Nacmiya 9 - NABUWWA KEE MALIKWA

UMMAT DUMA ABTE DAMBIK NADAAMITTEH

^1-2 Too alsak labaatanna kee fereyhaytoh ayro, Israayil ummatta aben dambih nadaamah soomaana'gidih gaaboowen. Ken akke waa marin marak yexxeereeniih, sartanah *qabuudut gacca 'yeenih, abeenih yanin nadaamak gexxaamah, amol bullaaqe isinnik caxen. Sarrak solla yeenih ken kee keenik dumal ken kaxxa abbobti abba hayte dambit yaaben.

³ Inkih tan ayrok rubqi gide fanah, inki aracal sollu 'yeenih YALLAY ken Dagelta kinnihiyya ruube kitaabal tanim keenih yikriyen. Tonnah kaadu, inkih tan ayrok rubqi gide takkem, abeenih yenen dambih tooba kee YALLAY ken Dagelta kinnihiyyah qibaadat sugen.

⁴ Leewih yooboke mari mawqeenah amol soolak yen. Tokkeh amol Yaasuwa kee Baani kee Kadmiyal kee Sabanya kee Bunni kee Sereebiya kee Baani kee Kanaani deqsita mari anay fayya haak YALLAY ken Dagelta kinnihiyyah kallacen.

⁵ Leewih yooboke marak Yaasuwa kee Kadmiyal kee Baani kee Casabnaya kee Sereebiya kee Hoodiya kee Sebanya kee Fatacya deqsita num iyyeemih, «Ugutay YALLAY sin Dagelta kinnihiyyay kulli way waarahiyya faylisa» iyyen. Dooqah iyyeenimii, «Kooh taguude fayla sahdayti afat takke faylak nabuk raqta'mmay tohuh, ku migaaqay nabna lehiyya kulli way faylisoonay.

ABEN DAMBIH YALLA KALLACEN

⁶ YALLAW, Yalli dibuk koo. Qaran ginteeh; qaraanal tan cutuuka inkih gintem koo. Baaxo kee baaxol tanim inkih ginte; bad kee badat tanim inkih ginte. Rooci leemit inkih rooci haytem, koo. Qaraanal eneyya 'tam qibaada koh abta.

⁷ «Dageltah yan YALLAW, atu Abram doorteeh, Ur deqsita aracay Baabelon rasul yanik kaa teyyeeqeh. Migaaqah Abraahim kaak inte.

⁸ Abraahim ku garil digga le num kinnim tubleh; xagana kaa'lih haysitte. Kaak rade marah baaxo ikoytah aceettoomih xagana kaah culte. Too baaxo, Kanqaan kee Ciitaay Amoora deqsita maraay Feriida kee Yabuusaay Girgaasah yooboke marih baaxo. Inteemil digga le Dagelta kinnitooh, xagana akah cultem abteh.

⁹ «Ni kaxxa abbobti Masril taqabik geytem tubleh. Qasa badih xaqul cato keenih takke'gidih, aben dooqa keenik raabitteh.

¹⁰ Masri malikil ablewayni astooti kee qagabak tanim bahte. Kay gubal yan mara kee kay baaxoh maral yakkeenimik qagabah tan able waynuh tanim bahte. Toh keenik akah abtem, kaxxiinah filla qaraanal heeniih ku ummattal umam baahak sugeenimih sabbata. Tohuk wadir too saaku kok yontoobbe migaq uxih ta saaku fan yantaabbeh.

¹¹ Ku mara badak gude keenih baxisseh, ken teyyeeqe. Bacarih raqte baaxok bagul badak gude ken tabisse. Ken ayradduk suge mara badat qiddeeh, kaxxa badat qiden xaa badat elle suta'nnal, badat ken sutusse.

¹² «Laqo elle gexaanamal, qeera-qamiddu foocat keenik hayte. Bar kaadu edde gexan gita yabloonuh, ura qamiddu foocat keenik hayte.

