Qedra 2 - NABUWWA KEE MALIKWA

YADUURE MARIH MIGOOQA AH TEETI

¹ Duma seewah been marak rade marak, Yarusalaam kee Yuudâ rasu fan yuduure marih migooqa ah teeti. Ta mari akak rade mara yakkeemiik inkih, Nabkadnessar deqsita malik Baabelon baaxo fan seewah beeh suge. Too saakuk xabba haanam too baaxol baaxo caboytiitih sugen. Isinni baaxo gufen waqdi, kulli numuuy isi magaala fan keenik gace.

² Keenik saqoltih tenem, Darabbabel kee Yaasuwa kee Nacmiya kee Seraaya kee Reelaaya kee Mordakay kee Bilsan kee Misfar kee Bigway kee Racum kee Baqna deqsita marak ten. Elle sugen baaxok isi baaxo yuduure Israayil-marak-gulub-migaq kee mangah akkuk yeneenih gide ah teeti:

^3-20 Farqos deqsita gulubuk yuduure mari namma alfi kee bool kee malcina-taban kee namma num akkuk yenen. Safatya deqsita gulubuk yuduure mari sidiica bool kee malcina-taban kee namma num akkuk yenen. Arac deqsita gulubuk yuduure mari malcina bool kee malcina-taban kee koona num akkuk yenen. Facat-Mooyab deqsita gulubuk, Yaasuwa kee Yowab deqsita namma numih durruyyat tuduure. Too mari namma alfi kee bacra bool kee taban kee namma num akkuk yenen. Qeelam deqsita gulubuk yuduure mari alfi kee namma bool kee kontom kee affara num akkuk yenen. Dattuq deqsita gulubuk yuduure mari sagla bool kee morootom kee koona num akkuk yenen. Dakkay deqsita gulubuk yuduure mari malcina bool kee lactam num akkuk yenen. Baani deqsita gulubuk yuduure mari lica bool kee morootom kee namma num akkuk yenen. Beebay deqsita gulubuk yuduure mari lica bool kee labaatanna kee sidiica num akkuk yenen. Qadgad deqsita gulubuk yuduure mari alfi kee namma bool kee labaatanna kee namma num akkuk yenen. Adonikam deqsita gulubuk yuduure mari lica bool kee lactam kee lica num akkuk yenen. Bigway deqsita gulubuk yuduure mari namma alfi kee kontom kee lica num akkuk yenen. Qaadin deqsita gulubuk yuduure mari affara bool kee kontom kee affara num akkuk yenen. Aatar deqsita gulubuy kaadu Ciskiyyaahu deqsita migaaqal yaaxigeenihiyyak yuduure mari sagla taban kee bacra num akkuk yenen. Bexay deqsita gulubuk yuduure mari sidiica bool kee labaatanna kee sidiica num akkuk yenen. Yoora deqsita gulubuk yuduure mari bool kee taban kee namma num akkuk yenen. Casum gulubuk yuduure mari namma bool kee labaatanna kee sidiica num akkuk yenen. Gibbar deqsita gulubuk yuduure mari sagla taban kee koona num akkuk yenen.

^21-35 Tonnah kaadu, dumah yan saaku Israayil rasuk mango magaaloolil kaxxa abbobti akak sugte marak, mango mari yuduure: Duma Beetlacam deqsitta magaalal suge marak rade marak bool kee labaatanna kee sidiica num tuduure. Duma Natoofa deqsitta magaalal suge marak rade marak kontom kee lica num tuduure. Duma Qanatot deqsitta magaalal suge marak rade marak bool kee labaatanna kee bacra num tuduure. Duma Qadmawet magaalal suge marak rade marak morootom kee namma num tuduure. Duma Kiryat-Yaqarim kee Kafiira kee Beerot deqsitta magaaloolil suge marak rade marak malcina bool kee morootom kee sidiica num tuduure. Duma Raama kee Gabaq deqsitta magaaloolil suge marak rade marak lica bool kee labaatanna kee inki num tuduure. Duma Mikmas deqsitta magaalal suge marak rade marak bool kee labaatanna kee namma num tuduure. Duma Beetal kee Qaay deqsitta magaaloolil suge marak rade marak namma bool kee labaatanna kee sidiica num tuduure. Duma Nabo deqsitta magaalal suge marak rade marak kontom kee namma num tuduure. Duma Magbis deqsitta magaalal suge marak rade marak bool kee kontom kee lica num tuduure. Kalah tan gersi Qeelam deqsitta magaalal suge marak rade marak alfi kee namma bool kee kontom kee affara num tuduure. Duma Caarim deqsitta magaalal suge marak rade marak sidiica bool kee labaatanni num tuduure. Duma Lood kee Caadid kee Oono deqsitta magaaloolil suge marak rade marak malcina bool kee labaatanna kee koona num tuduure. Duma Yeriko deqsitta magaalal suge marak rade marak sidiica bool kee morootom kee koona num tuduure. Duma Senaaqa deqsitta magaalal suge marak rade marak sidiica alfi kee lica bool kee soddom num tuduure.

