nammayhaak soolisen.

³ Oson wokkel guubuh suge marak meysiteenih immay, tohuh, too aracay Yallih migaaqal sadgat elle aboonu waanahiyyah bicsak akah maraaqinnon. Too arac duma elle suge aracal bicsen. Tohuk lakal kulli ayro saaku kee carra tokkel sadgatah saq qidak yeneeniih, woo sadgatih cado cararisak yenen.

⁴ Kitab elle iyya'nnal Iraawô-Dabih-Qiid deqsita qiid abeeniih, too qiidih kulli ayro lacak faxxintah gide sadgatah qiden.

⁵ Tohuk kalah kaadu, kulli ayro cado akak carrisan saq sadgatah qideeniih, tonnah kaadu, alsi bila waqdi aban sadgataay, wohuk kalah tan YALLIH qiidih ayroora aban sadgat kee, kalah kaadu, isinni fayxik YALLIH migaaqal aban sadgatak tu cabe'kal abak yenen.

⁶ YALLIH Qibaadah-Qarih-xiso qimbiseenih manannoonuuy; takkay immay malcinhaytoh alsak inikhaytoh ayro, YALLIH migaaqal sadgat elle aban aracal, cado akak cararisan sadgat aben.

⁷ Tonna leemiik, Fursi-malikiy Kooris migaq luk yenehiyya Israayil marak «Aba» elle iyye'nnal, Lubnaan rasuk Yaffa deqsitta magaala fan *sariidâ-coox badal baahen. Sarrak too sariidah meklah darooy, qinabak bicsen kamri kee caxâ xaylok bicsen *zeyti (saliid) Suur kee Sayda deqsitta namma magaalal yen mara fan ruuben. Xisne aba mara kee xisnê-coox yaysorooroce marah cawalah lakqo yaceen.

YALLIH QARIH XISNE NAMMAYHAAK QIMBISEN

⁸ Yuduure mari Yarusalaamay Yallih Qibaadah-Qari elle suge arac kinnihiyya gufeenimih nammayhaytô-sanatak nammeyhaytoh alsat, Yarusalaamal gaabooweenih, Qibaadâ-Qarih-xisne duma elle suge'kkel nammeyhaak xisaanam qimbisen. Saltiyál-Darabbabel kee Yahuuxadák-Yaasuwa kee, wohuk kalah yan ken marak seekaay, Leewih yooboke mara kee, elle sugen marin baaxok yuduure marak num raaqe'kal, yakkeenimik inkih, too taamat gaba yessegellen. Leewih yooboke marak labaatanni karma akke kee wohuk fula aalle yakke mari inkih, woo qarih xisoh taama elle takke'nna amo wagitak yenen.

⁹ Yaasuwa kee kay xaylooy, kaah ramad elli haa maraay, Kadmiyal deqsita num kee, Binnuy deqsita num kee, Hodawya deqsita num sittat Yallih Qibaadah-Qari xisa marih amô-wagittot yenen. Cendad deqsita gulubuh yooboke mari woo taamal ken cate. Too mari inkih Leewî-kedoh aabakuk yen.

¹⁰ Xisne aba mari, YALLIH Qibaadah-Qarik rakiibo heen saaku, seeka dallaabiyat gacca teh, *baanta gabat luk, elle sooloonu waan arac yibbixen. Leewi deqsitta kedok Asaf deqsita gulubuh yooboke mari kaadu, giyaagib gabat luk, keenih heen aracal soolen. Too waqdi Dawud dabaanak raqte qaadal akah abak yenen innal, YALLA saarisen.

¹¹ YALLA faylisaah candu kaah gacisa mara kee, yakkuqe mara yekken. Faylah iyyeenimih, YALLI maqaane le Goyta; kay kacani mayambaxa. YALLI Israayilih le kacni daayiman yan; mayambaxa» iyyen. Too saaku YALLIH Qibaadah-Qarih-xisneh-rakiibo heenih yeneeniih; tohih sabbatah YALLA faylisen. Ken ankacisak yen mari kaadu anay fayya haak qililise.

¹² Takkay immay mango idoolah tan seeka kee Leewih yooboke mara kee gulubwah saqoltiy duma suge Qibaadâ-Qari aaxaguk yeneenihiyya, away nammeyhaak xisaana'gidih rakiibo heenim yublen waqdi, kaxxam weeqen. Raqqa 'ye mari farcih qililise.

¹³ Qilila kee weeqi xongolo tittat tengeleemih sabbatah, qililo kee weeqa ittak cedak manannon. Xongolo keenik allal radak ten.