Qaamus 9 - NABUWWA KEE MALIKWA

YALLIH COKMI

¹ Qaamus kaadu qagseh iyyemii, «Goyti sadgat elle aban mansafih xaqul soolah uble. Too waqdi iyyeemih: ‹Dooqa elle aban qarih culmah ranko tangayyem fanah, qari elle soola qamiddu utuk. Butukka haay qari sinaamal akah yaddigille innah ab. Too qari elle yiddigille marak kalih maray raaqehiyya anu seefit seleyyo. Yaawweenimih mayasilliman. Yasillimeenim yakkaleenimih rabak mawaddiiman.

² Baaxo dagga heenih ardik guba gacaanamah, tokkek handifeh ken ayyaaqeyyo ikkal ken macaba. Qaran yawqeenimih ken gacseyyo.

³ Karmel deqsitta kaxxa qaleh amo yawqeeniih sasan way, gorrissa ken heeh ken gacseyyo. Adda le badat culla 'yeenih yok sassaanam gabbatan way, badak addal yan gawi keenit ara'gidih amriseyyo.

⁴ Qaduwwi seewah ken beya way, tokkel seefit ken qidsiiseyyo. Tahak wadir ken mawaday, ken baatih ugteyyo› iyye» 'yaanam iyye.

⁵ YALLAY Dagelta kinnih, Nabaamak Nabahiyya baaxol inti haa waqdi, baaxo diyaayak sutta inta. Niil weeqayti leek yamagge saaku elle koramkorsima'nnal, baaxo kabuk kabul koramkorsimta. Teetil yan mari inkih weeqa.

⁶ YALLI isi dabaq qaraanal hee. Baaxok dagal hawa xiseeh, daabiseh. Baddi lee qaran eyyeqqa hayteeh, wadir baaxol tet oobissam kaa. Toh inkih abtam YALLA kinnim ixiga.

⁷ YALLI iyyemii, «Israayil ummatey, isin Kuus marih bis yol maay aalle waytan? Sin Masri baaxok akah eyyeeqe innah, Filistiin mara Kireet rasuk eyyeeqeeh, Suuriyah mara kaadu Kiir rasuk eyyeeqe.

⁸ Yoo YALLAY Mulki le, ahaysa Israayil ummatay yab aabbe sinnihiyyal inti haam faxa. Israayil ummat baaxô-bagul macaba. Takkay immay Israayil nasab inkitanuuk mabaysa. Tah intam yooy YALLA kinni.

⁹ Israayil mara yanfiyen daroh innah ken anfiyeyyo. Marin marih addat ken fixixise waqdi, ken addak uma mara ayyaaqeyyo.

¹⁰ Yi marih addak too dambi le maray ‹Umam net matakkaay tu nee maxagta› iyyahiyya seefit seleyyo» iyye.

ISRAAYIL MARI ISI BAAXO ADUURELE

¹¹ YALLI iyyamaa, «Dawud dardaarinnay yiddigille qarih innah yiddigillehiyya edde xisu waa wakti amaatele. Gaso akak xiseyyo. Abur wadir akak aqusbuuseyyo. Duma akah suge'nnah gacseyyo.

¹² Too waqdi Edom rasuk raqtem kee, yi migaaqal elle dardaarak sugga iyyen baaxooxa Israayil marih im abeyyo. Tahat yabtam yoo YALLAY ah duudusu waahiyya» 'yaanam iyya.

¹³ YALLI kaadu iyyamaa: «Daro toobokem kee orobtem inki adda edde takku wayta wakti amaatele. Qinab xala coox mango qinab xaleleeh; woo qinabak kamri ummaan way edde bicissu wayta wakti amaatele. Qaleelak salfa le qinab-kamri tif axcele. Koomaami qinab-kamri darah innah caxitele.

¹⁴ Israayiliy yi ummat kinnihiyya le baaxoh gacseyyo. Tiddigille magaalooliy abur tekke wadir xiseloonuuh; addal dabaaqah akak gacelon. Qinab aysubukeloonuuh, qinabak bicsen kamri attaaqabbelon. Mango coox aysubukeloonuh xaylo akak akmelon.

¹⁵ Israayiliy yi ummatah tanihiyya dumaak ikoytah keenih ecee baaxo gacissa ken heeh, dabaaqah ken elle daabiseyyo. Tohuk wadir tokkek mayarraanaay elle anelon. Tahat yabtam yoo YALLAY sin Dageltah yani» 'yaanam iyya.