^36-39 Seekah aabakuk suge marak tuduurem ah teeti: Yaasuwa kaxxa abbah akak raaqa gulubuy Yadaqya deqsitahiyyak sagla bool kee malcina-taban kee sidiica sek yuduure. Immarak rade marak alfi kee kontom kee namma sek yuduure. Fascuruk rade marak alfi kee namma bool kee morootom kee malcina sek yuduure. Caarimik rade marak alfi kee taban kee malcina sek yuduure.

^40-42 Leewih yooboke marak yuduure marih loowo ah teeti: Hodawyak rade marak migaaqah Yaasuwa kee Kadmiyal deqsita namma gulubuk tuduurem malcina-taban kee affara numuk ten. Yallih Qibaadah-Qaril saare abak yen marak rade marak tuduurem bool kee labaatanna kee bacra numuk ten. Too mari Asaf deqsita gulubuk rade marak ten. Yallih Qibaadah-Qarit dacayrih suge marak bool kee soddom kee sagla num yuduure. Too mari Sallum kee Aatar kee Talmon kee Qakkub kee Catiita kee Soobay deqsita marih samadak yenen.

^43-54 Yallih Qibaadah-Qarih taamat duma suge marak rade marak yuduure marih gulubuk migaq ah kaana: Xiica kee Casuufa kee Tabaaqot kee Keeros kee Siqaha kee Fadon kee Labaana kee Cagaaba kee Qakkub kee Haagab kee Samlay kee Canaan kee Giddal kee Gacar kee Rayya kee Raaxin kee Nakooda kee Gaddam kee Qudda kee Faseeyac kee Besay kee Qasna kee Maquunim kee Nafiisim kee Bakbuk kee Cakuufa kee Carcur kee Baxlut kee Maciida kee Carsa kee Barkus kee Sisra kee Temac kee Naxiya kee Catiifa deqsita gulubuk ten.

^55-57 Suleemanah taamitak yen marih gulubuk yuduure mari akak rade marih migaq ah kaana: Sootay kee Hassofrat kee Faruuda kee Yaqla kee Darkon kee Giddal kee Safatya kee Cattil kee Fokret-Haxxabaayim kee Aami deqsita numuk ten.

⁵⁸ Yallih Qibaadah-Qarit taamah yen mara kee Suleeman-taamat yen marak rade marak tuduurem, tittat sidiica bool kee sagla taban kee namma numuk ten.

^59-60 Dalaaya kee Toobiya kee Nakooda deqsita sidiica gulubuy Tel-Melac kee Tel-Carsa kee Karuub kee Addan kee Immar deqsitta magaaloolik yuduurehiyya lica bool kee kontom kee namma num akkuk yen. Takkay immay too mari Israayilik rade mara kinnoonumih digga mageytiminna.

^61-62 Seekah yooboke marak Cabaaya kee Hakkox kee Bardillay migaq luk yen gulub, seeka gacsaanamih digga mageytiminna. Bardillay deqsita gulubuy seekah gacsahiyya akak rade num, digibe saaku balli gulubul kaa muggaaqiseeniih, Bardillay kaak axcuk yenen. Ta mari inkih akak rade marih migooqa keenik mageytiminnaay; tonna-leemiik taahir ane waa maray seekat gacu duude waahiyyat ken loowen.

⁶³ Tohuk gexxaamah Yuudâ-baaxoh abba, «Urim kee Tummim deqsitta duyye qida sek yamaatem fanah, Yallih migaaqal sadgatah xayyoosan maaqo takmeenimih idni manton» keenik iyye.

⁶⁴ Marin baaxoy elle sugeenihiyyak Israayil marak yuduure mari tittat morootom kee namma alfi kee sidiica bool kee lactam num akkuk yenen.

⁶⁵ Oson taamat luk yenen maray ken lih yuduurehiyya sayim kee labimih fanal malcina alfi kee sidiica bool kee soddom kee malcina num akkuk yenen. Say mara kee lab maray gad kee saare abahiyya namma boolih num akkuk yuduure.

^66-67 Faaris malcina bool kee soddom kee lecey akkuk yeneeh; baakil namma bool kee morootom kee konoy akkuk yen. Gaali kaadu affara bool kee soddom kee konoy akkuk yen. Danoona kee okaale lica alfi kee malcina bool kee labaatanna akkuk ten.

⁶⁸ Ta mari Yarusalaamay YALLIH Qibaadah-Qari elle yanihiyya gufen waqdi, gulubwah saqoltik garab, Qibaadâ-Qari duma elle suge aracal nammeyhaak edde xisoonu waan mattaco yeceen.

⁶⁹ Too taama takke'gidih, dudda haanam abeeniih, tohih cato yeceen. Ta duyye tittat dahabak koona boolih kiilo kee, lakqok kaadu namma alfi kee bacra boolih kiilo kee, bool dallaabiyyay seeka haytahiyya mattacoh yeceen.

⁷⁰ Seeka kee Leewih yooboke mara kee, tonnah kaadu, gersi marak tu takkem dabqih Yarusalaam dariifa kee Yarusalaam addal gacen. Gad kee saare aba mara kee, Yallih Qibaadah-Qarit dacayrih yen mara kee, tonnah kaadu, Yallih Qibaadah-Qarit taamah yen mari dabqih Yarusalaam dariifal ten magaaloolil gacen. Tohuk raqqa 'ye mari duma ken kaxxa abbobti dabqih elle sugte magaaloolil gacen.