Nacmiya 3 - NABUWWA KEE MALIKWA

YARUSALAAM MAGAALAK GASOOSA NAMMAYHAAK XISNE

¹ Magaalak gasoosa elle xisnem annak ten. Eliyaasib deqsita num kee kaal luk tan seeka taama qimbisak, Illi-Afa deqsitta afa xisen. Too afah xisnek gaba kalen saaku, afa Yallah taahirroyseeniih; culmah alifih edde haan coox edde heen. Seeka, sahda akak yabloonuh xisen Bool-Qari deqsita qarik xabba haanamaay sahda akak yabloonuh xisen Cananal-Qari fanah amma 'yaanam, a gaso Yallah taahirroysen.

² Yerikô-mari woo gasok seeka xisse exxal katayta exxa xisen. Imrí-Dakkur kaadu ciggilta exxa xise.

³ Hassana-gulubuh yooboke mari Kullum-Afa deqsitta afa xisen. Sarrak too culmah alifih edde haan coox kee woo alifik adda le kabuk tabtabbih haan coox kee birta akah bicsen.

⁴ Uriyyá-Mareemot deqsita numuy Hakkox deqsita numuk baxi baxah yanihiyya woo exxal katayta exxa bicse. Barkiyyá-Masullam deqsita numuy Masedbal deqsita numuk baxi baxah yanihiyya ciggilta exxa bicse. Baqná-Saaduk kaadu ciggilta exxa bicse.

⁵ Takooqa deqsitta magaalak yemeete mari kaadu ciggilta exxa akak bicsen. Takkay immay woo magaalak abbobtih yen mari, ken akah amrisen quukat axawah raqta taama cineenih.

⁶ Faseeyác-Yoyaadaq kee Basodyá-Masullam deqsita num Yasaanah-Afa deqsitta afa bicsen. Sarrak too mari too culmah alifih edde haan coox kee woo alifik adda le kabuk tabtabbih haan coox kee birta akah bicsen.

⁷ Gibqon magaalak yemeete Malaatiya deqsita numuuy, Meerom magaalak yemeete Yaadon deqsita numuuy, tonnah kaadu Mixfa kee Gibqon magaalak yemeete mari ciggilta exxa bicsen. Mixfa, Furaat Weeqaytuk Ayrô-culma le Kabut Raaqa Rasih abbah qari elle yen araca.

⁸ Carhayá-Quddiyal deqsita numuy dahab bicisak yenehiyya ciggilta exxa bicse. Qatri bicisak yen Cananiya deqsita num ciggilta exxay Kaxxa-Gidaar deqsita arac fan guftahiyya bicse.

⁹ Cuúr-Rafaaya deqsita numuy Yarusalaam magaalak exxak teenak abbah yenehiyya kaadu ciggilta exxa bicse.

¹⁰ Carumáf-Yadaqya too exxal katayta exxay isi buxat xayuk tene bicse. Casabnayá-Cattus kaadu ciggilta exxa bicse.

¹¹ Caarím-Malkiya kee Facat-Mooyab baxay Cassub deqsitahiyya nammayak titta lih, aki exxa kee gasoh amol sahda yabloonuh xisen Muufê-Qari deqsitak yen arac bicsen.

¹² Hallocás-Sallum deqsita numuy Yarusalaam magaalak exxak teenak abbah yenehiyya kaadu ciggilta exxa bicse. Too taamal say-xaylo kaa catte.

¹³ Dannowac deqsita aracal dabaqah suge mara kee Cannun deqsita num Goloh-Afa deqsitta afa bicisse. Too culmah alifih edde haan coox kee woo alifik adda le kabuk tabtabbih haan coox kee birta akah bicsen. Tokkek Guddaafâ-Qidim deqsitta afa fan raqta exxay xexxaarah alfi cusul takkehiyya bicsen.

¹⁴ Rekáb-Malkiya deqsita numuy Beet-Cakkarem deqsita aracih abbah yenehiyya Guddaafâ-Qidim deqsitta afa bicse. Sarrak too culmah alifih edde haan coox kee woo alifik adda le kabuk tabtabbih haan coox kee birta akah bicsen.

¹⁵ Kolhadá-Sallum deqsita numuy Mixfa deqsita rasuk abbah sugehiyya Raceynah Afa deqsitta afa bicse. Sarrak culmah alifih amo xiseeh; alifih edde haan coox kee woo alifit tabtabbih haan coox kee birta akah bicse. Saalec-Dora deqsita aracay malik bustaanak elle yamaateenihiyyal sugte gaso, Dawud-Magaala deqsita caafatak akak ooban mawqeena fan, bicisak baahe.

