Qaamus 1 - NABUWWA KEE MALIKWA

¹ Ah Qaamus maxco. Qaamus Takooqa deqsitta magaalal yan saqi marih fanat suge numu. Yalli, Israayilih takku waytam elle warse wacyi kaal oobisem, woo baaxol baaxoh angoyyi yakkeemik naharat namma sanatak ten. Too dabaanal Quddiyya Yuudâ-rasul malikih sugeeh; Israayil rasul kaadu Yahoqás-Yarobqam malikih suge.

² Qaamus iyyeemih, «YALLI, Siyoonuk lubak xongoloh innah tan xongoloh xongoleeh, Yarusalaamak kaxxa xongoloh xongole. Woo xongolo tontoobbe waqdi, saqi alooluk suge qayso inkih kafte. Karmel qaleh amol coox kee anxaxuk sugtem inkih kafte» 'yaanam iyye.

SUURIYAH YOOBOKE MARAL YEKKE COKMI

³ Qaamus iyyeemih, «Aham YALLI iyyaama. ‹Suuriyah mari fiiruk geerah dambi le taama abeenih; tohuk gexxaamah ken digaaleyyom digga le. Gilqad maral umaane baahak, nacrurta sinni xintot ken abbaxuk sugen.

⁴ Tohuk gexxaamah malik Cadayel gasot gira ruubeyyooh, malik Banihadad hee megdebittet gira rubbu heeh gombod tet abba heeyyo.

⁵ Damaskoh magaala akak culan gasoh afoofi aggiggileyyo. Awen Golo deqsitta'kkel dabaaqah yan mara bayseyyo. Beet-Qadan xiinisa abba kaadu bayseyyo. Suuriyah mara Kiir rasu seewah beelon› iyya» 'yaanam iyye.

*FILISTIIN MARAL YEKKE COKMI

⁶ Kaadu qagissa heeh iyyemii, «Aham YALLI iyyaama. ‹Gaadâ-mari fiiruk geerah dambi le taama abeenih; tohuk gexxaamah ken digaaleyyom digga le. Inkih yan ayyunta seewah beenih, Edom maral naqoosah ken yeylemmen.

⁷ Tohuk gexxaamah Gaadâ-magaalat maroh tan gasoosat gira ruubeyyo. Too magaalah addal tan megdebittet gira ruubeyyo.

⁸ Asdood kee Askalon deqsitta namma magaalal abbobtih yan mara qideyyo. Ekron magaalah maral gaba qideyyooh ken digaaleyyo. *Filistiin marak raqqa 'tem inkih bayele› Tah intam YALLAY Mulki lehiyya» 'yaanam iyye.

SUUR MAGAALAL YEKKE COKMI

⁹ Kaadu qagissa heeh iyyemii, «Aham YALLI iyyaama. ‹Suur magaalal yan mari fiiruk geerah dambi le taama abeenih; tohuk gexxaamah ken digaaleyyom digga le. Israayil mara luk sugen qalla hawweeneenih; magaala kee magaala deraafil tan gaandoodil sugga iyye mara inkih, Edom marih naqoosah xaamiten.

¹⁰ Tohih sabbatah Suur magaalah gasoosat gira ruubeyyooh, teetil tan megdebitte girat bayseyyo› iyya» 'yaanam iyye.

EDOM MARAL YEKKE COKMI

¹¹ Kaadu qagissa heeh iyyemii, «Aham YALLI iyyaama. ‹Edom mari fiiruk geerah dambi le taama abeenih; tohuk gexxaamah ken digaaleyyom digga le. Israayil ummatay ken toobokoh tanihiyya admoh qidan dubaalih gurral qiden. Racmatta sinni qidimih ken qiden. Way cabe waan naqabu afqadot keenih heen.

¹² Tonna-leemiik Teman deqsitta magaalat gira ruubeyyo. Bosra deqsitta magaalal tan megdebitte kaadu carariseyyo› iyya» 'yaanam iyye.

QAMMON MARAL YEKKE COKMI

¹³ Qaamus kaadu qagissa heeh iyyemii, «Aham YALLI iyyaama. ‹Qammonuh yooboke mari fiiruk geerah dambi le taama abeenih; tohuk gexxaamah ken digaaleyyom digga le. Carbit Gilqad baaxo abbixenno 'yaanam niyal haak, soonibih yan agabuk bagut tan xaylo yeyyeeqen.

¹⁴ Tohuk gexxaamah, Rabba deqsitta magaalat maroh tan gasot gira ruubeyyo. Woo magaalal tan megdebittet gira ruubeyyo. Too ayro kaxxa deero kee waxxaqa radele. Too carbiy caffat gexxe girah innah baaxo gufele.

¹⁵ Baaxoh abba kee doolat abbobti keenik seewah beelon› iyya» 'yaanam iyye.