Nacmiya 6 - NABUWWA KEE MALIKWA

NACMIYAK ABOONU WAANAMAL MALSEN

¹ Sanballat kee Toobiya kee Gesam kee kalah yan maray naqboytiitih nek yenehiyya yakkeemiik, a gasoh xisnek gaba kallem yoobbeeniih, mango gasoosak gudet ten faxo duudusnem kaadu yoobbeenih. Takkay immay akak culan afoofi edde haan coox uxih edde hayneh manannino.

² Sarrak Sanballat kee Gesam farmo yoh rubte. Iyyeenimih, «Oono deqsitta booxal tan qunxa magaalal net ongoorow» yaanam yoh ruuben. Too farmo yoh akah ruubeenim, ayrissa yoo heenih umam yol baahaana'gidik ten.

³ Sarrak anu kaadu farmô-mara keenih ruubeeh keenik exceemih, «Edde anim kaxxa taama kinnuk, amaatem madudda. Sin fan emeeteh, abah an taama fanal cabam mafaxa» 'yaanam keenih ruube.

⁴ Tohuk sarra kaadu affara adda too bis le farmo yoh ruubeeniih; anu kaadu naharsi adda keenik inxicca excem keenik exce.

⁵ Sanballat konoyhaytoh adda kaadu kay gubal taamita numul farmo yoh ruubeeh; too saaku yuktubeh ruube warkat alifit manannay fakimit yen.

⁶ Too warkatal iyyeemih, «Yahuud akke waa marih baaxooxal, ‹Koo kee Yahuud mara umaane abtaanam faxxan› iyya mari yan. Gesam kaadu toh numma kinnim yoh warseh. ‹Tiddigilleh sugte gaso nammeyhaak akah xissaanam wohu› siinik iyyan. ‹Atu kaadu ken malik takkem faxxa› 'yaanamih xaagi yan.

⁷ Yarusalaam addal Yuudâ-malik takku waytam ummattah warissu wayta nabuwwa bicsitteh tabbixe kok iyyan. Malik ta xaagu aabbele kaay; tonna leemiik koo kee yoo tahak tuk teena innam tayse» 'yaanam elle yuktubeh ruube.

⁸ Toh uble waqdi kaal gacseemih, «Ta inxicca 'tam inkih tekkem hinna; atu isih isi amok bicisse yaaba ikkal» 'yaanam kaah ruube.

⁹ Naqboytit toh akah abtem, meysinneh abna taama nayseede'gidik ten. Toh uble waqdi dooqa abeeh, ‹Yallaw, qande yot hay› exce.

¹⁰ Ayrok teena Dalaayá-Samaqya deqsita numuy Maahetbal deqsita numuk baxi baxah yenehiyyah buxa gexe. Too num buxah addak yawqem duudak mananna. Buxa kaak emeete waqdi yok iyyeemih, «A mari koo qidam faxak, Yallih Qibaadah-Qaril nangooroway; Taahirik-yan-Aracat nambooqoray; Qibaadâ-Qarik afa ninnit alifnay. Koo qidaanam faxaanaah; bar amma 'yeenih koo qidaanam faxan» yok iyye.

¹¹ Too waqdi kaak exceemih, «Kudaah ambooqorem, yi migaq hinna. Inni roocih megloh Yallih Qibaadah-Qarit ambooqoreyyom kot celta? Mambooqora!» kaak exce.

¹² Sarrak cubbussa hee waqdi, ah Yalli kay afat hee yab hinnay, Toobiya kee Sanballat guqul kaah teceeh, kaak inxica intem kinnim geeh.

¹³ Oson ah akah abeenim, anu meysiteh dambit asa'gidiiy migaq innik bayseh qaybit asa'gidik ten.

¹⁴ Sarrak dooqa abeeh, «Yi Dageltaw, Toobiya kee Sanballat abtam ubul. Ahah ken digaal. Noqadya deqsitta barray nabih tanihiyya kee raqqa 'teh tan gersi nabuwwa yot abta meysisso ubul» exce.

GASÔ-XISNEK GABA KALLE

¹⁵ Kontom kee namma ayro taama abak sugnek lakal, Alul deqsita alsak labaatanna kee konoyhaytoh ayro, inkih tan gasoh xisnek gaba kalleh.

¹⁶ Nek naqboytiitih yan mara kee nek dariifal dabaaqah yan mari, a taama Yalla kinni ni Dageltih cato edde tengeleemih sabbatah gaba kaltem yeexegen waqdi, meysiteenih wacarriy ken yibbixe.

¹⁷ Tah inkih tikka tam fanah Yuudak saqoltih yan mari Toobiya deqsita numih qalla yirgiqeenih manannonuuy, waraakit kaah aktubuk yenen. Usuk kaadu keenih aktubuk yen.

¹⁸ Toobiya Yuudah yooboke numih baxá abbaxuk yeneemih sabbatah, Yuudah yooboke mari mangih kay qaxat yen. Usuk baxá akak abbaxuk yenem, Arác-Sekanya deqsita numuk ten. Kay baxi Yahoocanan kaadu Barkiyyá-Masullam deqsita numih baxá abite.

¹⁹ Mango mari, «Toobiya woh abeeh ah abe» axcuk kay maqaanet yi garil yaabak yen. Anu too waqdi excem kaadu beyya heenih kaah warisak yenen. Tohuk gexxaamah usuk meysisso elle tan waraakit kulli way yoh ruubak yen.