Nacmiya 12 - NABUWWA KEE MALIKWA

SEEKA KEE LEEWIH YOOBOKE MARIH MIGOOQA

¹ Ahaak addah migaq akak yanim, seeka kee Leewih yooboke maray seewah ken elle been baaxok yuduurehiyya. Ta mara lih tuduurem, Saltiyal baxa Darabbabel kee kaxxa seekih yen sek Yaasuwak ten.

^2-7 Seekak tuduurem: Seraaya kee Ermiyaas kee Qedra kee Amarya kee Malluk kee Cattus kee Sekanya kee Racum kee Mareemot kee Qiddo kee Ginnatoy kee Abiyya kee Miyyamin kee Maqadya kee Bilga kee Samaqya kee Yoyyaarib kee Yadaqya kee Sallu kee Qamok kee Cilkiyya kee Yadaqya deqsita seekik ten. Ta mari yakkeemiik seekak saqoltih raqta seekak yenen. Too waktil, kaxxa seekih tenem, Yaasuwa deqsita seekik ten.

⁸ Leewih yooboke maray Yalla saarisak candu Yallah gacisak yenehiyya kaadu ah kaana. Yaasuwa kee Binnuy kee Kadmiyal kee Sereebiya kee Yuuda kee Mattanya deqsita numuk ten.

⁹ Yallih saare aban waqdi woo saare akkuquk tenem, Bakbukya kee Qunni kee raqqa 'ye maray Leewih yaabukehiyyak ten.

KAXXA SEEKIH YEN SEK YAASUWAK RADE MARA

¹⁰ Yaasuwa, Yoyaakim xale; Yoyaakim Elyaasib xale; Elyaasib Yoyaadaq xale;

¹¹ Yoyaadaq Yonaatan xale; Yonaatan, Yadduqa xale.

SEEKAK KULLI GULUBUK SAQOLTIH YEN MARA

^12-21 Tahaak addah migaq akak yan mari, Yoyaakim kaxxa seekih yen dabaanal, seekak kulli gulubuk saqoltih yen marak yeneeh; migaq keenik ah kaana. Sek Meraaya deqsita seekiy Seraaya deqsita gulubuh gacsehiyya kee, Cananiya deqsita seekiy Ermiyaas deqsita gulubuh gacsehiyya kee, Masullam deqsita seekiy Qedra deqsita gulubuh gacsehiyya kee, Yahoocanan deqsita seekiy Amarya deqsita gulubuh gacsehiyya kee, Yonaatan deqsita seekiy Malluki deqsita gulubuh gacsehiyya kee, Yuusuf deqsita seekiy Sebanya deqsita gulubuh gacsehiyya kee, Qadna deqsita seekiy Caarim deqsita gulubuh gacsehiyya kee, Celkay deqsita seekiy Maraayot deqsita gulubuh gacsehiyya kee, Zakariyya deqsita seekiy Qiddo deqsita gulubuh gacsehiyya kee, Masallum deqsita seekiy Ginnaton deqsita gulubuh gacsehiyya kee, Dikri deqsita seekiy Abiyya deqsita gulubuh gacsehiyya kee, Uli seekiy Minyaamin deqsita gulubuh gacsehiyya kee, Filtay deqsita seekiy Moqadya deqsita gulubuh gacsehiyya kee, Sammuqa deqsita seekiy Bilga deqsita gulubuh gacsehiyya kee, Yahonaatan deqsita seekiy Samaqya deqsita gulubuh gacsehiyya kee, Mattanay deqsita seekiy Yoyyaarib deqsita gulubuh gacsehiyya kee, Quddi deqsita seekiy Yadaqya deqsita gulubuh gacsehiyya kee, Kallay deqsita seekiy Sallay deqsita gulubuh gacsehiyya kee, Qeebar deqsita seekiy Qamok deqsita gulubuh gacsehiyya kee, Casaabiya deqsita seekiy Cilkiyya deqsita gulubuh gacse kee, Netanel deqsita seekiy Yadaqya deqsita gulubuh gacsehiyyak ten.

WOO MARIH MIGOOQA EDDE YUKTUBEN WAKTI

²² Sek Elyaasib kee sek Yoyaadaq kee sek Yocanan kee sek Yadduqa deqsita sek addunyal elle anih, Leewi kee seekah yaabuke marih migaq yunkuttubeh yen. Ta affara sek addunyal anih, kaxxa seekak yenen. Takkay immay Daryawes deqsita num, tu edde taade Fursih malik yekke ayrok wadir migaq kutbe gaba kalte.

