Nacmiya 5 - NABUWWA KEE MALIKWA

MASAAKIINAT TEKKE XUKKO

¹ Waqlak wadir lab mara kee ken agabuk mangom yakke mari, Yahuud maray ken toobokoh yanihiyyak wayto malkiten.

² Garab keenik annah iyyen: «Mango maray ahli yani kinninooh; rooci wadu geyna'gidih maaqo geynam faxxinta» iyyen.

³ Garab keenik kaadu, «Qululuh nambaxeemik daro neh ucuya keenik inna waqdi, abuuduh daro neh yecee mari, damaanatah baaxo kee qinab elle nabqure arac kee qarwa nek beya» iyyen.

⁴ Aki garab kaadu annah iyyen: «Malik gabbaray baqurê-baaxo kee qinab elle yabquren baaxok naceehiyya edde nagdiye'gidih, abuuduh sinaamak beyne» iyyen.

⁵ «Nanu Yahuud mara kinninooh, ken kee nee inki ginsik nani'mmay, tohuh, ninni xaylo naqoosa takke'gidih dirkisna; say urri naqoosannuh limmosne. Baqurê-baaxo kee qinab elle nabqure baaxo nek beeniih; nee cattam magennino» iyyen.

⁶ Ken malkit oobbe waqdi, nabam inqibeeh,

⁷ tu akak exceeh abaamal malse. Saqolti kee abbobtih keenik yan marak abto ilqeeh, keenik exceemih, «Isin, abuuduh siinik been maaqo kee lakqoh aftoh, say xaylo kee qarwa kee baqurê-baaxo akak beytaanam, sin tooboko kinnim mataaxigaana innaa?» keenik exce. Sarrak ahak tuk teena akah abna'nnah, daffeyna keenih hee.

⁸ Too aracal keenik exceemih, «Nanuuy, Yahuud maray naqoosannuh marin mari xaamak sugehiyyah wadir lakqo ucuyya hayneh currih ayyaaquk sugnek, ta saaku isin isinni tooboko xaamtaanaah, naqoosah ken haytaanaa! Tonna'mmay isin naqoosannu teylemmen mara wadir currih nayyaaqem nel tan» keenik exce. Too waqdi saqolti kee abbobtih yen mari tibba yeeh, iyyaanam magennon.

⁹ Sarrak keenik exceemih, «Isin abtaanam celtam hinna. Yallay ni Dageltah yanik meysittaanaah, cakkih tanim abtaanam siinil tan. Tonnal Yahuud akke waa maray naqboytah nek yani nel manqaasa.

¹⁰ Away yoo kee yi kataysis kee yoh taamita marak ummattah daro kee lakqo abuuduh nacee'mmay, abuuduh keenih naceemik amot tu keenil essere waynay.

¹¹ Isin kaadu ken buqreh baaxo kee, qinab kee *daytuun coox elle abqaruk sugten ken baaxo kee ken qarwa, ta waqdiik xayuk keenih gacisa. Lakqo kee daro kee qinabak bicsen kamri kee zeyti (saliid) abuuduh keenih teceen waqdi, amot keenil esserteenim keenih gacisa» exce.

¹² Too waqdi saqolti kee abbobtih keenik yen mari, «Meqeh; atu aba axcinnaanim abenno. Damaanatah keenik beyne duyye keenih gacsennooh, magoh beenim ken messerra» iyyen. Too waqdi seekah seeceeh, wohul yoo yangaddeenimik, seeka foocal ken xibsiise.

¹³ Sarrak bagul tikiyah luk suge saro ifdigga heeh gabah urguffa tet hee. «Ta saaku oggolteenim sarra siinik cina num Yalli tannah haay. Yalli, ta xiiba makteenik, liton qarwa kee edderra hayteenimik inkih foyyah sin cabele» keenik exce. Wokkel suggu 'ye mari inkih, «Aamiin! Takkay!» iyyen. Sarra YALLA faylisen. Sarrak too xiiba mamakinnon.

¹⁴ Woo taban kee namma sanatay anu Yuudâ-rasuk xintoh abba edde ekkehiyya, yoo kee yi mari, yok duma sugte abbobti maaqo kee duyye keenit akah faxak sugte innah, keenit mafaxinnino. Tohum, Malik Artacsasta edde reede labaatanhaytô sanatak xabba haanamaay, too malik reedal edde suge soddom kee nammayhaytô sanatah amma 'yaanam yan udduruk ten.

¹⁵ Yok duma sugte abbobti ummattal kaxxa quuka hayteh teneeh; maaqo kee qinab kamri keenik beenih, wohuk amol fula ummattak ayrol morootom garsi beyak sugen. Keenik gubal taamita mari kinni way ummatat umuk sugen. Anu Yallih meysi luk eneeh, ken innah yan numuk mananniyo.

¹⁶ Gasô-xisok gexxaamah, akiimih gaba geyak mananniyooy; yi mari kaadu too gasoh taamat yo'lih yen. Baqurê-baaxo kee qarwa neddereh masuginnino.

¹⁷ Yahuuduh yooboke mara kee kaadu keenih yooboke ken saqoltih yan marak ayrol bool kee kontom num inni buxal adoobisak en. Tohuk kalah, dariifal nek tan baaxok qibnaytiinoh sahda yol amaatuk teneeh; too mara inkih inni buxal adoobisak en.

¹⁸ Kulli ayro, awur kee gabul le illik leceey kee mango dorrahiiha keenih qidak en. Tabna ayroh addat kaadu qinabak bicsen qusba kamri inni buxal sinaamah acayuk en. Takkay immay baaxoh-abbah gabbarah acayuk ten maaqo kee lakqo ummatak mafaxinniyooy; dumî-mari keenik faxak sugem oson duudaanam hinnam aaxaguk en.

¹⁹ «Yi Dageltaw, a marah baguuk abam foyya yok maabin» axcuk Yalla kallace.