Nacmiya 8 - NABUWWA KEE MALIKWA

^1-2 Too alsak inikhaytoh ayrot yakkeenimiik Yarusalaamal Leeh Afa deqsitta culmak foocal gaaboowen. Too waqdi YALLI Israayil ummatah Muusal ruube xinto elle tan kitab sek Qedrak, «Neh baaha» iyyen. Qedra too xinto intam digga haah yaaxige numuk ten. Qedra too waqdi too kitab baaheeh; too ayro tokkel labhaay agabu kee kaskassoowe urrih foocal yikriye.

³ Tokkel magaalak akak yawqen afal booxak bagul, maacak xabba haanamaay carri tikka 'yam fanah, Qedra too kitab intam keenih akrayuk sugeeh; oson kaadu baguuk kaa ankacisak asen.

⁴ Too ayro aben gaabownal, Qedra too kitab keenih elle yikriyem, bocok bicsen fayya 'ya aracih amok ten. Usuk too kitab keenih yikriye waqdi migdi kabut kaak sugtem, Mattitya kee Samaq kee Qanaaya kee Uriyya kee Cilkiyya kee Maqseyaahu deqsita numuk ten. Guri kabuk kaak tenem, Fadaaya kee Misaayel kee Malkiya kee Casum kee Casbaddana kee Zakariyya kee Masullam deqsita numuk ten.

⁵ Qedra kaah heen aracay keenik fayya 'ta ikkel yanihiyyal solla 'yeh waqdi, inkih kaa fan wagten. Sarrak kitab fake waqdi, yakkeenimiik inkih soolen.

⁶ Too waqdi Qedra iyyeemih, «YALLAY Naba Dagelta kinnihiyya fayla taafay» iyye. Tokkel suge mari inkih, usuk toh iyye waqdi, gaba qaran fan fayya haak, «Aamiin, Aamiin» iyyen. Sarrak inkih YALLA yassakaxxeeni'gidih, gommoh raden.

⁷ Tohuk lakal solla 'yeeniih soolol elle yeeden. Sarra Leewih yooboke mari xinto elle tani'nna keenih warse. Keenih warissem, Yaasuwa kee Baani kee Sereebiya kee Yaamin kee Qakkub kee Sabbatay kee Hoodiya kee Maqseyaahu kee Kaliita kee Qadarya kee Yoodabad kee Canaan kee Felaaya deqsita numuk ten.

⁸ Yallih Xintoh Kitaabal tanim nagay kawseeniih; ummattah Yallih xinto intaamak maqna nagay warsen.

⁹ Ummatta ta xinto aba intam yoobben waqdi, weeqeenih. Yuudâ-baaxoh abbah yen Nacmiya kee, Yallih xintoh addal tanim nagay aaxaguk yen sek Qedra kee, Leewih yooboke maray xinto intam barisak yenehiyya ummattak iyyeenimih, «A saakih ayro YALLAY sin Dageltah yanihiyyah garil taahirik tan ayro kinnuk, weeqa kee arkitiyyi mafaxxiima» iyyen.

¹⁰ «Ahaysa isinni buxa gexaay, meqe maaqo akumaay salfa le maqab aqubaay, qiidih asa. Liton maaqo kee maqab tu aalle waa marah acuya. A saaki ni Goytah garil taahirik tan ayrok markitina. Sin cayli, YALLI siinih yecee rufto» keenik iyyen.

¹¹ Leewih yooboke mari, ummattak iyyeemihii, ‹Annah taahirik tan ayro cisabbottaanam meqem hinnak, kata tibba xica» iyyen.

¹² Too waqdi suggu 'ye mari inkih yakkeemiik buxah yuduureeh; kitaabal taniimit radeenimih sabbatah, walamwallitak maaqo yokmeeniih yooqobeenih, luk sugeenim tu aalle waa marah yeceen.

IRAAWÔ-DABIH-QIIDIH ASEN

¹³ Ciggilta ayro gulubwah saqoltih yen mari, seeka kee Leewih yooboke mara lih gacca 'yeh, Yallih xintol taniimih addâ-faknu kee maqna bartaana'gidih, Qedra fan gexen.

¹⁴ Qedra keenih elle yikriye innal, woo xinto axcuk teneemihii, Iraawô-Dabih-Qiid deqsita qiidih ayro, «Israayil ummatta woo qiid gaba kalam fanah daboyti-baxi addat gactay» axcuk ten.

¹⁵ Kalah kaadu, «Inkih tan Yarusalaam kee wohuk kalah tan magaalooli kee mandarittel yan marah farmo ruubaay; ‹Qaleela fan gexaay; daboyta akak xissaana'gidih, madertooy, alay kee, nakliita kee kalah yan cooxuy mango ayyuufa le irgiqay baaha› » axcuk ten.

¹⁶ Too waqdi ummatta gexxeeh, too luud bahte. Sarrak qarwak amol booxah tan arooca kee, buxah addah daarat kee Yallih Qibaadah-Qarih daarat kee, Leeh Afa kee Efrayim Afa deqsitta culmak foocal booxah tan aroocal daboyta xisen.

¹⁷ Seewah ken elle beenih sugen baaxok yuduure mari inkih daboyta xissite. Tannah tanim Nuun-Yoosuwa yen dabaanak wadir ummatta abteh masuginnaay, too saaku ummatta kaxxam ruffu 'teh asse.

¹⁸ Too qiidih edde asen ayrok xabba haanamaay, qiid gaba kalla haam fanah, Tawraatal yan Yallih yaabak ayrooy rike akrayuk sugen. Too qiidih malcina ayro sugen. Malcinhaytoh ayro akah aseenik lakal, bacarhaytoh ayroy qiidik gaba kaleenihiyya, kitab elle inta'nnal, qibaadah inki aracal gaaboowen.