²³ Leewih yooboke marak abbootan luk yen marah tu gactekiiy, migaq keenik edde yuktubeenim, Eliyaasibik baxi baxah yen Yocanan deqsita num addunya bagul edde yen uddur kee kaak dumih udduruk dibuk ten.

LEEWÎ-MARI ABE TAAMA

²⁴ Casaabiya kee Sereebiya kee Yaasuwa kee Binnuy kee Kadmiyal deqsita num Leewih yooboke marak foocat anuk, ken missoyseeniih butta-buttal ken heen. Ta mari namma buttah gacca 'yeh, Malik Dawuduy Yallih numuh yenehiyya elle abak yen innal, Yallih saare aba mara kee yakkuqe marah gacca 'yeenih, Yalla faylisak yenen.

²⁵ Mattanya kee Bakbukya kee Qobadya kee Masullam kee Talmon kee Qakkub deqsita num Yallih Qibaadah-Qarik culmal yen makaadiniy duyye edde daanisaanahiyyat aban dacayrik saqoltih yenen.

²⁶ Ta mari inkih elle yenem, Yaasuwá-Yoyaakimiy kaxxa seekih yenehiyya kee Nacmiyay baaxoh abbah yenehiyya kee sek Qedray Yallih xinto intam kaxxam aaxaguk yenehiyya addunyal yenen saakuk ten. Yaasuwá-Yoyaakimik kaxxa abba Yahuuxadak deqsita numuk ten.

GASOH QAFFAYDAH AYRO

²⁷ Yarusalaamat maroh ten gasoy tiddigilleh sugtehiyyah xisnek gaba kalen saaku, Leewih yooboke marah seeco aben. Keenih akah seeceenim, ruffa axcuk edde asaana'gidiiy, Yallah candu edde gacsaana'gid kee Yalla edde saarisaana'gidik ten. Too saarel, kirar kee begenaay giyaagib aagaruk Yalla saarisak, candu Yallah gacsen.

^28-29 Leewih yooboke maray Yalla saarisahiyya Yarusalaam dariifal isinni gaandoodi xiseenih yenen. Too saaku, elle sugen Yarusalaam dariifa kee Natoofa deqsitta magaalah dariifaay, Beet-Gilgal deqsitta magaala kee Gabaq kee Qadmawet deqsitta namma magaalah dariifak gaabooweenih yemeeten.

³⁰ Tohuk lakal seeka kee Leewih yooboke mari, isinni nabsi taahirroyseeniih; sarra kaadu ummatta kee Yarusalaam magaalat maroh sugte gasoy xiseenihiyya kee woo gasoh afoofi taahirroysen.

³¹ Sarrak anu Yuudak saqoltih yan mara magaalat maroh tan gasoh amol hee. Too waqdi saare-abay mangohiyya namma exxah hayya heeh, «Yalla faylisak, gexa» keenik exce. Naharsi roorut suge marak, «Guddaafâ-Qidim deqsitta afay migdi kabut raqtahiyya fan foora» exce.

³² Hosaqya deqsita num kee Yuudâ-saqoltik garab yakke mari too maray Yalla saarisak gexahiyyah lakat yen.

^33-35 Too mara lih *baanta aagaruk gexxem, sek Qadarya kee sek Qedra kee sek Masullam kee sek Yuuda kee sek Benyam kee sek Semaqya kee sek Ermiyaas deqsita seekik ten. Too seekah lakal kaadu Yonaatán-Zakariyyak ten. Zakariyya-kaxxa abba Samaqya deqsita numuk ten. Zakariyya akak radem, Mattanya kee Miikayhu kee Dakkur deqsita numuk ten. Ta mari Asaf deqsita gulubuh gacisak yenen.

³⁶ Zakariyya-lakat tenem, kaah ramad le maray Samaqya kee Qadarel kee Millay kee Gillay kee Maqay kee Netanel kee Yuuda kee Canaani deqsitahiyya. Ta mari inkih, Dawuduy Yallih numuh yenehiyya Yallah saare edde abak yen duyye gabat luk yenen. Ta maray rooruh gexehiyyak foocat tenem, Qedra deqsita numuy Yallih xinto intam nagay aaxaguk yenehiyyak ten.

