Nacmiya 2 - NABUWWA KEE MALIKWA

NACMIYA YARUSALAAM GEXA'GIDIH MALIK ESSERE

¹ Tu edde taade Artacsasta deqsitak yen malik edde reede labaatanhaytô sanatak migaaqah Niisan deqsita alsat, malik qinab kamri elle yaaqube'kkel, too kamri gabal kaak hee. Dumak kay foocal farcatal taamitak suge. Woo saaku faxe waynaan ceelo yok yubleh.

² Too waqdi «A saaku maca geytee? Yambulle biyak way mantuk, litom maca faxe waynaanaay? Atu litom niyâ xiglo yot celta» yok iyye. Too waqdi warigga exceeh,

³ sarrak kaak exceemih, «Yi malikow, qumri kok yaxxeeray. Yi kaxxa abbobtih kabri elle yan magaala abur tekkeeh, tet akak culan culma carriseenih; tah inkih aaxagih faxe-waynaan mannal sinniyo?» exce.

⁴ Malik too waqdi, «Away hay, maca koh abam yok faxxaah?» yok iyye. Too waqdi qaraanal yan Yalla kallaceeh,

⁵ sarrak malikik exceemih, «Yi malikow, yooy ku naqasuh yanih temqeeh, anu koo esseram oggoltek, Yuudâ-rasu kee anu akak rade yi kaxxa abbobtih kabri elle yan magaala gexxa exceh nammeyhaak xisa'gidih, yoo rubtam kok faxa» exce.

⁶ Malik too waqdi isi barra luk daffeyak sugeeh, anu inxicca excem yoh oggoleh. Sarrak «Hay, ta safarat magide sugettoo? Maa waqdi aduuretto?» yok iyye. Toh kinnih gide kaah warseh.

⁷ Sarrak kaak exceemih, «Yi malikow, yoh idnissek, Furaat Weeqaytuk Ayrô-culma le kabut Raaqa Rakaakayih abbobtih yan marah, Yuudâ-rakaakay gexa'gidih, warkat yoh taktubem faxa.

⁸ Tonnah kaadu, ku garbot dacayrih yan numuy Asaf deqsitahiyyah warkat yoh aktubetto» kaak exce. Woo warkatal farmoh intaamah, ‹Yallih Qibaadah-Qarik xaqut yan reebuk xisen qarih afah alifuh edde heen coox kee, magaalat maroh yan gidaar edde xisan coox kee, kalah kaadu, anu dabaaqah edde gacu waa qarih coox yoh ucuya› 'yaanam kaak yoh inxic» kaak exce. Yalli yo'lih yeneemih sabbatah, malik anu kaa esserem yoh abeh.

NACMIYA MAGAALÂ GASOOSAH XISNEH ABE MALA

⁹ Tohuk kalah qaskar abbobti kee faaris amok qeebi abta qaskar wakalih yoh yecee. Sarrak safarah Furaat Weeqaytuk Ayrô-culma le kabut Raaqa Rakaakay fan gexe. Tokke gufe waqdi malikik baahe warkat too rasih abbobtil ecee.

¹⁰ Sanballat deqsita numuy Beet-Coron deqsita magaalal yooboke kee Toobiya deqsita numuy Qammon rasul doolat saqalah yenehiyya, Israayil ummatah meqe taamat asam faxa num yemeete 'yaanam yoobben waqdi, kaxxam faxe cineenih.

^11-12 Sarrak anu tokkeek Israayil rasu fan gexeeh, Yarusalaam gufe. Sidooca ayroh gide Yarusalaam xisney Yalli yi gabat absiisam faxehiyya numuh mawarsinniyo. Sarrak barak gude ugutta exceeh, wakalih dago mara inni lih hayya heeh gexe. Amot akak en merraytuk sah kalah merraytu mabennino.

¹³ Barat edde, Goloh-Afa deqsitta afak gacca exceh magaalak tattab-tattab gexeh, Gawi-Buyyi deqsita aracak gacca exceh, Guddaafâ-Qidim deqsitta afa guffa haam fan, magaalat maroh ten gasoy tiddigille kee magaalah afoofiy carartehiyya cubbusak gexe.

¹⁴ Sarrak Raceynah Afa deqsitta afak Amoyti-Dora deqsita arac fan gufe. Tokke gufe waqdi, amot akak gexak suge merrayti gita weeh;

¹⁵ tohih sabbatah Kidroon-Golok adda oobba exceh, gaso elle tani'nna wagitak gexe. Sarrak akak emeete gitaak gacca exceh, Goloh-Afa deqsitta afak magaala cule.

¹⁶ Anu elle suge ikke kee abak sugem, baaxoh abbobtik num aaxaguk mananna. Anu kaadu taham fan, yok kaxxih Yahuuduh yooboke maraay seekaay saqoltih yan maraay baaxoh abbobti kee wohuk kalah yan maray a taama yo'lih abu waahiyyak, a gasoosa xisam faxam numuh mawarsinniyo.

¹⁷ Takkay immay magaala wagtek lakal keenih warseeh, keenik exceemih, «Labhay, edde nan gibdaabina wagitay. Yarusalaam abur tekkeeh, tet akak culak yenen afoofi gira edde ruubeenih cararte. Away magaalâ-gasoosa xissa hayneh, edde nan qaybik ninni nayyaaqay› keenik exce.

¹⁸ Sarrak Yalli yoh abem kee yoo elle cate'nna keenih warseeh, malik kaadu yok iyyem keenih warseh. Oson too waqdi «Hayya hay xiso qimbisnay» iyyeeniih, gasoosa xisaana'gidih bical gacen.

¹⁹ Sanballat kee Toobiya kee uli Qarabtoytay migaaqah Gesam deqsitahiyya nanu abnam fanxam yoobben waqdi, asalah nel hayya heeniih, «Away abtaanam takkaleenim macaay? Malikik naqboytit isinni abtaanam faxxaanam hinna!» anqaasak iyyen.

²⁰ Too waqdi anu keenil gacseemih, «Qaraanal yan Yalli abnam fanxam gabal nek bicsele. Nanu kay naqoosa kinninooh, a magaala xisenno ikkal, fanat manaadiya. Sin tiyah tu gactek, Yarusalaam magaala siinih dumaak takkem luk masuginnaay, a way uxih siinih takkem mali» keenik exce.