Nacmiya 1 - NABUWWA KEE MALIKWA

¹ Cakliyah baxi Nacmiya dudda luk abe taama ah teeti. Anu, Artacsasta Fursih malik edde yekke labaatanhaytô sanatat, Kislaw deqsita alsat, Suusa deqsitta inaytâ-magaalal en.

NACMIYA YARUSALAAMAK YEMEETE MARIH XAAGU GEE

² Canaani deqsita yi toobokoyti Yuudâ-rasuk dago mara luk yemeete waqdi, Baabelon rasu fan seewah beenih sugen maray Yarusalaam fan yuduurehiyya kee Yarusalaam magaala elle tan innih xaagu keenik abe.

³ Too mari yok iyyemii, «Baabeloonuk saaboh isi baaxo fan yuduure mari kaxxa gadaamah addat yaniih; woo baaxol suge mari ken bursutah. Yarusalaam magaalat maroh tan gasoosay tiddigillehiyya uxih bicsa mali. Magaalah adda akak culan culmay duma carriseenihiyya uxih bica magenna» 'yaanam yok iyyen.

NACMIYA YUUDÂ MARAH YALLA KALLACE

⁴ Too xaagu oobbe waqdi, daffa exceh weeqe. Dago ayroora rookat sugeeh, too ayroora maaqo xage'kal suge. Yalla kallaceeh,

⁵ exceemih, «YALLAW, Qaraanal yan Dageltaw, atu naba Dagelta kinnitooh; nanu kok meysinnah. Koo kicna mara kee ku amri oggola mara lih abte bica xagura Dagelta kinnito. Woo mara luk lito kacani mayambaxa.

⁶ Yooy ku naqasu kinni wagga heey! Anu ku naqoosah bar kee laqo aba dooqah ayti ucuyaay yok oobbey. Nanu Israayil marak dambi le taamah taaminnem aaxigeh. Yoo kee anu akak rade yi kaxxa abbobti dambi le taamat asne.

⁷ Ceele-waytam kol bahneeh, atu aba inteh nee akah amrissem maabinnino. Muusay ku naqasuh yanih gabat neh rubte xinto aba intam maabinnino.

⁸ Yallaw, duma Muusak intem kassa heey! ‹Kee Israayil ummatey, imaan yol hee wayteenik, marin marih addat sin fixixiseyyo.

⁹ Tonna'mmay tohuh, yol tuduureenik, aba siinik axcem oggolla hayteenih abteenik, inkih yan baadal sin fixixisaamah, yoo elle taqbudoonuh doore arac fan sin gacseyyo› nek inteh ten.

¹⁰ «Goytaw, ta mari ku maraay ku naqoosa. Isi kaxxa qande kee caylat ken waddeh.

¹¹ Yooy ku naqasuh yani kee ku naqoosay ku migaq taynabehiyya abta dooqa nek macinin. A saaku faxam yoh aba'gidih, malik bagu yoh xabbacos» 'yaanam exce. Too saaku taamah luk enem, malikih qinab elle yaaqube kobbaaya xayyoosa marak abbah en.