Qaamus 7 - NABUWWA KEE MALIKWA

QANAYTI YAMAATEM UBLE

¹ Qaamus kaadu iyyemii, «YALLAY Mulki lehiyya sirri yoo yuybulleeh; tohu, malik daro orobba 'teh nammayhaytô-daro edde taabuke waktit, Yalli too darot qadad sinni qanaytu ruubah uble.

² Too qanayti too baaxol ubukku 'teh anxaxxowwa 'tam inkih selli haam uble. Toh uble waqdi, dooqa abeeh exceemih, ‹YALLAW, Mulki le Dageltaw, ummat bahte dambik qafu keenih ab. Israayil ku ummataay; dago mara kinnoonuuh; tohuk gexxaamah ahak elle raaqan inna maloonuk, qafu keenih ab› 'yaanam dooqah exce.

³ «Too waqdi YALLI keenih racmateeh, keenil ruube raare bala matakka iyye. Yok kaadu, ‹Ama qanaytuy tublehiyya keenit maruuba› 'yaanam iyye.

YALLI GIRA RUUBAM UBLE

⁴ «Tohuk kalah kaadu gersi sirri yoo yuybulle. Too saaku kaadu ublemii, YALLAY Mulki le ummat girat digaala'gidih bicat yanim uble. Too gira baaxok guba raaqa kaxxa bad akamih uble. Too badak gaba kalte waqdi baaxo kaadu cararisah uble.

⁵ Too waqdi dooqa abeeh, dooqah excemii, ‹YALLAW, Mulki le Dageltaw, ku maganah a gira bargus. Israayil ku ummataay dago mara kinnoonuuh; tohuk gexxaamah ahak elle raaqan inna maloonuk, a gira keenik bargus› 'yaanam exce.

⁶ Too way YALLI keenih xuwaaweeh, ‹Ruube raare girah bala matakka› iyye.

MIIZAAN UBLE

⁷ «Wohuk kalah gersi sirri yoo yuybulle. Too sirril xisen gidaarih xaqul Goyta soolah uble. Woo gidaar missat xiseenim kee xise weenim elle yaaxigen miizaan gabat abbaxih kaa uble.

⁸ Too waqdi YALLI yok iyyemii, ‹Qaamusow, maca table?› yok iyye. ‹Gidaar xisan waqdi makot tanim kee ane waytam elle yaaxigen miizaan able› exce. Too waqdi YALLI yok iyyemii, ‹Hay tonnal, anu ta mansafat Israayil mari makot yan mara kinnim aybulleeyyo. Tahaysa ken digaaleyyo ikkal, wadir akak maxca.

⁹ Israayil ummat qibaada elle abta aroocay taahirik tanihiyya addigillele. Iscaak durruyyatih qibaadah arooca abur akkele. Yarobqam kee kay dardaarinna inkitanuuk finqa abeyyo› 'yaanam yok iyye» iyye.

QAAMUS KEE AMAXYA

¹⁰ Too waqdi Beetal magaalal kaxxa seekih yen Amaxya deqsita num, Israayil malikiy Yarobqam deqsitahiyyah farmo ruube. Farmoh kaah ruubemii, «Qaamus akak iyyan num Israayil marih addat gacca 'yeh, kok abu waamih malat yan. Kay yaabat ummat aylahitta 'teh baaxo baatam faxxa.

¹¹ Qaamus, ‹Yarobqam carbit rabeleeh, Israayil ummat carbit xabba heenih seewah beelon› 'yaanam iyya» inta farmo kaah ruube.

¹² Sarrak too sek Qaamusuk iyyemii, «Ahaysa sirri yable numow, abtem koo xiqtahak idiy. Faxxek, Yuudâ baaxo fanah gexay, ama table sirri wokkel waris. Maaqok woo mari koo adoobisay.

¹³ Takkay immay Beetal malik qibaada elle abaah, ummat dooqa elle abta qari kinnuk, tahaysa tokkel sirri uble 'yaanam maxcin» 'yaanam iyye.

¹⁴ Too waqdi Qaamus kaak iyyemii, «Anu lac kee subla dacrisa num kinniyo. Nabi hinniyooy, nabuwwal yimixxige marih num hinniyo.

¹⁵ Takkay immay illi elle duwak suge ikkek YALLI isih yoh secca 'yeh, ‹Gexay ama table sirri Israayil ummatah waris› yok iyye.

¹⁶ «Tonna'mmay taway kaadu YALLI iyyem koh warisu waak yoo oobbey. Atu, ‹Iscaakak rade marah isih tuble sirri mawarsinaay, Israayil ummatat takku waytaamat mayaabin› yok inte'mmay,

¹⁷ YALLI kok iyyem koh warisu waa. ‹Barra kok a magaalal xiiqareh-xiina akkele. Xalte xaylo carbit kok rabele. Ikoytah lito baaxo qaduwwi kok kureenih keefelon. Atu kaadu diini-maleelah yan marih baaxol rabetto. Israayil marah tu gactek, carbit xabba ken heenih seewah ken beelon› 'yaanam iyye» kaak iyye.