Qaamus 2 - NABUWWA KEE MALIKWA

MOOYAB MARAL YEKKE COKMI

¹ Qaamus qagissa heeh iyyemii, «Aham YALLI iyyaama. ‹Mooyabah yooboke mari fiiruk geerah dambi le taama abeenih; tohuk gexxaamah ken digaaleyyom digga le. Edom amoytih lafat gira ruubeeniih noora akak bicsen.

² Tohuk gexxaamah, Mooyab rasut gira ruubeyyo. Karyot deqsitta magaalal tan megdebittet gira ruubeyyo. Mooyab-mari baantay tamugguree kee carbi addat takke tirtirah addat ambaxelon.

³ Mooyab rasuk abbah yan num kee baaxol tan makaabon qidsiiseyyo› iyya» 'yaanam iyye.

YUUDAL YEKKE COKMI

⁴ Kaadu qagissa heeh iyyemii, «Aham YALLI iyyaama. Yuudah yooboke mari fiiruk geerah dambi le taama abeenih; tohuk gexxaamah ken digaaleyyom digga le. Yoo YALLI, aba keenik exceemit maqal haysite cineeniih, yi amriy aba keenik excehiyyal anqaasah haysiten. Oson akak raden ken kaxxa abbobti aqbuduk sugte duyyey xeet kee cooxuk bicseenihiyyah qibaadat gacen. Tohuk gexxaamah makot gexa mara yekken.

⁵ Tonna-leemiik Yuudâ-baaxot gira ruubeyyo. Yarusalaamal tan megdebitte carariseyyo» 'yaanam iyya.

ISRAAYILIL YEKKE COKMI

⁶ Qaamus kaadu qagissa heeh iyyemii, «Aham YALLI iyyaama. ‹Israayil mari fiiruk geerah dambi le taama abeenih; tohuk gexxaamah ken digaaleyyom digga le. Qellat sinni maray isi mago yagdiyu duude waahiyya sinaamal xaaman. Gersim hinna'mmay, magok yeceen kabel edde gacsan dudda alle wayta masaakiina, magoh aftok naqoosah haysitan.

⁷ Boola leeh, is cata mara sinni tu-maleela tassammeh biyaakittam keenit meqe. Masaakiinah yan mara yassammeh biyaakitam keenit meqe. Baxa kee abba inki baxuwway ken naqasoh tanil yangaleeniih, nammayak fido teetit faxan. Yi migaaqay taahirik yani, too abtol nadaasa aban.

⁸ Yi qibaada elle aban aracal mago tagdiyu teffere masaakiinak damaanatah been sartanal xiinih gacan. Yooy ken Dagelta kinnihiyya elle yaqbuden qaril, mago edde lon marak magoh aftok meklah been kamriy qinabak bicseeni yaaquben.

⁹ « ‹Takkay immay yooy YALLA kinnihiyya, Amoora deqsita maray xexxaarah calawwayti gide yakkeeh caylah lubak inna luk yenehiyya, sella akah heem, sin taagak ten.

¹⁰ Too Amoorah mari ikoytah luk suge baaxo siinih acee'gidih, Masrik addak sin eyyeeqeeh, bacarih tan baaxol morootom sanat sin abbaxuk suge.

¹¹ Lab-xaylok nabi yakku waa mara siinik doore. Qahdi-culeyna deqsitta furrayna kaadu sin addak doore. Israayil maraw, toh numma kinnim taaxigeenih!› 'yaanam YALLI iyya.

¹² « ‹Takkay immay Qahdi culeena yekke mara qinabak bicsen kamri tefqeeniih; nabuwwak, Yallih farmo neh mawarisina 'yaanam inten.

¹³ Tonna leemiik siinit aaqiteyyo. Yi digaalah, qari elle qilsa faras-gaari innah, araadaqisetton.

¹⁴ Kaxxa arda le mari kinni-way mayasilliman. Celeemah yan mari qande weelon. Qeebil agiirah yan mari rooci edde haa ikke mageya.

¹⁵ Gaysê-baxi qidimil timixxige labha, ken fan qidan gaysê-baxak isinni elle raaqisan wale mageyan. Ardal assaaquk yen mari kinni way mayassaaqa. Faras amot yan mari rooci edde haan ikke mageyan.

¹⁶ Too ayroy sin digaalu waahiyya, carbil agiirah tan qaskar kinni-way, silaac baaxot qideenih aawwelon. Tahat yabtam yoo YALLA› 'yaanam iyya» iyye.