Nacmiya 4 - NABUWWA KEE MALIKWA

NACMIYA, TAAMA SADUH YAN MARAK YEYSEH

¹ Sanballat deqsita numuh tu gactek, nanu Yahuud marak tiddigille gaso xisnam yoobbe waqdi, bagul nabam yinqibeeh, too waqdi nel anqaaseh.

² Isi kataysis kee Samaariyah qaskarih foocal, «A Yahuud-gulalwa abtam macaay? A magaala nammeyhaak xiseloonum maay yakkalen? Sadgat abeenik sa inki ayrot xisnek gaba kaleloonum yakkaleeni innaa? Tittin bagul yan yiddigille xeetiy cararehiyyak gasoosa xiseloonum yakkaleeni innaa?» iyye.

³ Toobiya deqsita num kaadu kay garik soolak suge. Too num iyyeemih, «Taway gasok teena xissoonu waanam yoh ceelan. Wakri ibah yewqek raqta gaso hinna» iyye.

⁴ Toh oobbe waqdi dooqa abeeh exceemih, «Ni Dageltaw, a mari net aba anqas oobbey. Oson net aban xaafi keenil yadaaray. Edderri heenim marin gadda keenik takkay. Marin baaxo seewah ken beyoonay.

⁵ Neey xisnet yanihiyya xaafen. Yallaw, a qellat kee dambik qafu keenih maxcin» exce.

⁶ Sarrak wadir ninni taama fan gacne. Ummatta xisnet baguuk taamitteeh tisissikeemih sabbatah, xisne gudel nabbixe.

⁷ Sanballat kee Toobiya deqsita marih nammay kee Qarabah yooboke mara kee Qammon mara kee Asdood-magaalah-marah tu gactek, nanu Yarusalaamah gasoh xisne meqe innal abnaah, fanaafanat sugte foxooxa kibneh duudusnem yoobben waqdi, kaxxam keenit toome.

⁸ Tonna-leemiik Yarusalaam fan amma 'yeenih qeebi net abaanaah, ummatta akah baditta innah abaanamal malsen.

⁹ Nanu ninni kabuk kaadu ni Dagelta fan dooqa abak sugneeh; bar kee laqoh ken mamaata wagtu waa mara dacayrih hayne.

¹⁰ Yuudâ-mari aba qadar luk yen. Qadarah axcuk yenemii: «Taamita mari nek taqbeeh, maqar cabeenih, taaneenih. Abuuruh raaqe gidaarih xeetik weero nee taqbisse; tamurruqe taama hinna» iyyen.

¹¹ Ni naqboytit kaadu iyyeemih, «Garcik keenil gexxaay, maysattaka keenit abbaay, taama akah solta innah qidda ken haynam fanah, mayaaxigaanaay mayablan» iyyen.

¹² Takkay immay buxa ken garil luk yen Yahuuduh yooboke ni mari kulli waqdi, «Nee fanah uduuraay, naqboytak isinni cata» nek axcuk yenen.

¹³ Tohuk gexxaamah ummatta tikyal hayya heeh, gulub-gulubul ken kurra heeh, taama gaba elle kale'kah tan aroocak darre le kabul, seef kee macaxuuy gayse kee gaysê-xaylo luk, dacayrih ken hee.

¹⁴ Taham cubbusek lakal, ugutta exceh, saqoltih yan maraay, baaxoh abbobti kee wohuk kalah tan ummattak exceemih, «Naqboytiitik mameysitina. Isinni tooboko kee isinni xaylooy isinni agabu kee isinni buxah taagah qeebi keenit abtaanama. YALLAY nabna leeh cunxo sahdat qidahiyya kassa haay, mameysitina» keenik exce.

¹⁵ Sarrak ni naqboytit neh malisak sugen mala keenik geyneemih xaagu geenih; edde sugen mala Yalli keenil bice kalem yeexegeenih. Tohuk lakal nanu nakkeemik ninni taamah nuduure.

¹⁶ Too ayrok wadir yi marak garab taamita waqdi, raaqe garab gob kee macaxuuy gaysê-baxa kee qeebil silaacak waasoh xagarat sartanah haan birta haysitta heenih dacayrih gacak yenen. Yuudak saqoltih yen mari kaadu xisot yan marak darre le kabut gaceeniih, cato neh yekken.

¹⁷ Quuka beya mara kinni way, xisne edde aban duyye gabak teenah abbaxukuuy, gabak teenat silac luk, quuka beyak yenen.

¹⁸ Xisnet yan mari taamite waqdi, numtin amol seef tikyah luk yenen. Baanta yaagure num yi garik yen.

¹⁹ Sarrak saqoltih yen mara kee baaxoh abbobti kee raqqa 'ye marak yakkeenimiik keenik exceemih, «A taama kaxxam mango taama kinnuk, tittak xer aroocal, mariiy isi gasoh taamat nek yan.

²⁰ Tonna kinnuk, too baantah anay taabben waqdi nel ama. Qeebi ni aftok neh abtu waytam, Yallay ni Dagelta kinni» keenik exce.

²¹ Tonnal, saaku maaci maacissa 'yaamak xabba haanamaay bar dite radda 'teh cutuuka eweqqa intam fanah, gasô-xisne aba garab kee macaxu gabat luk dacayrih gaca garabah sugne.

²² Sarra taamak foocat yan marak exceemih, «Sin kee taamat enna 'ya marak inkih, laqô-taamak kalah, bar kaadu magaala akah dacrisna innah elle xinnaama» keenik exce.

²³ Anu innih, bar kinni way, laqo xagarat luk asa sara bar kalak masuginniyooy; yi kataysis kee yoh taamita mara kee yot dacayrih yan mari kaadu toh abak suge. Silac ninnik ayxeeruk masuginnino.