¹³ Qaraanaak Siinâ Qalel obteeh; isi mara lih isi afak yabte. Qadaalat kee numma le xinto kee madqaay; meqe amri kee baritto keenih warisse.

¹⁴ ‹Sabti ayro xaguraay, taahirik tan ayroh tet ubula› keenik inte. Isi xintooy, madqa kee baritto isi naqasuh yan Muusal keenih rubte.

¹⁵ Satqiten saaku, qaraanak maaqo keenih oobisse. Bakaariten saaku, xixxaqak baguk lee keenih teyyeeqe. ‹Ikoytah siinih aceeyyo axcuk, xagna siinih akah cule baaxo qeebit ibbixa› keenik inte.

¹⁶ «Ni kaxxa abbobtih tu gactek, ku yab moggolinnoonuuy, kaxxiinah filla qaraanal heeniih isinnih faxeenim aben.

¹⁷ Koo yaabbeenim cineeniih, atu abte ablewaynuh tan taama hawweeneenih. Kaxxiinak gexxaamah, wadir Masri naqoosinnah ken gacisu waa abba dooren. Atu tohuh, yi Dageltaw, racmatta kee maqaane le Dageltay qafu abahiyya kinnito. Naqabut asissike waah, sahdah kaxxa kacanu yaybulle Dagelta kinnito. Tohih sabbatah booxal qidda heeh darre keenit macabinnito.

¹⁸ Yaqbudoonuh beqri-ceelo bicseeniih, too beqrih ceelok, ‹Masrik nee bahtem, ta ceeloy yallah yan ni dagelta kinnihiyya› iyyen. Tonna kinnuk, koo celta nabna kot maabinnoonuy, ku galto yeegemeenih.

¹⁹ Tohuh, yi Dageltaw, ku racmatta caddo sinni racmatta kinniimih taagah, bacarih tan baaxol ken macabinnito. Laqo gita keenih tascasse qamburre keenih hayte. Bar gita keenih tascasse gira keenih hayte.

²⁰ Litoh tan maqaaneh, abeh meqem keenih warisse. Yakmoonuh manna deqsitta maaqo qaraanak keenih oobisse. Yaaquboonuh lee keenih tecee.

²¹ Bacarih tan baaxol morootom sanatah oson faxxa haanam keenih acayuk sugte. Sartanak maqarradinnon; iba keenik maduddubinna.

²² «Mango baaxô-doolatwa qeebil ken tiysiise. Too baaxooxak kulli'kkel suge marih baaxol ken nookisse. Sicon abbah elle suge Cesbon deqsitta baaxo ken gabal hayte. Qoog abbah elle suge Basan deqsita rasu kaadu ken gabal hayte.

²³ Qaraanal cutuuka takkeh gide xaylok keenih tecee. Ken abbobtih xagana akah culteh sugte baaxol, dabaaqah ken hayte.

²⁴ Kanqaan baaxol suge marak qeebil ken tiysiiseh. Wokkel suge mara isi marih milkih hayte. Kanqaan malik kee kay marak isinnih faxeenim abitaana'gidih, ken gabal ken hayte.

²⁵ Maroh gaso edde tan magaalooli yibbixen. Rob elle radaah kullim elle taabuke baaxo kee kullim addal akak tan qarwa keenik raaqisen. Lee edde raaqisan boodooda kee, *daytuun xala coox kee, qinab xala coox kee, kalah yan caxâ-miru xala coox keenik raaqisen. Isinnih faxxa haanam yokmeenih, ariiqo baahen. Atu keenih ucuyya hayte maqaanek inkih cayyen.

²⁶ «Tohuh, ku mari ku yab cineeh, koo cineh. Atu aba keenik inteemit darre caben. ‹Aham maabina, meqem hinnak› keenik inte nabuwwa qideenih. Too nabuwwa toh keenik akah intem, oson kol yaduureeni'gidi. Koo ceele sinni migaq koh aben.

