Qaamus 8 - NABUWWA KEE MALIKWA

KUDAARAK KIBUK YAN KAFAQ UBLE

¹ Qaamus kaadu qagseh iyyemii, «YALLAY Mulki le kaadu gersi sirri yoo yuybullee. Too waqdi kaadu sirrih ublemii, kafaqay kudaarak kibuk yanihiyya uble.

² Too waqdi YALLI yok iyyemii, ‹Maca table?› yok iyye. « ‹Kudaarak kibuk yan kafaq ableh an› 'yaanam exce. «Too waqdi yok iyyeemih: ‹Yi maray Israayilih yoobokehiyyah ellecabo gufteh. Tahaysa ken digaaleyyo ikkal, wadir akak maxca.

³ « ‹Yi cokmih ayro, malik qarih addal yakke saxxaq, weeqa keenil akkele. Mango marih ginaada kulli aracal qangalaylut raaqele. Raysitte kulli ikkel mamaxxaage sinnim qidimih sugele›. Tah intam YALLAY Mulki lehiyya.

⁴ «Tonna-leemiik, isin masaakiina yadlumeeh, tu-maleela baaxok yayyaaqem faxa maraw, a yab oobbeya.

⁵ ‹Daro limmosna'gidih, alsi edde bila qiidih edde asna ayro xayuk nek gexinnay› 'yaanam intan. ‹Daroora limmosna'gidiiy tuk teena milaaguh (libaakih) edde geyna'gidih, sabtih akah asna qiid xayuk gaba nek kalinnay› intan. ‹Too waqdi, daro elle keexna keexok addah heenno'mmay, mango lakqot limmoysenno. Miizaanak makot yan miizaanal daro keenit kalak sugenno.

⁶ Caffa kee daro tittat esgella hayneh sinaamat xaamenno. Mago edde lino masaakiinay mago tagdiyu teffere woo magoh aftok ninni naqoosa abenno. Woo mago ibat lon kabeelih limo gide takkem kinni-way, ninni naqoosa ken abenno› 'yaanam intan.

⁷ «Tohuk gexxaamah, YALLAY Yaqkuubuk-rade-mari-yassakaxxehiyya isi migaaqal xiibiteeh, iyyemii, ‹Sin taama aaxigeeh, mahawweena.

⁸ Sin qamalak gexxaamah baaxo angayyele. Baaxol enna 'ya mari inkih weeqele. Niil weeqayti leek yamagge kee salca saaku akah yangayye'nnah, inkih tan baaxo digaalah angayyele.

⁹ Yi cokmih ayro, laqo ayro suteleeh, wallaqenta baaxol dite qideyyo. Tah intam YALLAY Mulki lehiyya.

¹⁰ Qaffaydah abak tenen farcatih aftok rookitetton. Saxxaq elle abak tenen ikkel, boogisetton. Dubuk lon baxi akak rabe xaleenah innah boogisettoonuuh, amo isinnik molla hayteenih *qabuudut sartanah gacetton. Too ayroh ellecabo mameqeey, qeero siinit aallele.

¹¹ « ‹Baaxol qulul edde radu waa ayroora xayih. Too waqdi ummat qululeleeh, bakaaritele. Takkay immay too bakar kee qulul ken akah yabbaxu waam, maaqo kee leê-wayti hinnay, YALLIH qangarah wayti kinni. Tahat yabtam yoo YALLAY Mulki lehiyya.

¹² Ummat inkih, kilbat le kabuuk gabbi-qaxa kee ayrô-mawqa kee ayrô-culma le kabul, bad kee barril meekitelon. YALLIH qangarah goranah kulli ikkel qayyaawelon. Takkay immay yi qangara mageyan.

¹³ Too ayro qaafiyatak nagay tan furrayna kee, duddu hee baxuwih agantah bakaarak gexxaamah boolaatelon.

¹⁴ Too ayro Samaariyal tan ceelo iyyaah Daan mari yaqbudem iyyaah, Bersabaq-dageltaw axcuk yaqbuden duyyeh migaaqal xiibita mari inkih bayele. Too baatik muugutan› 'yaanam yok iyye» iyye.