Qedra 10 - NABUWWA KEE MALIKWA

A MARAK DIGIBAANAMAK ELLE RAAQAN MALA MALISEN

¹ Qedra baaxok bagul afah radda 'yeh, Yallih Qibaadah-Qarih foocal aben umaanet yaabakaay, weeqak dooqa abak suge waqdi, Israayil ummattak labha kee agabu kee urruk mangom xaqul kaak gaabowwa 'yeenih kaxxam weeqen.

² Sarrak Yaciyél-Sekanya deqsita numuy Qeelam gulubuh gacsahiyya Qedrak iyyeemih, «Marin agabuk digibne waqdi, Yallay ni Dagelta kinnihiyyal imaan hee waynem deqsitta. Tohu'mmay uxih Yallal niya linoh.

³ Tanna kinnuk, taway ta agabuy ginnaaqot nabbixe kee keenit xalle xaylo buxak ninnik ken xiiriyennoomuh, Yallah qahdi cullay. Koo kee kok kalah yan maray Yallih amri yassakaxxehiyya aba nek axcinnaanim abenno. Yalla kinni ni Dageltih amri iyyam abenno.

⁴ A taama absiisaanam kol tan. Nanu koo katayennok, atu nee absis; a taamal digga 'xic» iyye.

⁵ Too waqdi Qedra, Sekanyak iyyem abaana'gidih, seekah abbobti kee Leewih yooboke mara kee kalah raqqa 'ye mara xibsiise.

⁶ Sarrak Yallih Qibaadah-Qarih foocay elle sugehiyyak ugutta 'yeeh, Qibaadâ-Qarik Elyaasib baxa Yahoocanan le goli fan gexe. Tokkel inkih yan bar, marin baaxok yuduure mari abeh yan umaaneh kaxxam qaadeh, maaqok ligat xiineeh, leek bakaarat xiine.

⁷ Sarrak, «Marin baaxoy elle sugehiyyak yuduureeh, away Yarusalaam kee Yuudâ rasul enna 'ya maraw, tikki 'taanamak Yarusalaam fanah ama» 'yaanamih farmo ruuben.

⁸ «Gulubwah saqolti titta geytaamah: ta amri oobba heeh sidooca ayroh addat amaate wee numuk edderra heem kaak beelon. Toh lih kaadu Israayil numuh maraaqay kedok awqele» 'yaanam axcuk keenih ruuben.

⁹ Sidooca ayroh addat, sanatak sagalhaytoh alsak labaatanhaytoh ayro, Yuudâ rasu kee Benyam rasul sugga 'te labha inkih Yarusalaam fan temeeteeh; Yallih Qibaadah-Qarih daaratal mododen. Too ayro kaxxa rob radeeh; takkay immay akah yemeeten qaadak maca net akkeleh kaxxam cunxiten. Kabuk teenak rob keenil radeeh; kabuk teenak maca net akkele meysih axaxo keenit hayte.

¹⁰ Qedra yemeeteeh foocal keenik sollu 'yeeh, keenik iyyeemih, «Isiniiy Yallak texxeereeniih, marin agabul rihimten. Duma abten umaanek gibdi umaane abten.

¹¹ Taway, abten dambik YALLAY sin kaxxa abbobti doorehiyyal uduura. Yalli faxam aba. Baaxol sin lih yan marin marak exxeera. Ken agabuy ginnaaqot tabbixeeni xiiriya; nikac keenik kala» 'yaanam keenik iyye.

¹² Usuk too yaabak gaba kale waqdi, kobxeh suge mari inkih anay fayya haak, «Atu nek inxicca 'tam inkih abnam nel tan.

¹³ Tonna'mmay ummatta mangoh taniih, rob kaadu radah yaniih, akkel gubbik bagul sollam dudnah manan. Ah kaadu mango mari gaba edde le dambi kinnuk, inki ayro kee namma ayrot gaba akak kalaanam hinna.

¹⁴ Tonna kinnuk abeh meqeemih, a caagid nek saqoltih yan mari Yarusalaamal elle raqqa 'yeh adda akak wagtam tayse. Sarrak marin marih agabu ginnaaqot le mari, keenih heen waktil, isih elle yan magaalak abbobtih yan mara kee cokmaaba gabat luk yamaatay. Tonnal Yallay ni Dageltah yanihiyya ahimih giddinaamak neh abe kaxxa naqabu neh cabele» iyyen.

¹⁵ Ta mari baahe mala, Qasahál-Yonaatan kee Tikwâ-Yacdeeya deqsitta labhak kalih mari inkih oggoleh. Masullam deqsita num kee Sabbatay deqsita numuy Leewih yoobokehiyya too namma numih qaxat gacen.

