Qaamus 3 - NABUWWA KEE MALIKWA

¹ Nabi Qaamus iyyeemih, «Israayil ummattay YALLI Masrik yeyyeeqehiyyaw, siinit takku waytaamay YALLI naharal garci siinih akak kalahiyya ankacisa.

² YALLI iyyaamah, ‹A addunyal enna 'ya marak inkih addak dooreeh dacrisam siini. Tonna-leemiik abba haytan dambih sin akah digaalu waam, toh kinnim ixiga› siinik iyya» keenik iyye.

NABI LE TAAMA

³ Qaamus qagseh keenik iyyemii, «Safar titta lih abam faxa mari gexo edde aban uddur naharak titta lih aaxige'kal safraanam bictaa? Mabicta.

⁴ Admoh yakmem gee'kal, garboh addal lubak annaak maay garada? Magarda. Gablah addal admoh yakmem alle waa lubak annaak maay garada? Magarda.

⁵ Kimbiro teetih heen ofloh addat takme maaqok tuk teena able'kal, kaqqa 'teh addat raddam bictaa? Mabicta. Tabbixem aalle wayta oflo annaak maay alfintaa? Malfinta.

⁶ Carbi yaniimih warsah kaayisan baanta magaalah addal kaayisan waqdi, ah yaabbeh meysite waa num maay yan? Mayan. Yallih amri maleh magaalat umam takkem bictaa? Mabicta.

⁷ Tonna'mmay YALLAY Mulki le kaadu, nabuwway kay naqoosah tanihiyyah takku waytam naharal warse'kal tu maaba.

⁸ Lubak gardam yaabbe way meysite waa num mayan. YALLAY Mulki le yaabe waqdi, kaak yoobbem ummatah warse waa nabi mayan» 'yaanam iyye.

SAMAARIYAH-MAGAALAL TAKKU WAYTAAMA

⁹ Qaamus qagseh, «Asdood magaalal tan kaxxa qarwah adda kee Masri rasul tan kaxxa qarwah addal yan marak, ‹Samaariyah xaqul yan qaleelal gaaboowa. Wokkel tan amaan-sinna kee ummat abta umaane wagita› inxicay awadah keenih warisa» iyye.

¹⁰ YALLI iyyamaa, «Numma akak inxicca 'yaanamak, isinni yeyxeere mara kinnon. Marin im dulmi kee qandet beyaanaah isinnih haysitan. Edde yaddereenim, marin imi.

¹¹ Too umaane kee baatiliy oson abaanahiyyak gexxaamah, qaduwwi baaxo keenik marot heeleeh, naqboyti culaamak magaaloolit maroh sugte gasoosa butukka keenik heeh qarwa keenik buubele. Tah intam yooy YALLAY Mulki le kinni.

¹² «Illi duwa-num, lubak afak namma lak takkuu, aytik exxa takku, saaboh elle raaqisa'nnal, Israayil maray Samaariyal dabaaqah yanihiyyak saaboh raqtu waytam, qarkaytoh iba» 'yaanam iyya.

¹³ YALLAY Nabaamak Naba Dagelta kinnihiyya iyyaamah, «Yaqkuubuk rade marah garci kala.

¹⁴ Israayil mari abe dambih digaalu waa saaku, Beetal-magaalal tan sadgat elle aban arooca keenik aggileyyo. Sadgat elle aban aracak affara ruknil tan gaysoosi bututtukka axceleeh; baaxot radele.

¹⁵ Cagayak-cagay elle gacan qarwa kee, gilalak-gilal addal akak dabaaqah gacan qarwa keenik bututtukka heeyyo. Dakani moddiinit bilqisen qarwak tu maraqtay, bututtukka axcele. Mango qarwa addigilleleeh, suge wayteh innah gacele» 'yaanam YALLI iyya.