Nacmiya 11 - NABUWWA KEE MALIKWA

YARUSALAAMAL GACE MARI AH KAANA

¹ Abbobtih yan mari Yarusalaamal nooke. Too saaku, tabna numih addak inki numuy taahirik tan Yarusalaam magaalal dabaaqah gacu waahiyyah saami caxxa qiden. Wohuk raqqa 'ye mari elle suggu 'ye magaaloolil elle raaqe.

² Wohuk kalah, saami caxxi elle awqe'kah, is amook Yarusalaamal dabaaqah gacam faxa numut «Yalli barkat haay» iyyen.

³ Seeka tanuu, Leewih yooboke mari yanuu, Yallih Qibaadah-Qarit taamita mari yanuu, Suleeman buxah taamitak yen marih ramad yanuu, wohuk kalah, raqqa 'ye maray Israayilih ubukka iyyak numuuy isi kaxxa abbak raqte magaalal isi guubul keenik gace. Yuudâ-rakaakayak saqoltih yen maray Yarusalaamal dabqih gacehiyya ah kaana.

⁴ Yuudah yooboke marak Qataaya deqsita numuy abba akak Quddiyya deqsitaah kaxxa abba akak Zakariyya deqsitahiyyak ten. Zakariyyah abba Amarya deqsitak yen. Amaryah abba Safatya deqsitak yen. Safatyah abba Mahlalel deqsitak yen. Ta mari inkih akak radem, Fares deqsita numuy Yuuda xalehiyyak ten.

⁵ Tohuk kalah Maqseyaahu deqsita num yen. Kaak abba Baaruk deqsitak yen. Baaruk abba Kolhoda deqsitak yen. Kolhodah abba Cadaya deqsitak yen. Cadayah abba Qadaaya deqsitak yen. Qadaayah abba Yoyyaarib deqsitak yen. Yoyyaarib abba Zakariyya deqsitak yen. Ta mari inkih akak radem, Saalec deqsita numuy Yuuda xalehiyyak ten.

⁶ Fares deqsita numuk rade marak Yarusalaamal dabaaqah gactem, affara bool kee lactam kee bacra numuk ten. Ta mari inkih kaxxa agiirak yenen.

⁷ Benyam deqsitta kedok rade marak noktem kaadu Sallu deqsita numuk ten. Salluh abba Masullam deqsita numuk teneeh, Masullam abba Yoqed deqsita numuk ten. Tohuk kalah ta num akak radem, Fadaaya kee Kolaaya kee Maqseyaahu kee Itiyal kee Yasaqya deqsita numuk ten.

⁸ Gabay kee Sallay kaadu Yarusalaamal nooke marat yenen. Ta namma num Sallu deqsita numuk xayi ramadak yenen. Benyaamah yooboke marak Yarusalaam magaalal nooke mari tittat sagla bool kee labaatanna kee bacra num akkuk yen.

⁹ Ayyuqel deqsita num ta marak inkih saqalak yeneeh; kay abba Dikri deqsitak yen. Yuuda kaadu Ayyuqel gubal magaalah abbak yen. Yuudah abba Hasnuwa deqsita numuk ten.

¹⁰ Seekak kaadu Yarusalaamal dabaaqah gactem, Yadaqya deqsita seekik teneeh, kaak abba migaaqah Yoyyaarib deqsitak yen. Ta seekik kalah kaadu Yaakin deqsita sek Yarusalaamal dabaaqah gace.

¹¹ Seraaya deqsita sek, Yarusalaamal dabaaqah gacte seekak numuk teenah yen. Kay abba Cilkiyya deqsitak yen. Cilkiyyah abba Masullam deqsita numuk ten. Ta num akak radem Saaduk kee Maraayot kee Aciitub deqsita numu. Aciitub kaxxa seekik ten.

¹² Ta mari akak rade gulubuy Yallih Qibaadah-Qarih addal taamitak yenehiyyak Yarusalaam magaalal dabaaqah gactem, tittat bacra bool kee labaatanna kee namma numuk ten. Ta marak kalah seekak Yarusalaamal dabaaqah gactem, Qadaaya deqsita seekik ten. Ta seekik abba Yaroocam deqsita numuk teneeh, Yaroocam abba Falalya deqsita numuk ten. Ta num akak radem, Amxi kee Zakariyya kee Fascur kee Malkiya deqsita numuk ten.

¹³ Ta mari akah yaabuke gulubuk saqoltih yan marak tittat namma bool kee morootom kee namma num Yarusalaamal dabaaqah gace. Qamassay deqsita sek kaadu dabaaqah Yarusalaamal gace marak numuk teenak yen. Qamassay abba Qadaril deqsita numuk ten. Qadaril abba Acday deqsita numuk ten. Acday abba Masilleemot deqsita numuk ten. Masilleemot abba Immar deqsita numuk ten.

¹⁴ Ta mari akah yaabuke gulubuk Yarusalaamal dabaaqah gactem, tittat bool kee labaatanna kee bacra qaskariitak teneeh; oson yakkeenimiik kaxxa agiirah tan qaskarak yenen. Saqalah keenik tenem, Dabdiyal deqsita numuk ten. Dabdiyal abba Haggedolim deqsita numuk ten.