¹⁶ Ta marak kalih maray elle suge baaxok yuduurehiyya ta mala oggoleeh; too waqdi sek Qedra gulubwah saqoltih addak yeexegen mara doore. Sanatak tabanhaytoh alsak inikhaytoh ayro too maray dooreenihiyya ken akah dooren taama qimbisen.

¹⁷ Sidooca alsih addat marin marah yooboke agabu ginnaaqot yabbixe marih qaadak adda tabba 'yeenih yemeeten.

MARIN AGABUL RIHIME MARIH MIGAQ AH KAANA

¹⁸ Marin marah yooboke agabu ginnaaqot abbaxuk suge marih migaq ah kaana. Seekak marin marah yooboke agabu ginnaaqot abbaxuk sugtem, Maqseyaahu kee Elqeeder kee Yaarib kee Gedalya deqsitta labha. Too mari Yahuuxadák-Yaasuwa kee kay toobokok rade marak ten.

¹⁹ Ta mari marin marah yooboke agabuy ginnaaqot abbaxuk sugeeni cabeloonumih xagana culen. Edde asen dambih kaqalso takke'gidih, kulli num keenik maruw sadgatah yusguude.

²⁰ Immar deqsita gulubuk Canaani kee Dabadya deqsita namma num kaadu abbaxuk sugte.

²¹ Caarim deqsita gulubuk Maqseyaahu kee Eliyyas kee Samaqya kee, Yaciyel kee Quddiyya deqsita mari abbaxuk suge.

²² Fascur gulubuk Elyoqeenay kee Maqseyaahu kee Ismaaqil kee Netanel kee Yoodabad kee Elqasa deqsita mari abbaxuk suge.

²³ Leewî-kedoh yooboke marak, Yoodabad kee Simqi kee, Keelaya deqsita numuy bagulleytah Kaliita deqsitahiyya kee, Fatacya kee Yuuda kee Elqeeder deqsita mari abbaxuk suge.

²⁴ Yallih Qibaadah-Qaril saare abak yen marak Elyaasib deqsita num abbaxuk suge. Qibaadâ-Qarih dacayrit yen marak Sallum kee Teelem kee Uuri deqsita mari abbaxuk suge.

²⁵ Wohuk kalah tan ummatak: Farqos gulubuk Ramiya kee Yiddiya kee Malkiya kee Miyyamin kee Alqedar kee gersi Malkiya kee Banaaya deqsita mari abbaxuk suge.

²⁶ Qeelam deqsita gulubuk Mattanya kee Zakariyya kee Yaciyel kee Qabdi kee Yareemot kee Eliyyas deqsita mari abbaxuk suge.

²⁷ Dattuq gulubuk, Elyoqeenay kee Elyaasib kee Mattanya kee Yareemot kee Dabad kee Qadiida deqsita mari abbaxuk suge.

²⁸ Beebay gulubuk Yahoocanan kee Cananiya kee Dabbay kee Qatlay deqsita mari abbaxuk suge.

²⁹ Baani deqsita gulubuk Masullam kee Malluk kee Qadaaya kee Yaasub kee Saal kee Yareemot deqsita mari abbaxuk suge.

³⁰ Facat-Mooyab deqsita gulubuk Qadna kee Kalal kee Banaaya kee Maqseyaahu kee Mattanya kee Baxalel kee Binnuy kee Manasse deqsita mari abbaxuk suge.

^31-32 Caarim deqsita gulubuk Elqeeder kee Yissiya kee Malkiya kee Samaqya kee Simqoon kee Benyam kee Malluk kee Samarya deqsita mari abbaxuk suge.

³³ Casum deqsita gulubuk kaadu Mattanay kee Mattatta kee Dabad kee Elifalat kee Yareemay kee Manasse kee Simqi deqsita mari abbaxuk suge.

^34-37 Baani deqsita gulubuk Maqdi kee Qamram kee Uuwal kee Banaaya kee Beedaya kee Kaluhi kee Wanya kee Mareemot kee Elyaasib kee Mattanya kee Mattanay kee Yaqsaw deqsita mari abbaxuk suge.

^38-42 Binnuy deqsita gulubuk Simqi kee Selemya kee Naatan kee Qadaaya kee Maknadbay kee Sasay kee Saray kee Qadrel kee Selemya kee Samarya kee Sallum kee Amarya kee Yuusuf deqsita mari abbaxuk suge.

⁴³ Nabo deqsita gulubuk kaadu Yaqiiyal kee Mattitya kee Dabad kee Dabiina kee Yaddaw kee Ayyuqel kee Banaaya deqsita mari abbaxuk suge.

⁴⁴ Ta mari inkih ginnaaqot abbaxuk yenem, marin marah yaabuke agabuk ten. Nikac keenik kaleeniih, keenit xalen xaylo kaadu buxak xiiriyeenih.