³⁷ Raceynah Afa deqsitta afa gufen waqdi, Dawud-Magaala deqsita caafatih mawqeenal yewqen. Sarra, Dawud-xise qarik taturra 'yeenih, magaalak ayrô-mawqa le kabut raqta afay Leeh-Afa deqsitahiyyah xaqul yeeden.

³⁸ Saare-abak nammayhaytô-butta, gasok gura le kabut raqta exxak amo gacak, Yalla faylisak tatren. Yoo kee sahdak garab ken katayne. Gasoh amol sahda akak yabloonuh xisen Muufê-Qari deqsitak yen qaril taturra inneh, Bagu-naba Gaso deqsitta gaso fan nemeete.

³⁹ Tokkeek Efrayim-Afa deqsitta afa kee Yasaanah Afa deqsitta afaay, Kullum-Afa deqsitta afaay, sahda akak yabloonuh xisen Cananal-Qari deqsitta qari kee, sahda akak yabloonuh xisen Bool-Qari deqsita qaril taturra inneh, Illi Afa deqsitta afah nemeete. Ta gexoy rooruh gacca 'yeenih abak sugeenihiyyak, Dacayrih Marih Afa gufen waqdi yeeden.

⁴⁰ Ta saare-abay namma exxah gacca 'teh Yalla faylisak gexxehiyya ellecabol Yallih Qibaadah-Qaril elle sooloonu waan arac yibbixen. Yoo kee yo'lih suge mari kaadu Qibaadâ-Qarik foocal solle. Yo'lih ta gexot ten saqoltik kalah,

⁴¹ a gexot yo'lih tenem, baanta hayta seekak ten. Ken migaq ah kaana. Sek Elaakim kee sek Maqseyaahu kee sek Minyaamin kee sek Miikayhu kee sek Elyoqeenay kee sek Zakariyya kee sek Cananiya deqsita seekik ten.

⁴² Ken lakal tenem kaadu, Maqseyaahu kee Samaqya kee Alqedar kee Quddi kee Yahoocanan kee Malkiya kee Qeelam kee Qader deqsita numuk ten. Too waqdi saare-aba anay fayya haak, Yalla faylisen. Saqalah keenik tenem, Yidracya deqsita numu.

⁴³ Too saaku mango sadgat abeeniih, kaxxam ruffa iyyen. Akah ruffa iyyeenim, Yallak geen kaxxa farcik ten. Too saaku aben qaffaydat agabu kee urri yengeleeh; oson ruffok gexxaamah aban xongolo xer baaxo fan antaabbuk ten.

YALLIH QARIL QIBAADAH GAABOYSAN DUYYE

⁴⁴ Too saaku, Yallih Qibaadah-Qarih gaaboysan duyye kee, Yallih Qibaadah-Qaril gaaboysan dakaat kee, kulli sanatal darok naharat orobte daro kee, naharal alaye caxâ-miru elle daanisan qarih dacayrih taamat labha heen. Ta mari magaaloolil xayi buqreh baaxok ta maaqo seeka kee Leewih yooboke marah gaaboysaanam taamah luk yenen. Toh kitab elle iyya'nnal abak yenen. Yuudah yooboke mari inkih, seeka kee Leewih yooboke mari abe taama yossokooteh yen.

⁴⁵ Ken akah yossokooteenim, seeka kee Leewih yooboke mari Yallah qibaadah kullim taahirik hayyaay, qibaadah faxximta taama Yalli elle iyye'nnal abak yeneenimih taaga. Yallih Qibaadah-Qarih addal saare aba mara kee Yallih Qibaadah-Qarit dacayrih yan mari, Malik Dawud kee kay baxa Suleeman teyyeeqe madqa kataatak yenen.

⁴⁶ Dawud kee Asaf dabaanal, Yallih fayla kee Yallah candu gacsan waqdi, miraacisah yan saqal suge.

⁴⁷ Duma Darabbabel deqsita numih daban kee, tonnah kaadu Nacmiya deqsita numih dabaanal, Israayil mari yakkeemik inkih Qibaadâ-Qaril saare aba mara kee Qibaadâ-Qarit dacayrih yan marah, kulli ayro catoh mattaco acayuk yenen. Tonnah kaadu Leewih yooboke marah taahirik tan mattaco acayuk yenen. Leewih mari kaadu seekah, Yallih xinto elle inta'nnal, keenih yeexegen afto keenih acayuk yenen.