Qaamus 4 - NABUWWA KEE MALIKWA

¹ Qaamus kaadu qagseh iyyemii, «Gabâ-qaysoh yabbixen laahih innah arooduh gace Samaariyah rasul yan agabow, siinik axcem liyok ankacisa. Boola le maral umam bahtan. Masaakiinat xukkuttan. Gennaaqot sin tabbixe labhak, ‹Gexay kamri neh baaha› intan.

² Tohuk gexxaamah, YALLAY Mulki leeh *taahirik yanihiyya siinik iyyamaa: ‹Sanat santiita siinik hayya heenih, gillaabat badak addak yayyaaqen kulluumih innah, sin giitak beyoonu waan ayroora amaatelem ixiga.

³ Too ayro kulli barra siinik beeloonuuh, xayi'kket siinik aninnaan gasoh foxok sin eyyeqqa heenih, Carmon deqsita aracat sin qidelon› axcuk siinih xiibita» 'yaanam keenik iyye.

ISRAAYIL MARI YAKKEEMIK TU ABE CINEN

⁴ YALLAY Mulki le iyyaamah, «Israayil maraw, fardi siinit celtek, Beetal gexay dambit asa. Gilgal gexay, dambik dudda hayteenim aba. Yok wayteenik, maacak maaca sadgatah lac baahay qidaay, sidochaytoh ayro dakaat ucuya.

⁵ Ahaysa wadir maxcina! Candi gacsah Yallih sadgatah bahtan gaqambok maadayinay baaha! Ahak kalah sadgatah bahtaanamal tirtirisa. Toh hinnaa, isin kaxxam edde takkaleenim!» 'yaanam keenik iyya.

⁶ YALLI qagissa heeh iyyaamah, «Anu afah xagtan maaqo waysissa sin heeh, inkih tan magaaloolit siinik qulul ruube'mmay, toh ubulla hayteenih yol maaduurinniton.

⁷ Daro edde taabuke alsittet rob sin waysiise. Magaalak teenah rob eceeh, magaalak teenal rob waysiise. Buqre baaxok baaxok teenah rob eceeh baaxok teenah kaliteh.

⁸ Tohuk gexxaamah, mango magaaloolih mari kaxxa bakar ken yibbixe waqdi, lee elle geeloonum yekkelen magaala gexeeni'mmay, lee elle magennon. Toh inkih abalih yol maaduurinniton.

⁹ «Tooboke daroy orobe'kah tanihiyyat kaxxa caacoy kafissu waytahiyya ruube. Kudaaray yoobokehiyya kee qinab xaylo kafissa heeh; *daytuun kee *sublat inkih qanaytu ruubeeh too qanayti selli hee. Takkay immay tah inkih abalih yol maaduurinniton.

¹⁰ «Duma Masrit ruube bala siinit ruube. Labha siinik carbit akah rabta'nnah abeeh, ken raysay baaxot qideenihiyya elle tiffidigen aracal uma'nnah abicte. Qeebi edde abtan faaris qeebi addat akah yabbixen innah abe. Hay, toh ubulla hayteenih yol maaduurinniton.

¹¹ «Sodom kee Gomorrâ magaalooli akah bayse'nnah, mango mara siinik bayseh. Isin raaqe marak, girak raaqe bocoyti innah, radda balah addak raqten. Hay, toh ubulla hayteenih yol maaduurinniton.

¹² Hay, siinit abeh anim kaxxa digaala. Yooy sin Dagelta kinnihiyya cokmi siinil abam faxa'mmay, bical gacay suga» keenik iyya.

¹³ Qaleela tuklukeeh, silaytu gintem, YALLAY Nabaamak Naba Dagelta kinnihiyya. Sahdayti rooci ginteeh; abu waam sahdaytuh warissam kaa. Ayrô-diifuk ditel korissam kaa. Baadal inkih mulki lem kaa. YALLAY Nabaamak Naba Dagelta kinni abam cubbusa!