¹⁶ Qadbúk-Nacmiya deqsita numuy Beet-Xur magaalak exxak teenak abbah yenehiyya kaadu ciggilta exxay malikwâ-kabri elle yenehiyya kee gabak bicsen dora elle yan ikke kee Agiirâ-qari elle yan arac fan bicse.

LEEWIH MARI GASO XISE

¹⁷ Leewih yooboke mari kaadu gasoosak wohuk raqte exxaaxih bicsat gacen. Baaní-Racum exxak teena bicse. Casaabiya deqsita numuy Kaqiila deqsita rakaakayak garabak abbah yenehiyya tokkel, buxah yen marih afak, katayta exxa bicse.

¹⁸ Cendád-Bawway deqsita numuy kaadu woo rakaakayak garabak abbah yenehiyya ciggilta exxa bicse.

¹⁹ Yaasuwá-Qeder deqsita numuy Mixfa magaalak abbah yenehiyya silac qari elle yawqen gitat foocah raqta exxa xise. Toh, daaba le arac kinni.

²⁰ Dabbáy-Baaruk wohul katayta exxa bicseeh, Elyaasib deqsita kaxxa seekih yen numih buxah culma fan xisak baahe.

²¹ Uriyyá-Mareemot deqsita numuy Hakkox deqsita numuk baxi baxah yenehiyya tokkeek Elyaasib qari edde yaade exxa fanah bicse.

GASO BICISSE SEEKA AH TEETI

²² Tohul katayta arooca seeka bicisse. Naharak Yarusalaam magaalak dariifal buxah ten seeka ciggilta exxa bicisse.

²³ Benyam kee Cassub kaadu wohul katayta exxay ken buxat foocah raqtahiyya bicsen. Maqseyaahû-Qadarya deqsita numuy Qananya deqsita numuk baxi baxah yenehiyya, wokkeek elle yamaaten exxay kay buxak foocat raqtahiyya bicse.

²⁴ Cendád-Binnuy wohul katayta exxa bicse. Tohuuy, Qadaryah buxaak gaso akak makkinta araca. Tohuk lakal, daaba luk yen arac fan xise.

^25-26 Udáy-Falal kaadu wokkel katayta exxa bicse. Tohumu, daaba le arac kee, fayya le aracat raaqa malik-qarih-daaratal qaskar-elle-gacta-aracih amol yan qariy sahda akak yabloonuh xiseenihiyyak foocat raqta exxak ten. Farqós-Fadaaya wokkek elle yamaaten exxa bicseeh, xisne ayrô-mawqa le kabuk Leeh-Afa deqsitta afa kee sahda akak yabloonu xisen qari fanah abe. Too taamal kaa catak tenem, Yallih Qibaadah-Qarit taamah yen maray guubuh magaalak Oofal deqsita caafatal sugehiyyak ten.

WOHUK KALAH XISNE ABE MARI AH KAANA

²⁷ Takooqâ-mari wohuk elle yamaaten exxah bicsat gacen. Oson too taamah taamiteenimih, tah nammeyhaytoh addak ten. Tohum akak qimbiseenim, kaxxam amo xer qariy dacayri amook akak abaanahiyyat foocah raaqa aracak xabba heenih, Oofal deqsita caafatal tan gasoh xaquh amma 'yaanam fan yan aracak ten.

²⁸ Tonnah kaadu, seekay hoor takkehiyya wokkel katayta exxaaxi bicisse. Oson bicsa akak qimbiseenim, Faras-Mawqa deqsitta afa. Tokkek xabba heenih kulli num keenik isinni buxak foocat tan ikke bicisak baahen.

²⁹ Immár-Saaduk kaadu wokkel katayta exxa bicse. Tohum kay qarit foocah yan aracak ten. Sekanyá-Samaqya deqsita numuy Yallih Qibaadah Qarik Ayrô-Mawqah Afa dacrisak yenehiyya ciggilta exxa bicse.

³⁰ Selemyá-Cananya kee Cannun deqsita numuy Xalaf deqsita numuk lab xaylok leceyhaytô-baxah yenehiyya wokkel katayta exxa bicsen. Oson taamiteenimih, tah nammeyhaytoh addak ten. Barkiyyá-Masullam deqsita num kaadu wokkel katayta exxay kay qarik foocah tanihiyya bicse.

³¹ Malkiya deqsita numuy dahab bicisak yenehiyya wokkek elle yamaaten exxa bicse. Too num tokkeek Yallih Qibaadah-Qarit taamita mara kee tellemmo mari edde suge qariy Mafdaga-Afa deqsitta afat foocah raaqahiyya kee gaso akak makkinta aracay amol qari akak yanihiyya fan bicse.

³² Dahab bicisak yen mara kee tellemmo abak yen mari ellecaboh exxa bicsen. Gaso akak makkinta aracay amol qari akak yanihiyyaak, Illi-Afa deqsita arac fan bicsen.