^15-16 Leewih yooboke marak kaadu Yarusalaamal dabaaqah gactem, Samaqya deqsita numuk teneeh, too numih abba Cassub deqsita numuk ten. Cassub abba kaadu Qadrikam deqsita numuk ten. Qadrikam abba Casaabiya deqsita numuk ten; Casaabiyah abba Bunni deqsita numuk ten. Sabbatay kee Yoodabad deqsita namma numuy Leewih yoobokehiyya kaadu Yarusalaamal dabaaqah gace marih addat yenen. Samaqya kee ta namma num Leewih yooboke marak saqoltih yenen. Taama elle luk yeneenim, Yallih Qibaadah-Qarik iroh raaqa aracak ten.

¹⁷ Mattanya kaadu Yarusalaamal dabaaqah gace marak numuk teenah yen. Mattanyah abba Miika deqsita numuk teneeh; Miikah abba Dabdi deqsita numuk ten. Asaf deqsita numih gulubuk yenen. Mattanya Yallih Qibaadah-Qaril Yalla faylisak aban saare edde haa numuk ten. Bakbukya deqsita num kaadu Yarusalaamal dabaaqah gace marat yen. Mattanya kee kaa'lih yan mari saare edde haa waqdi, Bakbukya kee kaa'lih yan mari saare kaah akkaquk yen. Leewih yooboke marak Qabda deqsita num kaadu Yarusalaamal dabaaqah gace marat yeneeh, abba kaak Sammuqa deqsita numuk ten. Sammuqa abba Galal deqsita numuk ten. Akak radeenim, Yadutan deqsita numuk ten.

¹⁸ Ta mari inkih Leewih yooboke marak yeneeh; ta kedok Yarusalaam magaalay taahirik tanihiyyal dabaaqah gactem, tittat namma bool kee bacra-taban kee affara numuk ten.

¹⁹ Yallih Qibaadah-Qarit dacayrih yen marak kaadu Yarusalaamal dabaaqah gactem, Qakkub kee Talmon kee keenik ramadah yen maraay; mangah tittat bool kee malcina-taban kee namma num akkuk yenen.

²⁰ Raqqa 'ye maray Israayilih yaabukehiyyak, seeka kee Leewih marih agantah, kulli num keenik Yuudâ-magaaloolik isinni kaxxa abbobti elle sugte aracal dabaaqah gacen.

²¹ Takkay immay Yallih Qibaadah-Qaril taamitak yen mari Yarusalaam magaalak Qoofal deqsitta exxal dabaaqah gace. Ta marak abbobtih tenem, Xiica kee Gisfa deqsita namma numuk ten.

²² Leewih yooboke maray Yarusalaamal dabaaqah yenehiyyak amo wagitak tenem, Quddi deqsita numu. Quddih abba Baani deqsita numuk ten. Baanih abba Casaabiya deqsita numuk ten. Casaabiya akak radem, Mattanya kee Miika deqsita maraay; akah gacsaanam, Asaf deqsita gulubu. Asaf deqsita gulubuk Yallih Qibaadah-Qaril aban Yallih saare absiisa marak yenen.

²³ Malik buxah gasok amri yewqeh yeneeh; too amri, kulli ayro midu-miduh ta mari Yallih Qibaadah-Qaril takke saare elle aban inna yascasse amrik ten.

²⁴ Fatacya deqsita num Fursi-Malikih garil Israayil ummatih awlaytuh yen. Fatacyah abba Mesedbal deqsita numuk ten. Fatacya Yuudâ-kedok Dara deqsita gulubuh gacisak yen.

YARUSALAAMAK IROL TAN MAGAALOOLI

²⁵ Buqre elle lon aracal xayi magaaloolil dabaaqah gace mara kee ken magaaloolih migaq ah kaana. Yuudah yaabuke mari dabaaqah elle gacem, Kiryat-Arbaq deqsitta magaala kee Dibon kee Yakabaxal deqsitta magaala kee woo magaaloolih dariifal tan gaandoodik ten.

²⁶ Tohuk kalah ta mari dabaaqah elle gacem, Yaasuwa kee Moolada kee Beet-Falat kee

²⁷ Caxar-Suqal kee, Bersabaq kee tet dariifal tan gaandoodik ten.

²⁸ Ta magaaloolik kalah kaadu, Xiklag kee, Makoona kee tet dariifal tan gaandoodil dabaaqah gacen.

²⁹ Qenrimmon kee Xorqa kee, tonnah kaadu, Yarmut kee

³⁰ Danowac kee Qadullam deqsitta magaala kee a sidiica magaaloolih dariifal tan gaandoodil dabaaqah gacen. Ta magaalooli kee gaandoodik kalah kaadu, Laakis deqsitta magaala kee a magaalah dariifal tan baqurê-baaxol dabaaqah gacen. Qadeeka deqsitta magaala kee woo magaalah dariifal tan gaandoodil kaadu dabaaqah gacen. Tonnal, Yuudah yooboke mari elle nooke baaxo, gabbi le qaxak Bersabaq kee kilbat le kabuk Hinnom Golo deqsita namma aracih fanat ten.

³¹ Benyaamah yooboke mari dabaaqah elle gacem, Gabaq kee Mikmas kee Qayya deqsitta magaala kee, Beetal-magaala kee tet dariifal tan gaandoodik ten.

³² Tohuk kalah kaadu, Qanatot kee Noob kee Qananya kee

³³ Caxor kee Raama kee Gittayim kee

³⁴ Caadid kee Xiboyim kee Neballat kee

³⁵ Lood kee Oono deqsitta magaala kee Naggorti-Golo deqsitta golol guubuh gacen.

³⁶ Leewih yooboke marak garabay Yuudâ-rasul dabaaqah duma sugehiyya Benyaamah yooboke mara lih dabaaqah heen.