²⁷ «Too waqdi ken naqboytiitih gabat radoonay ken inte. Too mari uma xukkot ken abbaxuk suge. Gadaamiteenim yublen waqdi, kol weeqen. Atu qaraanal ken weeqa toobbeeh; kaxxa racmatta le Dagelta kinnuk, ken cattu wayta saqoltiy naqboytit gabak ken tayyaaqu waytahiyya keenih rubte. Too mari naqboytit gabak ken cateh.

²⁸ Takkay immay amaanah xiinak sugen waqdi, dambit qagteenih. Too waqdi kaadu ken naqboytiitih gabat radoonay ken inte. Naqboytit gabal ken hayte. Oson toobiteeniih cato kol esseraanam tuble waqdi, qaraanak ken weeqa toobbe. Litoh tan racmattak gexxaamah, koo esseren cato keenih oggolteeh; cato koo esserinnaan waqdi, ken catak sugte.

²⁹ Atu aba intam abe weenik, keenit takku waytaamih garci keenih kalteh. Ku xinto kataata mari isinni rooci wadele'mmay, too mari, ku xintok sah giti ane waam aabbih, kaxxiinitak ku xinto cineenih, keenih warisah darre kot caben.

³⁰ Mango sanootal litoh tan sabrih keenil tisbireeh, nabuwwat hayte isi Roocaaniyyah kabuk garci keenih kalak sugte immay, ku ummatta, tohuh, ayti maleelah innah aabbe waytam celte. Too waqdi ken naqboytiitih gabat radoonay ken inte.

³¹ Ku racmatta caddo maliiy, tohuk gexxaamah darre keenit macabinnitooy, bayi ken mahannito. Kaxxa maqaane kee racmatta le Dagelta kinnito.

³² «Yallaw, ni Dageltaw, nabna lem koo. Qande leeh hayba lem koo. Amurruqe sinni kacanu le Dagelta kinnitok, abeyyo inteh xagana akah cultem abtah. Nanu biyaakak geyneh gide neh ubuley. Assuuriyah malikwa xukkot nee abbaxuk ten dabaanaay akke fanah, kaxxa biyaakah biyaakinne. Ni malikwa kee ni miracwaay, nabuwwa kee seekaay ni kaxxa abbobti kee ni ummatta inkih biyaakitteh. Tonnal hay, nanu biyaakak geyneh gide neh ubuley!

³³ Nee digaalte waqdi, cakkih tan digaala net abte. Atu kulliimil digga lito'mmay, nanu umam abne.

³⁴ Ni kaxxa abbobtiiy, ni malikwaay ni saqolti kee seeka ku xinto intam abak masuginna. Atu ken elle amrissam kee atu keenih abta garci-kalootut baaqid luk manannon.

³⁵ Ikoytah keenih tecee kaxxa baaxo xiinak sugen waqdi, koo maqbudinnon. Niqmatak tan baaxol, maqaane luk ken xiinisak sugte'mmay, koo maqbudinnon. Edde yanin dambih abitto cabba heenih kol yaduureenim maabinnon.

³⁶ Ta saaku atu ni abbobtih tecee baaxol marin naqoosah nan. Atu neh tacee baaxoy meqe innah nee adoobisak tenehiyyal naqoosah nan. Taway taham neh maay table hay!

³⁷ Baaxok geytima niqmat atu ni amol hayte amoytitte nek betta. Tah net akah takkem ni dambi. Nee kee nanu neddere lacak isinnih faxeenim aban. Nanu a saaku kaxxa gadaamah addat nan» 'yaanam dooqah iyyen.

³⁸ Tohuk lakal «Net tikka 'teemik gexxaamah, Israayil ummattak nanuu, titta elle geyne tittin-gey kutbeh haysinnah nan. Too kutbel nek saqoltiiy, Leewih yooboke mara kee seeka firma heelon» iyyen.