Qedra 1 - NABUWWA KEE MALIKWA

KOORIS YUUDÂ-MARAK «ISINNI BAAXO UDUURA» IYYE

¹ Duma Nabi Ermiyaas, «YALLI annah tanim abele» axcuk edde yaabeh sugem numma takke'gidih, Fursi-malikiy Kooris deqsitahiyya edde dardaare naharsitto sanatat, isi baaxol enna 'ya marah farmo warsaana'gidih, sinam ruubeeh; kaadu warkatal too farmo yuktubeh ruube. Toh abaamih fayxi kaat haytem YALLA.

² Too warkat axcuk yeneemih, «A warkatal yan amri taceem, yooy Kooris migaq leeh, Fursi-malik kinnihiyya. YALLAY qaraanal yan Dagelta kinnihiyya inkih yan baadak abba yoo abeeh; Yuudâ-rasuk Yarusalaam magaalal kay Qibaadah-Qari xisaamih abbootan yoh yecee.

³ Kay ummattak, Yalli sin lih yanay! Tonna'mmay Yarusalaam fan gexxa xicay, YALLAY Israayil doore Dagelta kinnihiyyay Yarusalaam magaalal yanihiyya luk suge qari nammeyhaak xissaanamah idni siinih acee.

⁴ Yallih marak elle yanin marin rasuk isi baaxo yaduurem faxa mari yenek, ken cuggaaneh yan marak, isinni baaxoh akah yaduuren innah, cato keenih aba. Dahab kee lakqo kee, taama edde aban duyyeey, merraytu kee saq keenih ucuya. Tonnah kaadu, Yarusalaam magaalal Yallih Qibaadah-Qarih isinni fayxiik ruuban duyye mattacoh keenih ucuya. Ah tuktubem yoo Fursi-maliki» 'yaanam yuktubeh ruube.

QIBAADÂ-QARI NAMMEYHAAK XISEN

⁵ Tohuk lakal Yuuda kee Benyam kedoh abbobtiiy, seekaay, Leewih yooboke mara kee, tonnah kaadu, Yalli fayxi edde hee mari inkih, YALLIH Qibaadah-Qariy duma yiddigilleh sugehiyya xisaana'gidih, gexoh bical gacen.

⁶ Ken cuggaaneh suge mari mango duyye catoh keenih yeceeh; lakqok bicsen duyyeey, dahabaay, taama edde aban duyyeeyaay, merraytu kee saq kee, kalah tan duyyey limo gibdihiyya keenih yeceen. Tohuk kalah kaadu, Yallih Qibaadah-Qarih isinni fayxiik ruuban duyye keenih yeceen.

⁷ Nabkadnessar deqsita malik, duma YALLIH Qibaadah-Qarik beeh suge mingilwa, usuk isih Yalla axcuk aqbuduk yen duyyeeyah qibaadah qaril heeh suge. Malik Kooris too duyye wadir woo qarik bahsissa heeh keenih gacse.

⁸ Malik Kooris too mingilwa bahsissa heeh Mitradat deqsita numih gabal hee. Mitradat qibaadâ-qarwak kadna gabat akak yan numuk ten. Too num too mingilwa lowwa heeh Sesbaxxar gabal hee. Sesbaxxar, Yuudâ-kedok abbah yan numuk ten.

^9-10 Looweenih Sesbaxxar gabal heen duyyek, dahabak bicsen kaxxa sacnitte soddom akkuk ten. Lakqok bicsen kaxxa sacnitte alfi akkuk ten. Lakqok bicsen distitte labaatanna kee sagal akkuk ten. Dahabak bicsen qunxa sacnitte soddom akkuk ten. Lakqok bicsen qunxa sacnitte affara bool kee taban akkuk ten. Wohuk kalah tan duyye alfi akkuk ten.

¹¹ Sesbaxxar kee kaak kalih maray duma seewah beenih sugeenihiyya, Baabeloonuk Yarusalaam magaala fan gexen waqdi, dahab kee lakqok bicsen mingilwak tittat koona alfi kee affara bool takkem luk gexen.