Nacmiya 10 - NABUWWA KEE MALIKWA

UMMAT TITTA GEYTEEMIH FIRMA HAYTE

¹ Naharsi firma haytem, baaxoh-abbah yen Nacmiyak ten. Nacmiyak abba Cakliya deqsita numuk ten. Nacmiya-lakal firma haytem, Xidkiya deqsita numuk ten.

^2-8 Seekak kaadu firma haytem: Seraaya kee Qadariyya kee Ermiyaas kee Fascur kee Amarya kee Malkiya kee Cattus kee Sebanya kee Malluk kee Caarim kee Mareemot kee Qobadya kee Daaniyel kee Ginnaton kee Baaruk kee Masullam kee Abiyya kee Miyyamin kee Maqadya kee Bilgay kee Samaqya deqsita seekik ten.

^9-13 Leewih yooboke marak firma haytem: Yaasuwa deqsita numuy Adanya deqsita numih baxak tenehiyya kee Cendad deqsita gulubuh yooboke numuy migaaqah Binnuy deqsitahiyya kee Kadmiyal kee Sebanya kee Hoodiya kee Kaliita kee Felaaya kee Caanan kee Miika kee Racob kee Casaabiya kee Dakkur kee Sereebiya kee Sebanya kee Hoodiya kee Baani kee Beninu deqsita numuk ten.

^14-27 Ummattak saqoltih yen marak firma haytem: Farqos kee Facat-Mooyab kee Qeelam kee Dattuq kee Baani kee Bunni kee Qadgad kee Beebay kee Qadoona kee Bigway kee Qaadin kee Aatar kee Ciskiyyaahu kee Qaddur kee Hoodiya kee Casum kee Bexay kee Carif kee Qanatot kee Nebay kee Magfiqas kee Masullam kee Ceedir kee Mesedbal kee Saaduk kee Yadduqa kee Falatya kee Canaan kee Qanaaya kee Hosiqa kee Cananiya kee Cassub kee Hallocas kee Filca kee Soobik kee Racum kee Casabna kee Maqseyaahu kee Aciyya kee Canaan kee Qanan kee Malluk kee Caarim kee Baqna deqsita numuk ten.

TITTA ELLE GEENIM AHAK TEN

²⁸ Israayilih yooboke marak, seeka kee Leewî-mara kee Yallih Qibaadah-Qarit dacayrih yan mara kee Yallih Qibaadah-Qaril saare aba mara kee Yallih Qibaadah-Qarih taama aba mari, too maray nek saqoltih yanihiyya lih gacen. Wohuk kalah kaadu, Yallih xinto intam oggolaana'gidih, marin baaxoh maray ni addal yanihiyyak yexxeere mari too saqoltih yan mara lih gacen. Woo yuktuben warkatay titta elle geenim elle yuktubeenihiyya axcuk teneemih, «Tahak wadir nee kee ni agabuuy ni xayloy kas kassoowehiyyak labim kee sayim inkih nakkeemik

²⁹ nek saqoltih yan mara lih gacca inneh, ‹Yallih xintoy isi naqasuh yan Muusal ruubehiyya intam cinna haynek, digaalah abaaro nee tabbaxay› 'yaanamal xiibinnah nan. YALLAY ni Dageltah yanihiyya nee akah amrisem oggolenno. Kay amri kee usuk nek aba iyyem abenno 'yaanamal titta geynah nan.

³⁰ Tonna leemiik, akkel ni rasul ne'lih yan marin baaxoh maral rihime waynaah, nek kaadu rihmise waanama.

³¹ Marin baaxoh mari daro akkiiy, hinnay kaadu, wohuk kalah tan duyye sabti ayro akkiiy qiidih edde asna ayro nee fan baahen ken tekkek, keenik maxaanna. Malcinhaytô-sanat gufa saaku, sanat fanah buqre abe'kal sugennooh, tonnah kaadu sinaamat lino mago sinaamah cabenno.

³² Kulli sanatal Yallih Qibaadah-Qarih taamah lakqok affara giraam takkem numtin amol yaceenim fardih nel tan. A lakqo Yallih Qibaadah Qarih faxximtam edde xaamenno.

³³ Yallih Qibaadah-Qarih taamah faxximtam: taahirroysen-gaqambooy, kulli ayro xayyoosan daro kee, cado akak sadgatah cararisan saqaay; alsi biloh aban sadgataay, sabti qiidih aban sadgat kee, wohuk kalah yan qiidih aban sadgat kee, wohuk kalah yan sadgatay taahirik yanihiyya kee, Israayil marih dambi kalootuh aban sadgat kee, wohuk kalah tan duyyey Qibaadâ-Qarih taamah faxxintahiyyak ten.

³⁴ Nanu inkih tan Israayil xaylooy, axcih kaadu, Israayilih taabuke seeka kee Israayilih yooboke Leewih marak, Yallih xinto elle inta innal, YALLAY ni Dageltah yanihiyyah sadgatah qidan saqih cado elle carartu wayta boco baahu waa marah saami caxxa gulub-gulubul qidenno. Too boco kulli sanatal yaaxigen waktil baahenno.

³⁵ Kulli sanatal darok naharat orobta daro kee, caxâ-miruk naharat yooboke caxâ-miraytu YALLIH Qibaadah-Qari fan sadgatah beyaanam fardih nel tan.

³⁶ Naharsi-baxak lab-baxa kee naharat yooboke dahaltu kee illi kee wadarak kaadu naharat yooboke saq, Yallih xinto elle inta'nnal, Yallih Qibaadah-Qarih addal taamitta seeka fan beenno.

³⁷ Qibaadâ-Qaril tan seekah kulli sanatal naharat orobte darok riyne buluula baahennooh; tohuk kalah kaadu, qinabak bicisne kamri kee caxâ xaylok bicsen *zeyti kee caxâ-miru keenih aceenno. Tohum inkih Qibaadâ-Qarik duyye edde daanisan golitteh addal heenno. Leewih yooboke mari ni mandar kee ni buqreh ardil tooboke darok taban haytoh af gaaboysak sugeemih taagah, taban haytoh af dakaatah keenih aceenno.

³⁸ Seekak, Haarun deqsita kaxxa seekik rade mari, Leewih yooboke mara luk gacca 'yeh, woo diini qaadah gaaboysan duyye gaaboysoonay. Too duyyey gaaboyseenihiyyak tabanhaytoh af, Leewih yooboke mari Yallih Qibaadah-Qarik duyye edde daanisan golih addat daanisoonay.

³⁹ Israayil kee Leewih yooboke marii, darooy, qinab-kamri kee caxâ xaylok bicsen *zeyti, Yallih Qibaadah Qarih faxxinta duyye elle daanisan makdanal hoonay. Tohuu, Yallih Qibaadah-Qaril Yallih taama abta seeka dabaaqah elle taniih, Yallih Qibaadah-Qarit saare aba mari kee dacayrih yan mara kaadu dabaaqah elle yanihiyya. Ni Dagelta elle naqbude qari dibu kaa mabna› 'yaanam elle ten.