Qaamus 5 - NABUWWA KEE MALIKWA

TOOBITA!

¹ Qaamus kaadu qagseh iyyemii, «Israayil ummatey, siinit takku waytaamah takke booge ankacisa.

² Israayil ummat seefit tinnikisseeh, ahaysa uguttam madudda. Ken baaxol dibu ken cabeeniih; ken cattaah, ken ugussam matan.

³ Macaay inteenik, YALLAY Mulki le iyyamaa, ‹Israayilik inki magaalak alfi takke qaskar gaaduh gexele. Takkay immay too qaskarak, booluk biso yakke mari mayaduura. Bool qaskariiti gaaduh akak gexe magaalak, tabna qaskariiti aduurele› 'yaanam iyya.

⁴ «YALLI Israayil ummatak iyyamaa, ‹Yol uduura. Yol tuduureenik, mano geetton.

⁵ Bersabaq fanah qibaadah magexina. Beetal magaalal kaadu qibaada maabina. Macaay inteenik, Beetal foyyâ magaala akkele. Gilgal kaadu magexinaay, Gilgal magaalal dabqih yan mara seewah beelon› iyya» 'yaanam iyye.

⁶ Qaamus iyyemii, «Maabinay YALLAL uduura. YALLAL tuduureenik, mano geetton. Toh cinteenik, Israayil ummatal Yalli, giray sahda takmehiyya siinil akkele. Beetal magaalal yan mari girat laqlaqimele. Woo gira keenih bargusa mara mageyan.

⁷ Cokmi makot beyaah, numma diraabat milaaga maraw, abletton.

^8-9 «Adal deqsitta cutuuka gintem YALLAAY; Malcino qaran bagul haytem kaa. Bartî lakal saaku gintaah, maaci lakal bar gintam kaa. Baddi lee qaran eyyeqqa hayteeh, wadir baaxol tet oobissam kaa. Cayla-leela bayissaah; reebuh lon gasoosa taggilem kaa. Toh YALLA kinnim ixiga.

SIN TAAMAT YABNA

¹⁰ «Cokmi maroh addal, ceele-wayti yassacakke mara tanqibeeniih, nummat yaaba mara tablen waqdi sakkittaanah!

¹¹ Masaakiinah cakkit taaqiteeniih, daro keenik dirkih beyya haytaanah, isinnih haysittan. Tonnal, ama gabah oren xeetik bicsitten qarwat buxah magactan. Meqe qinab tuysubukeenih taniini'mmay, tuysubuken qinabak bicissen maqab mataaquban.

¹² Abtan umaane kee dambiy edde taniinihiyya siinik yemeggeh yanim digga haa. Meqe marih amot gactaanaah, xakaake ken kaltaanaah; guqul takmeeniih; masaakiina cakki waysissan.

¹³ Ta wakti uma wakti kinnuk; tonnah tanim takkem yable waqdi, tibbat raaqe num bagi kas gee numu.

¹⁴ «Nummâ manoh xintaana'gidih, meqeemik sah umam maabina. Toh abteenik, away isin elle intan inna, YALLAY Nabaamak Naba Dagelta kinnihiyya nummah sin lih anele.

¹⁵ Umam inqibaay, meqem ikcina. Cokmi maroh addal, cokmi qadaalatat akah yakke'nnah aba. Tonnal YALLAY Nabaamak Naba Dagelta kinnihiyya Israayil ummatak baatik saaboh raaqe marah yamqem takkeh. Keenih racmatam takkeh.

¹⁶ «Tohih giddinaamak, YALLAY Nabaamak Naba Dagelta kinnihiyya iyyam siinih warisu waa. Gititteh addal sahda abta weeqa kee booge antaabbele. ‹Woyyow! Boogeew!› axcelon. Rookah aban weeqal yimixxige marah seecelon. Buqre abta buqre-abeenitih kinni way, rookat gaba yassagalleeni'gidih seecelon.

¹⁷ Qinab elle aysubukuk yenen baaxol ummat weeqat sugele. Ah siinit akah takkem, anu sin digaala'gidih sin adda gace waqdi. Toh intem YALLA» keenik iyye.

YALLIH COKMIH AYRO

¹⁸ Qaamus qagseh keenik iyyemii, «Isin YALLIH cokmih ayro qambaala maraw, woo ayro diteh tan ayro'kkal, meqe ayro hinnaay; woh abletton!

¹⁹ Too ayro, naharak lubak afal gaceeh, lubaakak yisillimem yekkele waqdi, kabqih afal gaceeh; kabqik isillimeh ahaysa buxa wadbiteh iyye waqdi, qari afal sugte abeesa edde arte numih ceelallo siinit akkele.

²⁰ YALLIH cokmi yakku waa ayro ditek sah, ifi magacaay, baaxol kaxxa dite radele.

²¹ «YALLI iyyamaa, ‹Sanatal abtan qiid siinik inkinnah faxah maan. Diini migaaqal abtan modod yol sakkih yan.

²² Cado akak carrisan sadgat kee, daro yi migaaqal sadgatah bahtan way, anu siinik moggola. Gablusen saqih sadgat siinik moggola.

²³ Yoh abtan saare wonnah yok beya; aabbem mafaxak. Kirar aagaruk yoh abtan saare siinik maraabita.

²⁴ Toh cabba haay qadaalat le taamah taamita. Cakkik tanim aba. Cakki baatam hinnaay; kulli way darah gexxa leeh inna.

²⁵ « ‹Israayil ummatey, morootom sanatih gide, bacarih tan baaxol foocat siinik gacca exceh beyak sin suge saaku, sadgat siinik maay faxee?

²⁶ Awayah tu gactekiiy, malikih yan yalla akak intan Sakkut deqsittaamih ceelo kee, Kaywan deqsittaamih ceeloy cutukti-yalla akak intaanahiyya tuqbudeenimih sabbatah, too ceeloh quukat gacetton.

²⁷ Toh abtoonu waytaanam, Damaskok daga raqta baaxo sin askiliqu waa saaku. Ahat yabtam yoo YALLAY Nabaamak Naba Dagelta kinni› 'yaanam iyya» iyye.