Qaamus 6 - NABUWWA KEE MALIKWA

YALLI ISRAAYIL BAYSELE

¹ Qaamus kaadu iyyemii, «Siyoonul meqe manoh tan abbobti kee, Samaariyal raacatat tan abbobtiy, siinit takku waytam abletton. Israayiliy kaxxa doolatah tanihiyyak kaxxa mara kinniton. Catoh sinam siinih tamaateemih, siinit takku waytam abletton!

² Kalne deqsitta magaala fanah gexay wokkel tanim ubula! Wokkek bisoh taturra 'xicay Camat deqsitta kaxxa magaala kee Gaat deqsitta magaalay Filistiin mari elle yanihiyya fanah gexay tanim ubula. Woo mari siinik maay yayseeh, ken baaxo sin baaxok maay taysee? Mataysa.

³ Isin, ‹Ahaysa uma ayro matamaata; temeetek kaadu xayuk matamaata› 'yaanam intaanah, tohuk gexxaamah uma-taamat assan. Sin uma-taama woo ayro xayyoysele'mmay, siinit takku waytam abletton.

⁴ Maaqo xagtan waqdi elle inaaqittaanam, dakani moddiinik bilqisen kaqaadiidi. Maaqoh akah taniinim, qunxa illi kee nagay mulkuqusen rugaageh cadooy; elle taniinim, raacat le koraasih bagu.

⁵ Dawud akah abak yene'nnah, kirar aagaruk gad abtaanaah, isi taagah qusba gadih bica abtan.

⁶ Qinabak bicsen kamri kobbaayatal mataaqubaanay buxux le kaxxa sacanil taaquben. Sukutik meqe sukutit isinni taskuten. Takkay immay Israayil ummat edde tan biyak siinih mayambullaay, akah mabiyaakittan. Tamahak gexxaamah, siinit takku waytam umaamaay abletton!

⁷ Tohuk gexxaamah naharat baaxok tawaqu waytaah tankiliqu waytam siini. Too saaku a saaku edde tanin farcat kee raacat gaba kalelem taaxigeenimi» iyye.

⁸ Qaamus kaadu iyyemii, «YALLAY Mulki leh Nabaamak Naba Dagelta kinnihiyya isi migaaqal xiibiteeh iyyemii, ‹Israayil mari abah yan kaxxiina nabam inqibeh an. Oson dabaaqah edde yanin kaxxa qarwa ablem sakkih yol tan. A saaku dabaaqah elle yanin inaytah tan magaala kee tet addal enna 'tam inkih, naqboytit gabal keenik heeyyo› 'yaanam iyye» keenik iyye.

⁹ «Too saaku raaqe marak inki qaril tabna num tenek, inkih rabelon.

¹⁰ Rabe marah ramad le numuy magaq absiisahiyya ginaada qari addak yayyaaqu waa waqdi, woo qarih addal rabak saaboh raaqe numuk, ‹Kok sah rabak raqtem maay tan?› axcele. Esseren num, ‹Yok sah raqtem matan› kaak axcele. Too waqdi naharak essere num, ‹Wohoysa YALLIH migaq xagnam nel matanak, tibba 'xic› 'yaanam kaak axcele.

¹¹ «Tonnal YALLI elle amrise'nnal, qunxa qarwa kee kaxxa qarwa addigillele.

¹² «Faaris booloh amol yardem mabicta. Bad awurwat yabqureenim mabicta. Hay, isin qadaalat summi celsissan; qado-numma qeero le intan.

¹³ « ‹Lodabar magaala nibbixeh› axcuk elle tirtirissan. ‹Karnaayim magaala ninni qandet nibbixe› axcuk hidah elle rabtan.

¹⁴ Takkay immay YALLAY Nabaamak Naba Dagelta kinnihiyya isih iyyamaa, ‹Israayil ummatey, baaxo qeebit siinik yabbixeeni'gidih, marin marak qaduwwi siinit ruubeyyo. Too qaduwwi, Camat deqsita daabay gitah gacaanahiyyak xabba haanamaay Qarabâ-dora deqsitta'kkeh amma 'yaanam fan, baaxo xabba siinik heenih siinit xukkutelon› iyya» 'yaanam iyye.